អន្តរជាតិ
អ្នកជំនាញសុខាភិបាល WHO ចាប់ផ្ដើមបេសកកម្មនៅចិនដើម្បីដោះស្រាយជំងឺ COVID-19 នាយកអង្គការសុខាភិបាលពិភពលោក Tedros Adhanom Ghebreyesus។ រូបភាព៖Reuters
× អ្នកជំនាញផ្នែកសុខាភិបាលអន្តរជាតិ បានទៅដល់ទៅរដ្ឋធានីប៉េកាំង និងបានជួបជាមួយអ្នកជំនាញក្នុងស្រុកដើម្បីជជែកគ្នា និងផ្លាស់ប្ដូរចំណេះដឹងសកលជុំវិញករណីជំងឺ COVID-19 ខណៈពេលស្ថានភាពជំងឺនេះនៅពេលខាងមុខ មិនទាន់អាចប៉ាន់ប្រមាណបាន។ នេះបើតាមការអះអាងរបស់អគ្គនាយកអង្កការសុខភាពពិភព (WHO) លោក Tedros Adhanom Ghebreyesus នៅថ្ងៃទី១៦ ខែកុម្ភៈ។
ករណី COVID-19 បានឆ្លងពីមនុស្សម្នាក់ទៅមនុស្សម្នាក់ ជាច្រើនករណីក្នុងមួយថ្ងៃៗ ទាំងនៅក្នុង និងក្រៅប្រទេសចិន។ បើទោះបីជាចំនួនករណីឆ្លងថ្មីនៅក្នុងខេត្តហ៊ូប៉ី បានធ្លាក់ចុះក្នុងរយៈពេល ៣ថ្ងៃជាប់គ្នា និងតំបន់ផ្សេងទៀតនៅចិន បានធ្លាក់ចុះក្នុងរយៈពេល ១២ថ្ងៃជាប់គ្នាក៏ដោយ អ្នកជំនាញពិភពលោក នៅតែព្រួយបារម្ភពីល្បឿននៃការរាតត្បាតរបស់ COVID-19 ដែលបង្កដោយកូរ៉ូណាវីរុសប្រភេទថ្មី ដោយសារគេមិនទាន់រកឃើញថ្នាំព្យាបាល និងវ៉ាក់សាំងការពារនៅឡើយ។
លោក Tedros Adhanom Ghebreyesus ប្រមុខអង្គការសុខភាពពិភពលោក បានសរសេរលើបណ្ដាញសង្គម Twitter ថា ក្រុមអ្នកជំនាញអន្តរជាតិជាច្រើននាក់ មានវត្តមាននៅក្នុងកិច្ចប្រជុំមួយ ដែលដឹកនាំរួមគ្នាដោយអង្គការសុខភាពពិភពលោក និងចិន។ បើតាមការបញ្ជាក់របស់លោកនាយកអង្គការអន្តរជាតិមួយនេះ កិច្ចប្រជុំ នឹងពិនិត្យមើលកិច្ចសហការរួមគ្នាដ៏សំខាន់ ដើម្បីផ្តល់ជាចំណេះដឹងសកល ជុំវិញករណីផ្ទុះ COVID-19 នៅក្នុងប្រទេសចិន។
ប៉ុន្តែលោក Tedros មិនបានបញ្ជាក់លំអិតថា កិច្ចប្រជុំនៅក្នុងប្រទេសចិនលើកនេះ នឹងមានអ្វីលើសពីនេះនោះឡើយ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
COVID-19 ដែលបានផ្ទុះឡើងនៅចុងឆ្នាំ២០១៩ បានបង្កឲ្យមនុស្សស្លាប់ និងមានអ្នកជំងឺយ៉ាងច្រើន។ គិតត្រឹមម៉ោង៧ ព្រឹកថ្ងៃទី១៧ ខែកុម្ភៈ អ្នកជំងឺនៅចិន និងប្រទេសផ្សេងទៀត បានកើតឡើងរហូតដល់ប្រមាណ ៧១ ០០០ករណី ស្របពេលអ្នកស្លាប់បានកើនដល់ ១៧៧២នាក់។ ជំងឺ COVID-19 មិនត្រឹមតែបង្កឲ្យមានបញ្ហាសង្គមប៉ុណ្ណោះទេ ប៉ុន្តែវាថែមទាំងធ្វើឲ្យសេដ្ឋកិច្ចពិភពលោក កំពុងជួបបញ្ហាទៀតផង។
សូមបញ្ជាក់ថា ដើម្បីទប់ស្កាត់ករណីរាតត្បាតនៃCOVID-19 ដែលបង្កដោយកូរ៉ូណាវីរុស អាជ្ញាធរចិន បានបិទខេត្តហ៊ូប៉ីទាំងមូល និងខេត្តក្រុងផ្សេងៗ។ ក្រៅពីនេះ ចិនបានរឹតត្បាតលើមធ្យោបាយធ្វើដំណើរសាធារណៈមួយចំនួន ក្នុងគោលបំណងការពារករណីឆ្លងនៅក្នុងប្រទេសកាន់តែធំឡើង។ ក្រៅពីនេះ អាជ្ញាធរចិន បានដាក់ចេញវិធានការមួយចំនួនផ្សេងទៀត ក្នុងការប្រយុទ្ធប្រឆាំងវីរុសដ៏សាហាវមួយនេះ៕
© រក្សាសិទ្ធិដោយ thmeythmey.com