អន្តរជាតិ
រដ្ឋមន្រ្តីការបរទេសចិន វ៉ាង យី ក្នុងកិច្ចសម្ភាសនៅអាល្លឺម៉ង់។ រូបភាពពី Twitter អ្នកស្រី Hua Chunying អ្នកនាំពាក្យក្រសួងការបរទេសចិន
×![]()
ដោយ: តន ចាន់រិទ្ធារ៉ា
ចិនជាមាសសុទ្ធ ដុតដោយភ្លើងនៃជំងឺ COVID-19 ។ នេះជាសម្ដីរដ្ឋមន្ត្រីការបរទេសចិន វ៉ាង យី ក្នុងកិច្ចសម្ភាសមួយអំឡុងដំណើរទស្សនកិច្ចនៅទីក្រុងបែរឡាំង ទឹកដីអាល្លឺម៉ង់។ បើតាមប្រមុខការទូតរូបនេះ ចិន នឹងមិនថយក្រោយដោយសារ COVID-19 ដែលបង្កដោយកូរ៉ូណាវីរុសឡើយ ហើយនឹងបន្តរីកចម្រើនថែមទៀត។ អំឡុងពេលលំបាកនេះ លោក វ៉ាង ក៏អះអាងថា ចិននឹងមើលឃើញមិត្តភក្តិពិតប្រាកដរបស់ខ្លួនផងដែរ។
អំឡុងដំណើរទស្សនកិច្ចនៅទឹកដីអាល្លឺម៉ង់ រដ្ឋមន្ត្រីការបរទេសចិន វ៉ាង យី បានឆ្លៀតផ្ដល់កិច្ចសម្ភាសឲ្យទីភ្នាក់ងារព័ត៌មាន Reuters និងបានលើកឡើងពីការប្រឹងប្រែងរបស់ចិនក្នុងការទប់ស្កាត់ និងគ្រប់គ្រងជំងឺ COVID-19 ដែលបង្កដោយកូរ៉ូណាវីរុស។ លោក វ៉ាង ក៏និយាយដល់មិត្តភាពរវាងចិន និងប្រទេសនានាអំឡុងពេលដែលលោកហៅថា កាលៈទេសៈលំបាក។
«ពេលលំបាក បង្ហាញមិត្តភាពពិត។ មិត្តភាព និងការទុកចិត្តរបស់យើងជាមួយប្រទេសដទៃ នឹងកាន់តែរឹងមាំ និងកាន់តែខ្លាំងក្លា។» នេះជាសំណេរលើបណ្ដាញសង្គមរបស់អ្នកស្រី Hua Chunying អ្នកនាំពាក្យក្រសួងការបរទេសចិននៅថ្ងៃទី១៥ ខែកុម្ភៈ ដែលស្រង់សម្ដីលោករដ្ឋមន្ត្រីការបរទេសក្នុងកិច្ចសម្ភាសនៅរដ្ឋធានីបែរឡាំង។ លោក វ៉ាង ក៏បានប្រដូចចិននឹងមាសសុទ្ធ និង COVID-19 ជាភ្លើង។ មាសដែលឆ្លងកាត់ភ្លើង នឹងកាន់តែខ្លាំង។
ក្នុងន័យនេះ ប្រមុខការទូតចិនអះអាងថា សេដ្ឋកិច្ចចិន នឹងកាន់តែមានស្ថិរភាព ហើយបន្តនិរន្តរភាពទៅមុខទៀត។ លោកបន្តថា ចិនកំពុងប្រជែងនឹងពេលវេលាដើម្បីសង្គ្រោះជីវិតអ្នកជំងឺទាំងអស់ និងបញ្ឈប់ការរាតត្បាតរបស់វាផងដែរ។ សម្រាប់លោក វ៉ាង ការលះបង់របស់ចិន ទទួលបានការសរសើរច្រើនពីសហគមន៍អន្តរជាតិ។ បើតាមក្រសួងការបរទេសចិន រដ្ឋាភិបាលប្រទេសចំនួន៣៣ និងអង្គការអន្តរជាតិចំនួន៤ បានផ្ដល់ជំនួយសម្ភារវេជ្ជសាស្ត្រឲ្យចិន។
