វិចិត្រករ កែវ សាន់ វ័យ៨៣ឆ្នាំ នៅតែបន្តកាន់ជក់ផ្ទេរជំនាញគូររូបដល់អ្នកជំនាន់ក្រោយ

ជាតិ

សង្គមជាតិ

វិចិត្រករ កែវ សាន់ វ័យ៨៣ឆ្នាំ នៅតែបន្តកាន់ជក់ផ្ទេរជំនាញគូររូបដល់អ្នកជំនាន់ក្រោយ

16, Feb 2020 , 8:29 pm

រូបភាព

វិចិត្រករ កែវ សាន់ វ័យ៨៣ឆ្នាំ នៅតែបន្តកាន់ជក់ផ្ទេរជំនាញគូររូបដល់អ្នកជំនាន់ក្រោយ

ដោយ:

ភ្នំពេញ៖ លោកតា កែវ សាន់ ជាជាងគំនូរដ៏ល្បីល្បាញមួយរូប កាលពីអំឡុងទសវត្សរ៍ឆ្នាំ១៩៨០ ។ ស្នាដៃរបស់លោកតា កែវ សាន់ ដែលមានវ័យ៨៣ឆ្នាំទៅហើយនោះ មានដូចជាគំនូរនៅលើបដា និងជាពិសេសស្លាកយីហោរោងកុននានាទាំងនៅរាជធានីភ្នំពេញ និងនៅតាមបណ្តាខេត្ត។ ព្រោះតែការស្រឡាញ់ និងចង់ផ្ទេរចំណេះរបស់ខ្លួនដល់អ្នកជំនាន់ក្រោយផង លោកតា កែវ សាន់ ដែលគេផ្តល់នាមថា ជាងគំនូរវត្តភ្នំ នៅតែបន្តគូររូបគំនូរ និងឆ្លាក់អក្សរនានាដល់បច្ចុប្បន្ន។ ជាងគំនូរ វ័យចំណាស់រូបនេះ ក៏ប៉ងផ្ទេរចំណេះជំនាញរបស់ខ្លួន ទៅកូនចៅជំនាន់ក្រោយ ហើយចង់ឲ្យឈ្មោះរបស់ខ្លួនត្រូវបានគេចងចាំផងដែរ។

បន្តស្តាប់បទសម្ភាសជាវីដេអូរបស់កញ្ញា សៅ សុខអេង អ្នកសារព័ត៌មានថ្មីៗ និងលោកតា កែវ សាន់ វិចិត្រករគំនូរ និងឆ្លាក់អក្សរនៅផ្សារធំថ្មីដូចតទៅ៖

នៅអំឡុងឆ្នាំ១៩៨០ ដល់ឆ្នាំ១៩៩៣ លោក កែវ សាន់ គឺជាជាងគំនូរតែម្នាក់គត់ដែលបានគូររូបនៅស្លាកយីហោរោងកុនជិត៣០ នៅតាមបណ្តារោងកុននានានៅទូទាំងប្រទេស ដែលគំនូរខ្លះមានបន្សល់មកដល់សព្វថ្ងៃ ហើយខ្លះទៀតបានបាត់បង់ទៅហើយ។ ជាងគំនូរវត្តភ្នំ គឺជាឈ្មោះហៅក្រៅរបស់ លោកតា កែវ សាន់ ដែលមានវ័យ៨៣ឆ្នាំហើយសព្វថ្ងៃ។ ដ្បិតរយៈពេលជាង៤០ឆ្នាំមក លោកតា សាន់ ផ្លាស់ប្តូរទីលំនៅជាច្រើន និងទីតាំងរកស៊ីចិញ្ចឹមជីវិតមិនចេះចប់ ប៉ុន្តែលោកមិនដែលបោះបង់អាជីពជាងគំនូរនេះឡើយ។ បច្ចុប្បន្ន កន្លែងគូររូបគំនូរ និងឆ្លាក់អក្សររបស់លោកតា កែវ សាន់ មានទីតាំងនៅចំណុចលក់ផ្កាស្រស់ នៃផ្សារធំថ្មី។

ទីតាំងរបស់លោកតា កែវ សាន់ មានតុតូចមួយ ដែលមានដាក់ ជក់ ទឹកថ្នាំពណ៌ស២កំប៉ុង និងខ្មៅដៃ និងប្រដាប់ប្រដាគូររូបមួយចំនួនទៀត។ វិចិត្រករ កែវ សាន់ រៀបរាប់ពីការការប្រកបរបរគូររូប និងឆ្លាក់អក្សររបស់ខ្លួនយ៉ាងដូច្នេះ៖«រកស៊ីខាងហ្នឹង អត់មានហត់អីទេ និងអត់បាក់កម្លាំងអីទេ។ ការងារហ្នឹងគឺស្រាលតែម្តង។ ទោះបីយើងគូរអ្វីក៏ដោយ ទៅស្រុក ទៅប្រទេសណាក៏ដោយ គឺមិនចាំបាច់ចំណាយដើមទុនទេ។ ដូចជាធ្វើនំអត់ម្សៅអ៊ីចឹង។ បើគេកម្ម៉ង់យើងឲ្យគូរឲ្យគេ គឺយើងឲ្យគេកក់លុយ ហើយទិញថ្នាំ គូរហើយយើងបានលុយតែម្តង។ ម្ល៉ោះហើយចំណេះហ្នឹង គឺវាអត់សាបសូន្យទេ»។

ស្ថិតក្នុងសម្លៀកបំពាក់អាវពណ៌ទឹកសមុទ្រ និងខោខ្លីពណ៌ខៀវ លោកតា កែវ សាន់ ចេះនិយាយ និងចេះសរសេរបាន៣ភាសា គឺភាសាខ្មែរ,ចិន និងវៀតណាម បានយ៉ាងស្ទាត់ជំនាញហើយក៏អាចឆ្លាក់អក្សរនៃភាសាទាំង៣នេះបានយ៉ាងស្អាតផងដែរ។ លោកតា កែវ សាន់រៀបរាប់ដូច្នេះថា៖«ចេះតែមើល ហើយសរសេរបានតែម្តង តែមិនមែនតែចំពោះអក្សរទេ កុំថាឡើយរូបមនុស្ស មើលហើយក៏អាចគូរបានតែម្តង»។

បើទោះបីជាគំនូរបែបឌីជីថលកាន់តែពេញនិយមនៅក្នុងសង្គមបច្ចុប្បន្នក៏ដោយ លោកតា កែវ សាន់ មិនអាក់អន់ស្រពន់នោះទេ ពីព្រោះនេះជាការវិវឌ្ឍន៍របស់សង្គមនីមួយៗ។ ប៉ុន្តែអ្វីដែលវិចិត្រករវ័យចំណាស់រូបនេះចង់បាននោះ គឺការផ្ទេរចំណេះជំនាញគំនូរ និងឆ្លាក់អក្សរនេះទៅមនុស្សជំនាន់ក្រោយ។ លោកតា មានប្រសាសន៍ថា៖«កូនចៅណាដែលចង់រៀនផ្នែកគំនូរ និងឆ្លាក់អក្សរដោយដៃ កុងអាចបង្រៀនដោយឥតគិតថ្លៃ។ និយាយឲ្យអស់ទៅ ពេលកុងស្លាប់ទៅ កុងមិនអាចយកទៅតាមទេ។ កុងទុកជាអនុស្សាវរីយ៍ ដើម្បីឲ្យកូនចៅជំនាន់ក្រោយបានដឹងថារៀនគូរពីកុង ហើយអាចរក្សាកេរ្តិ៍ឈ្មោះ»៕