សម្តេច ហ៊ុន សែន បញ្ជាឲ្យបិទហ្វេសប៊ុកដែលឡាយលក់ឡេ ហើយបញ្ចេញកេរ្តិ៍ខ្មាស

ជាតិ

សង្គមជាតិ

សម្តេច ហ៊ុន សែន បញ្ជាឲ្យបិទហ្វេសប៊ុកដែលឡាយលក់ឡេ ហើយបញ្ចេញកេរ្តិ៍ខ្មាស

17, Feb 2020 , 12:09 pm

រូបភាព

ដោយ: ថ្មីៗ

សម្តេចនាយករដ្ឋមន្ត្រី ហ៊ុន សែន បញ្ជាទៅក្រសួងប្រៃសនីយ៍ និងទូរគមនាគមន៍ ឲ្យបិទគណនី និង ទំព័រហ្វេសប៊ុក ឬបណ្តាញសង្គមផ្សេងទៀត ដែលផ្សាយលក់ផលិតផល ដោយការបញ្ចេញកេរ្តិ៍ខ្មាស។ បញ្ជារបស់សម្តេចនាយករដ្ឋមន្ត្រី ធ្វើឡើងក្នុងកិច្ចប្រជុំបូកសរុបការងាររបស់ក្រុមប្រឹក្សាជាតិកម្ពុជាដើម្បីស្ត្រី នាព្រឹកថ្ងៃទី១៧ ខែកុម្ភៈ ឆ្នាំ២០២០ ហើយត្រូវបានអ្នកស្រី កុច មារតី អគ្គនាយិការងនៃទូរទស្សន៍ជាតិកម្ពុជា (ទទក) ស្រង់យកទៅបង្ហោះលើគណនីហ្វេសប៊ុក។

អត្ថបទទាក់ទង

អត់មើលអ្នកលក់ឡេទេវើយ ព្រោះ បញ្ចេញ… និងប្រើពាក្យអាសអាភាសខ្លាំងណាស់!

បើតាមសំណេរបស់អ្នកស្រី កុច មារតី ការដែលសម្តេចនាយករដ្ឋមន្ត្រី ដាក់បញ្ជាបែបនេះ ដោយសារតែសម្តេច យល់ថា ការបញ្ចេញកេរ្តិ៍ខ្មាសលើបណ្តាញសង្គម គឺអាចនាំឲ្យមានការចាប់រំលោភ និង ការបំពានផ្លូវភេទលើស្ត្រី។

លោក មាស ប៉ូ អ្នកនាំពាក្យក្រសួងប្រៃសណីយ៍ មិនទាន់ហ៊ានធ្វើអត្ថាធិប្បាយឡើយ ដោយលោក ប្រាប់ថា មិនទាន់បានទទួលព័មាននេះ និងមិនទាន់បានស្តាប់ប្រសាសន៍របស់សម្តេច។

លោក អ៊ុក គឹមសេង អ្នកនាំពាក្យក្រសួងព័ត៌មាន លើកឡើងថា បច្ចុប្បន្ន សង្គមកម្ពុជា មិនមែនមានបញ្ហាតែនារីផ្សាយផ្ទាល់លើបណ្តាញសង្គម ដោយបញ្ចេញកេរ្តិ៍ខ្មាសប៉ុណ្ណឹងទេ គឺនៅបញ្ហាផ្សេងៗទៀត ដូចជា ការបំភ្លៃព័ត៌មាន ជាដើម ជាពិសេស ពាក់ព័ន្ធនឹងរឿងវីរុស COVID-19 ដែលកំពុងរីករាលដាលនិងកំពុងល្បីលើពិភពលោក។

លោក ថ្លែងថា ចំពោះអ្នកប្រើបណ្តាញសង្គមក្នុងប្រទេសកម្ពុជា ក្រសួងពាក់ព័ន្ធ អាចចាត់វិធានការបាន បើពួកគេ ប្រើមិនត្រឹមត្រូវ តែចំពោះអ្នកដែលនៅក្រៅប្រទេស គឺលើសពីព្រំដែនរបស់ក្រសួងនិងសមត្ថកិច្ចកម្ពុជា។ ក្នុងកិច្ចសម្ភាសជាមួយសារព័ត៌មានថ្មីៗ តាមទូរស័ព្ទ នាព្រឹកថ្ងៃទី១៧ ខែកុម្ភៈ អ្នកនាំពាក្យរូបនេះ បញ្ជាក់ដូច្នេះ៖«យើង ពិនិត្យមើលតាមករណីនីមួយៗ កន្លែងណាដែលយើង មានសមត្ថភាព មានសមត្ថកិច្ច អាចចាត់ការក្នុងស្រុកបាន យើងនឹងធ្វើ ហើយកន្លែងណា ដែលយើង ត្រូវសហការជាមួយក្រុមហ៊ុនបរទេស ដូចជាក្រុមហ៊ុនហ្វេសប៊ុកអីហ្នឹង យើងនឹងធ្វើកិច្ចការតាមហ្នឹង...»៕