រថយន្ត
អន្តរជាតិ
ដើម្បីពង្រឹងការទប់ស្កាត់ COVID-19 ខេត្តហ៊ូប៉ី ហាមឃាត់ការប្រើរថយន្តឯកជនទាំងអស់ ទិដ្ឋភាពដងផ្លូវដ៏ស្ងាត់ជ្រងំនៅក្រុងវូហាន ខេត្ត Hubei។ រូបថត AFP
× ខណៈដែលតួលេខអ្នកឆ្លង និងអ្នកស្លាប់ដោយសារជំងឺរលាកសួតបង្កដោយមេរោគកូរ៉ូណាប្រភេទថ្មី (COVID-19) នៅតែបន្តកើនឡើងមិនចេះឈប់នោះ អាជ្ញាធរខេត្តហ៊ូប៉ី ភាគកណ្តាលប្រទេសចិន បានសម្រេចបង្កើនការរឹតត្បិតចរាចរណ៍ ដោយមិនអនុញ្ញាតឲ្យមានការប្រើប្រាស់រថយន្តឯកជននោះឡើយ។
ប្រជាពលរដ្ឋដែលមានប្រមាណ៦០លាននាក់នៅខេត្តហ៊ូប៉ី ភាគកណ្តាលប្រទេសចិន ត្រូវអាជ្ញាធរហាមឃាត់ការដើរហើរចេញក្រៅ ជាពិសេសការប្រើប្រាស់រថយន្តឯកជន ដោយបំរាមទាំងនេះ មិនមានពេលកំណត់នោះឡើយ។
បើតាមអាជ្ញាធរ រថយន្តដែលអនុញ្ញាតឲ្យធ្វើចរាចរបាននៅខេត្តហ៊ូប៉ី គឺមានតែរថយន្តប៉ូលិស រថយន្តសង្គ្រោះបន្ទាន់ រថយន្តដឹកសម្ភារចាំបាច់ និងរថយន្តសាធារណៈមួយចំនួនប៉ុណ្ណោះ។
ការហាមប្រាមនោះ ដោយសារតែអាជ្ញាធរខេត្តហ៊ូប៉ី ប្រឹងប្រែងទប់ស្កាត់ការរាលដាលជំងឺ COVID-19 ដែលបានផ្ទុះចេញពីក្រុងវូហាន នៃខេត្តភាគកណ្តាលនេះផ្ទាល់ ចាប់តាំងពីខែធ្នូ ឆ្នាំ២០១៩ មក។
ជាមួយគ្នានេះ ក្រោមបទបញ្ជាថ្មីដែលប្រកាសនៅថ្ងៃទី១៦ ខែកុម្ភៈ រាល់ការរកស៊ីទាំងអស់ នឹងត្រូវបិទសិន ហើយប្រជាជនទាំងអស់ក្នុងខេត្ត មិនថាទីក្រុង ឬជនបទឡើយ មិនត្រូវបានអនុញ្ញាតឲ្យចេញពីផ្ទះ ឬភូមិរបស់ពួកគេឡើយ។ ចំណែកឯរថយន្តដែលចេញចូលភូមិ ឬសហគមន៍រស់នៅនានា និងអ្នកសួរសុខទុក្ខដែលមិនចាំបាច់ ក៏ត្រូវមិនបានអនុញ្ញាតដែរ។
រដ្ឋាភិបាលខេត្តហ៊ូប៉ី ក៏ចេញបញ្ញត្តិកំណត់ចំនួនមនុស្សនៅតាមហាងទំនិញនានា។ មនុស្សមួយចំនួនប៉ុណ្ណោះ នឹងត្រូវបានអនុញ្ញាតឲ្យដើរហើរចេញពីផ្ទះពួកគេដើម្បីទិញសម្ភារ និងអាហារចាំបាច់សម្រាប់តម្រូវការប្រចាំថ្ងៃ។
ក្នុងមួយថ្ងៃ ករណីស្លាប់ដោយជំងឺ COVID-19 នៅក្នុងខេត្តនេះ កើនឡើងជាលំដាប់ដោយបើគិតត្រឹមព្រឹកថ្ងៃចន្ទ ទី១៧ ខែកុម្ភៈនេះមានអ្នកស្លាប់១០០នាក់បន្ថែមទៀត។ ការរាយការណ៍ពីករណីឆ្លងថ្មីៗក្នុងខេត្តក៏មានចំនួនច្រើនដែរ បើទោះជាករណីឆ្លងថ្មីនៅតំបន់ដទៃទៀតរបស់ចិន បានធ្លាក់ចុះក្ដី៕
© រក្សាសិទ្ធិដោយ thmeythmey.com