ពិធី «ចាប់ត្រី» នៅមេមត់ ដោយប្រើអង្រុត ឈ្នាង ត្រក មានអ្នកចូលរួមប្រមាណ២ម៉ឺននាក់

ជាតិ

ពិធី «ចាប់ត្រី» នៅមេមត់ ដោយប្រើអង្រុត ឈ្នាង ត្រក មានអ្នកចូលរួមប្រមាណ២ម៉ឺននាក់

16, Feb 2020 , 2:39 pm

រូបភាព

ទិដ្ឋភាពពលរដ្ឋចាប់ត្រីនៅបឹងត្រពាំងក្រម ឃុំជាំក្រវៀន ស្រុកមេមត់ ខេត្តត្បូងឃ្មុំ ។ ថតដោយ ឈុត ឈាណា

ដោយ: អ៊ុត រស្មី (Uth Raksmey)

ពិធីចាប់ត្រីរបៀបបុរាណ នៅបរិវេណបឹងត្រពាំងក្រម ឃុំជាំក្រវៀន ស្រុកមេមត់ ខេត្តត្បូងឃ្មុំ ចាប់ពីថ្ងៃទី១៣-១៥ ខែកុម្ភៈ ឆ្នាំ២០២០ មានពលរដ្ឋចូលរួមចំនួនប្រមាណ២ម៉ឺននាក់។ នេះបើតាមលោក អ៊ួច យឿន មេឃុំជាំក្រវៀន ដែលបានប្រាប់សារព័ត៌មានថ្មីៗ តាមទូរសព្ទ។

អង្រុត ឈ្នាង និងត្រក ជាឧបករណ៍ដែលតម្រូវសម្រាប់អ្នកចូលរួមប្រើប្រាស់ដើម្បីចាប់ត្រី នៅតំបន់បឹងត្រពាំងក្រម មានផ្ទៃដីប្រមាណ៣០ហិកតា និងផ្ទៃបឹងទំហំ១ហិកតា។ រយៈពេល៣ថ្ងៃ កម្មវិធីដែលរៀបចំដើម្បីរំលឹកពីសកម្មភាពកាលពីបុរាណនេះ ទាក់ទាញអ្នករួមប្រមាណ២ម៉ឺននាក់ ពោលគឺកើន៦០ភាគរយ បើប្រៀបធៀបទៅនឹងការរៀបចំនាឆ្នាំ២០១៩កន្លងមក។

«មូលហេតុនៃការកើនឡើង ដោយសារពលរដ្ឋនៅតាមបណ្ដាញសង្គមមានការចាប់អារម្មណ៍ច្រើន តាមរយៈការផ្សព្វផ្សាយព័ត៌មានផ្សេងៗ។ អ្នកចូលរួមមកពីភ្នំពេញ ខេត្តកំពង់ចាម ព្រៃវែង ក្រចេះ និងខេត្តពោធិ៍សាត់ជាដើម»។ នេះជាការអះអាងរបស់លោកមេឃុំ ជាំក្រវៀន ដោយជឿជាក់ថា ចំនួននឹងបន្តកើនឡើងទៀតនាឆ្នាំក្រោយ។

លោក អ៊ួច យឿន បន្តថា លោកនឹងរៀបចំកន្លែងចំណតយានជំនិះឲ្យបានល្អ និងបន្ថែមទឹកស្អាតសម្រាប់សម្អាតខ្លួនក្រោយចាប់ត្រីឲ្យបានគ្រប់គ្រាន់ថែមទៀត។ ជាមួយគ្នានេះ លោកក៏ស្នើសុំគណៈអភិបាលខេត្តត្បូងឃ្មុំ រៀបចំបង្គន់អនាម័យចល័តដើម្បីផ្ដល់ភាពងាយស្រួលដល់អ្នកចូលរួម។

តំបន់បឹងត្រពាំងក្រម ជាតំបន់ដែលអាជ្ញាធរការពារ ដោយមិនអនុញ្ញាតឲ្យពលរដ្ឋនេសាទត្រីឡើយ ក្នុងគោលបំណងរក្សាវត្តមានត្រី ទុកសម្រាប់ពិធីចាប់ត្រី ជារៀងរាល់ឆ្នាំ។ ពលរដ្ឋ អាចប្រើប្រាស់បានតែឧបករណ៍បុរាណប៉ុណ្ណោះ ដូចជាអង្រុត ឈ្នាង និងត្រកជាដើម ដើម្បីចាប់ត្រី ក្នុងពិធីនេះ៕