ជាតិ
ជប៉ុនឆ្លៀតផ្ដល់សម្ភារបង្ការ COVID-19 ដល់កម្ពុជា ខណៈប្រទេសខ្លួនមានករណីកាន់តែច្រើន
×![]()
ដោយ: ផាត ដាណេ
ភ្នំពេញ៖ អំឡុងពេលនៃការរីករាលដាលជំងឺរលាកសួតបង្កដោយមេរោគកូរ៉ូណាប្រភេទថ្មី (COVID-19) ជប៉ុនបានសម្រេចផ្ដល់សម្ភារបង្ការមួយចំនួនដល់កម្ពុជា ដូចជា អាវបំពង់ អាល់កុលសម្អាតដៃ វែនតាការពារសុវត្ថិភាព និងស្រោមដៃ។
ជប៉ុនបានផ្ដល់អាវបំពង់ចំនួន៩៣៦០, អាល់កុលសម្អាតដៃចំនួន៤៨០, វ៉ែនតាការពារសុវត្ថិភាពចំនួន៥៤០ និងស្រោមដៃចំនួន២៤៤០០គូផងដែរ។ សម្ភារទាំងនេះគឺជា ឧបករណ៍ការពារខ្លួនដែលមូលនិធិអាស៊ី-អ៊ឺរ៉ុប (ASEF) បានស្តុកទុកក្រោមការឧបត្ថម្ភរបស់រដ្ឋាភិបាលជប៉ុន។
តាមសេចក្តីប្រកាសព័ត៌មានរបស់ស្ថានទូតជប៉ុននៅកម្ពុជា សម្ភារទាំងនោះ នឹងត្រូវផ្ញើរមកដល់កម្ពុជា ចេញពីឃ្លាំងស្តុកនៅសិង្ហបុរី ក្រោមការសម្របសម្រួលរបស់អង្គការសុខភាពពិភពលោកប្រចាំតំបន់ប៉ាស៊ីហ្វិចខាងលិច (WPRO)។
«ការលើកស្ទួយកិច្ចសហប្រតិបត្តិការអន្តរជាតិគឺមិនអាចខ្វះបានដើម្បីការពារការរីករាលដាលថែមទៀតនៃការឆ្លងវីរ៉ុសកូរ៉ូណាប្រភេទថ្មី។ ជាមួយគ្នានេះ ប្រទេសជប៉ុនចង់ពង្រឹងកិច្ចសហប្រតិបត្តិការជាមួយប្រទេសកម្ពុជា»។ នេះបើតាមការលើកឡើងរបស់ស្ថានទូតជប៉ុន។
សូមបញ្ជាក់ថា មូលនិធិអាស៊ី-អ៊ឺរ៉ុប (ASEF) ត្រូវបានបង្កើតឡើងតាំងពីឆ្នាំ១៩៩៦ នៅប្រទេសសឹង្ហបុរី ជាអង្គភាពអចិន្ត្រៃន៍មួយនៃកិច្ចប្រជុំអាស៊ី-អ៊ឺរ៉ុប (ASEM) ដែលមានសកម្មភាពជាច្រើនផ្ដោតទៅលើវប្បធម៌-សង្គម។
សម្រាប់ COVID-19 កម្ពុជាមានករណីឆ្លងតែ១ប៉ុណ្ណោះ ហើយជនជាតិចិនដែលបានឈឺនោះ ក៏បានជាសះស្បើយហើយផងដែរ។ រីឯជប៉ុនវិញ មាន៥២ករណី ដែលក្នុងនោះមានស្លាប់១ករណី។ ២៨៥ករណីទៀតស្ថិតនៅលើនាវាទេសចរណ៍ Diamond Princess នាផែ Yokohama។ មូលហេតុនេះហើយ ដែលជប៉ុនមិនត្រូវបានបន្ទោសលើករណីបដិសេធនាវា Westerdam ឲ្យសំចតនៅដែនទឹករបស់ខ្លួន។
ក្រៅពីនេះ ជនជាតិជប៉ុនម្នាក់ ក៏បានស្លាប់ដោយសារ COVID-19 នៅខេត្ត Hubei ប្រទេសចិនផងដែរ៕
ក្រៅពីនេះ ជនជាតិជប៉ុនម្នាក់ ក៏បានស្លាប់ដោយសារ COVID-19 នៅខេត្ត Hubei ប្រទេសចិនផងដែរ៕
Tag:
COVID-19
© រក្សាសិទ្ធិដោយ thmeythmey.com