កម្ពុជា ក៏ស្ថិតក្នុងចំណោមប្រទេសទាំង៣៣ នេះដែរ ព្រមគ្នានឹងបារាំង អង់គ្លេស អាល្លឺម៉ង់ អាមេរិក និងសម្ពន្ធយោធាណាតូជាដើម។ លើសពីនោះ ប្រទេសមួយចំនួនទៀតដូចជា កូរ៉េខាងជើង មីយ៉ាន់ម៉ា ម៉ាល់ឌីវ ស៊ីលី ដាណឺម៉ាក និងម៉ុងហ្គោលីជាដើម បានផ្ដល់ជំនួយហិរញ្ញវត្ថុ និងការគាំទ្រផ្សេងទៀត។ អ្នកនាំពាក្យក្រសួងការបរទេសចិន នៅថ្ងៃទី១៤ ខែកុម្ភៈ អះអាងថា មកទល់ពេលនេះ ចិនពឹងផ្អែកលើខ្លួនទាំងស្រុងដើម្បីដោះស្រាយបញ្ហា COVID-19 នេះ។
យ៉ាងណាមិញ ចិនក៏ស្វាគមន៍ និងអរគុណសហគមន៍អន្តរជាតិ ពិសេសប្រទេសកំពុងអភិវឌ្ឍសម្រាប់ការគាំទ្រស្មោះសរ និងជំនួយជាមិត្តភាព៕
ក្នុងន័យនេះ ប្រមុខការទូតចិនអះអាងថា សេដ្ឋកិច្ចចិន នឹងកាន់តែមានស្ថិរភាព ហើយបន្តនិរន្តរភាពទៅមុខទៀត។ លោកបន្តថា ចិនកំពុងប្រជែងនឹងពេលវេលាដើម្បីសង្គ្រោះជីវិតអ្នកជំងឺទាំងអស់ និងបញ្ឈប់ការរាតត្បាតរបស់វាផងដែរ។ សម្រាប់លោក វ៉ាង ការលះបង់របស់ចិន ទទួលបានការសរសើរច្រើនពីសហគមន៍អន្តរជាតិ។ បើតាមក្រសួងការបរទេសចិន រដ្ឋាភិបាលប្រទេសចំនួន៣៣ និងអង្គការអន្តរជាតិចំនួន៤ បានផ្ដល់ជំនួយសម្ភារវេជ្ជសាស្ត្រឲ្យចិន។
កម្ពុជា ក៏ស្ថិតក្នុងចំណោមប្រទេសទាំង៣៣ នេះដែរ ព្រមគ្នានឹងបារាំង អង់គ្លេស អាល្លឺម៉ង់ អាមេរិក និងសម្ពន្ធយោធាណាតូជាដើម។ លើសពីនោះ ប្រទេសមួយចំនួនទៀតដូចជា កូរ៉េខាងជើង មីយ៉ាន់ម៉ា ម៉ាល់ឌីវ ស៊ីលី ដាណឺម៉ាក និងម៉ុងហ្គោលីជាដើម បានផ្ដល់ជំនួយហិរញ្ញវត្ថុ និងការគាំទ្រផ្សេងទៀត។ អ្នកនាំពាក្យក្រសួងការបរទេសចិន នៅថ្ងៃទី១៤ ខែកុម្ភៈ អះអាងថា មកទល់ពេលនេះ ចិនពឹងផ្អែកលើខ្លួនទាំងស្រុងដើម្បីដោះស្រាយបញ្ហា COVID-19 នេះ។
យ៉ាងណាមិញ ចិនក៏ស្វាគមន៍ និងអរគុណសហគមន៍អន្តរជាតិ ពិសេសប្រទេសកំពុងអភិវឌ្ឍសម្រាប់ការគាំទ្រស្មោះសរ និងជំនួយជាមិត្តភាព៕
Tag:
ចិន
COVID-19
វ៉ាង យី
© រក្សាសិទ្ធិដោយ thmeythmey.com
