អន្តរជាតិ
អាមេរិក ព្រមានអឺរ៉ុបកុំឲ្យដើរតាម «ទិសដៅខុស» ជាមួយចិន រដ្ឋមន្រ្តីការពារជាតិអាមេរិក ម៉ាក អេស្ពើ ។ រូបភាព AFP
× សហរដ្ឋអាមេរិក នៅថ្ងៃទី១៥ ខែកុម្ភៈ បានព្រមានដៃគូអឺរ៉ុបរបស់ខ្លួនឲ្យមានជំហរតឹងរ៉ឹងដាក់ចិន ហើយមិនត្រូវដើរតាមទិសដៅខុសតាមចិនឡើយ។ ពាក្យព្រមានរបស់អាមេរិកដែលថ្លែងដោយរដ្ឋមន្ត្រីការពារជាតិ និងការបរទេសពីជំនួបសន្តិសុខអន្តរជាតិនៅអាល្លឺម៉ង់ ធ្វើឡើងខណៈអឺរ៉ុប ត្រូវមើលឃើញថា បន្តទំនាក់ទំនងល្អប្រសើរជាមួយចិន ទោះមានបញ្ហាខ្លះក្ដី។ ប៉ុន្តែចិនប្រតិកម្មវិញថា មន្ត្រីអាមេរិកកំពុងនិយាយកុហកប៉ុណ្ណោះ។
ពីវេទិកាសន្និសីទសន្តិសុខមុយនិក មន្ត្រីជាន់ខ្ពស់រដ្ឋាភិបាលអាមេរិកពីរនាក់ គឺរដ្ឋមន្ត្រីការពារជាតិ ម៉ាក អេស្ពើ និងរដ្ឋមន្ត្រីការបរទេស ម៉ៃ ប៉ុមប៉េអូ បានដាក់វេនគ្នាពន្លះចិនឥតប្រណីមាត់ ទន្ទឹមនឹងការរំឭកសម្ពន្ធមិត្តនៅអឺរ៉ុបរបស់ខ្លួនឲ្យប្រយ័ត្ននឹងចិន។ អឺរ៉ុប ត្រូវមើលឃើញថា នៅចំកណ្ដាលការប្រកួតប្រជែងរវាងអាមេរិក និងចិនដែលបានឡើងកម្ដៅនៅលើវិស័យជាច្រើនចាប់ពីបច្ចេកវិទ្យា សេដ្ឋកិច្ច និងការធ្វើពាណិជ្ជកម្មផង។
ចំពោះមុខមេដឹកនាំសំខាន់ដែលបានចូលរួម លោក អេស្ពើ និយាយថា ក្រោមការដឹកនាំរបស់ប្រធានាធិបតី ស៊ី ជិនភីង បក្សកុម្មុយនីស្តចិន បានរុលទៅមុខយ៉ាងលឿន និងកាន់តែឆ្ងាយក្នុងទិសដៅខុសដូចជាការរឹតត្បិតសេរីភាពប្រជាជន ការអនុវត្តគោលនយោបាយដែលកេងចំណេញខ្លាំង និងកាន់តែបារម្ភសម្រាប់រូបលោក គឺយោធាដែលអាចបង្កហេតុបាន។ បើតាមកាសែត South China Morning Post លោក អេស្ពើ ចោទចិនទៀតថា ចងកែប្រែសណ្ដាប់ធ្នាប់ពិភពលោក។
ចំណែកលោក ប៉ុមប៉េអូ វិញ ប្រដូចចិនទៅនឹងរុស្ស៊ី និងអ៊ីរ៉ង់ដែលសុទ្ធសឹងបង្កការគំរាមកំហែងដល់អឺរ៉ុប និងអាមេរិក។ ប្រមុខការទូតអាមេរិករូបនេះ ក៏រិះគន់ចិនថា បង្កហានិភ័យនៃគុណតម្លៃលោកខាងលិច ហើយបានលើកឡើងពីចំណុចប្រាំដែលអឺរ៉ុបត្រូវដឹងពីចិនដូចជា ក្រុមហ៊ុន Huawei មហិច្ឆតាផ្លូវសមុទ្រ ការប៉ុនប៉ងបំបិទសំឡេងតៃវ៉ាន់ និងហុងកុង ការព្យាយាមបញ្ជ្រាបឥទ្ធិពលក្នុងនយោបាយអាមេរិក និងអឺរ៉ុប និងការបង្កើនវត្តមានអាក់ទិកជាដើម។
រដ្ឋមន្ត្រីការបរទេសចិន វ៉ាង យី ដែលចូលរួមសន្និសីទអន្តរជាតិនេះដែរ បានច្រានចោលពាក្យសម្ដីចោទប្រកាន់របស់មន្ត្រីអាមេរិក។ លោក វ៉ាង ប្រាប់អ្នកចូលរួមថា ចិននៅតែគោរពយន្តការពហុភាគីនិយមដើម្បីសន្តិភាពពិភពលោក។ ដោយអះអាងថា អ្វីដែលលោក អេស្ពើ និងលោក ប៉ុមប៉េអូ លើកឡើងជារឿងកុហក ប្រមុខការទូតចិនរូបនេះបន្ថែម ពួកគេតែងតែដើរនិយាយចោទចិនឥតឈប់ឈរ មិនថាចូលរួមវេទិកាអ្វីឡើយ។
ការព្រមានរបស់មន្ត្រីទាំងពីរ ទំនងជាបង្ហាញពីអ្វីដែលអាមេរិកកំពុងរង្កៀសចិត្តនោះ គឺការយឺតយ៉ាវក្នុងការឆ្លើយតបរបស់អឺរ៉ុបទៅនឹងការកើនឡើងនៃឥទ្ធិពលចិនលើវិស័យ 5G ។ វ៉ាស៊ីនតោន បានព្រមានម្ដងហើយម្ដងទៀតពីហានិភ័យរបស់ 5G ដែលអភិវឌ្ឍដោយ Huawei ហើយព្យាយាមបញ្ចុះបញ្ចូលសម្ពន្ធមិត្តរបស់ខ្លួនឲ្យបិទផ្លូវក្រុមហ៊ុនចិន។ យ៉ាងណាមិញ ប្រទេសអឺរ៉ុបដែលត្រូវបច្ចេកវិទ្យាអ៊ីនធឺណិតល្បឿនលឿន និងទីផ្សារដ៏ធំរបស់ចិននោះ នៅតែរារែក៕
Tag:
អឺរ៉ុប
ចិន
អាមេរិក
© រក្សាសិទ្ធិដោយ thmeythmey.com