ទៅដល់សៀមរាប! កុំភ្លេចចូលលេង«ចង្ក្រានរយ»អេកូទេសចរណ៍ធំជាងគេនៅក្នុងខេត្ត

ជាតិ

២៥ខេត្ត/រាជធានី

ទៅដល់សៀមរាប! កុំភ្លេចចូលលេង«ចង្ក្រានរយ»អេកូទេសចរណ៍ធំជាងគេនៅក្នុងខេត្ត

15, Feb 2020 , 4:15 pm

រូបភាព

ដោយ:

សៀមរាប៖ ភ្ញៀវទេសចរណ៍ជាតិនិងអន្តរជាតិភាគច្រើន ដែលទៅកម្សាន្តនៅខេត្តសៀមរាប កម្រនឹងស្គាល់តំបន់អេកូទេសចរណ៍«ចង្ក្រានរយ»ណាស់។ ចង្ក្រានរយ ជាសហគមន៍ទេសចរណ៍ធម្មជាតិមួយធំជាងគេនៅស្រុកវ៉ារិន ដែលមានចម្ងាយប្រមាណ៨០គីឡូម៉ែត្រពីក្រុងសៀមរាប។ ភ្ញៀវទេសចរណ៍ដែលបានមកដល់ទីនោះ អាចទៅទស្សនាតាមគោលដៅជាច្រើនកន្លែង ស្ថិតនៅក្នុងដែនព្រៃសហគមន៍ចង្ក្រានរយរហូតដល់ទៅដល់ជាង៩ពាន់ហិកតា ដែលជាជម្រកសត្វព្រៃ និងជីវៈចម្រុះយ៉ាងសម្បូរបែប។

គោលដៅទេសចរណ៍ដែលលោក-អ្នក អាចទៅកម្សាន្តបានមានដូចជា ទស្សនាសត្វព្រៃ សត្វស្លាប ជម្រកមេអំបៅ, រូងប្រចៀវ, ទឹកធ្លាក់៧ជាន់, គយគន់សមុទ្រឈើ, មើលថ្ងៃរៀបលិច, ភ្នំចង្ក្រានរយ, ភ្នំចាន់ក្រហម, ជិះគោយន្ត ឬកង់កម្សាន្តក្នុងព្រៃសហគមន៍, ភ្លក់ម្ហូបអត្តសញ្ញាណ, បោះតង់ និងស្វែងយល់ពីវប្បធម៌ ប្រពៃណី រួមទាំងជីវៈភាពរស់នៅរបស់ប្រជាសហគមន៍នៃតំបន់ដាច់ស្រយាលមួយនេះផងដែរ។

ទាំងនេះសុទ្ធសឹងជាការធ្វើដំណើរកម្សាន្តបែបផ្សងព្រេងពីគោលដៅមួយទៅគោលដៅមួយ និងពីភ្នំមួយឆ្ពោះទៅកាន់ភ្នំមួយទៀត ដែលស្ថិតនៅក្នុងព្រៃអភិរក្សរបស់សហគមន៍ដ៏ធំជាងគេនៅក្នុងខេត្តសៀមរាប។ ក្នុងចំណោមគោលដៅទេសចរណ៍ទាំងអស់សារព័ត៌មានថ្មីៗ សូមបង្ហាញតែទិដ្ឋភាពនៅលើភ្នំចង្ក្រានរយមុនគេ ដែលជាភ្នំមួយមានរឿងរ៉ាវតំណាលជាព្រងនិទានថា មានស្តេចមួយអង្គបានកើតឃ្លង់ ហើយក៏បានសំងំដាំថ្នាំនៅលើថ្មរាប់រយរាប់ពាន់ដែលមានមុំបីរាងដូចចង្ក្រាននេះ ដើម្បីព្យាបាលជំងឺ។ ក្រោយៗមកភ្នំនេះ ត្រូវបានចាស់ៗពីមួយជំនាន់ទៅមួយជំនាន់ហៅតៗគ្នាថា «ភ្នំចង្ក្រានរយ» ហើយបច្ចុប្បន្នទីតាំងនេះ បានក្លាយជាតំបន់ទេសចរណ៍ធម្មជាតិថ្មីមួយទៀតរបស់អ្នកសៀមរាប ដ៏គួរឲ្យទាក់ទាញ៕