អន្តរជាតិ
ចិន ពិចារណាលើកពេលកិច្ចប្រជុំសភាដែលតែងតែរៀបចំនៅខែមីនា កិច្ចប្រជុំសភាប្រជាជនចិននៅខែមីនា ឆ្នាំ២០១៩ ។ រូបភាព Xinhua
× ចិន នឹងពិចារណាលើកពេលកិច្ចប្រជុំប្រចាំឆ្នាំសភារបស់ខ្លួន ខណៈកំពុងតែប្រយុទ្ធប្រឆាំងជំងឺ COVID-19 ដែលសម្លាប់មនុស្សអស់ច្រើនជាង១៧០០នាក់ និងជាង៧ម៉ឺននាក់ទៀតឆ្លងជំងឺទាំងនៅចិនផ្ទាល់ និងប្រទេសជាង២០ទៀតនៅជុំវិញពិភពលោក។ ជាទម្លាប់ កិច្ចប្រជុំស្ថាប័នីតិបញ្ញត្តិតែងធ្វើឡើងនៅដើមខែមីនាខាងមុខ ហើយបើមានការពន្យារពេលនោះ វានឹងក្លាយជាលើកដំបូងក្នុងរយៈពេលជាង៣០ឆ្នាំមកនេះ។
គណៈកម្មាធិការអចិន្ត្រៃយ៍សភាប្រជាជនចិន នឹងបើកកិច្ចប្រជុំនៅថ្ងៃទី២៤ ខែកុម្ភៈដើម្បីជជែកលើការសេចក្ដីព្រាងការសម្រេចចិត្តលើកពេលប្រជុំពេញអង្គលើកទីបីសភាប្រជាជនចិន នីតិកាលទី១៣ ។ នេះបើតាមការផ្សាយរបស់ទីភ្នាក់ងារព័ត៌មានរដ្ឋចិន Xinhua ក្រោយកិច្ចប្រជុំមួយរបស់ថ្នាក់ដឹកនាំសភានៅថ្ងៃទី១៧ ខែកុម្ភៈ។
អស់ពេល៣៥ឆ្នាំមកហើយ សភាប្រជាជនចិន និងសភាពិគ្រោះយោបល់នយោបាយប្រជាជន តែងចាប់ផ្ដើមកិច្ចប្រជុំរបស់ខ្លួននៅអំឡុងដើមខែមីនា។ យ៉ាងណាមិញ នៅឆ្នាំ២០២០ ចិនកំពុងរុំព័ទ្ធដោយជំងឺ COVID-19 ដែលងាយឆ្លងពីមនុស្សម្នាក់ទៅម្នាក់ទៀត ទើបមានការលើកឡើងពីការពន្យារពេលប្រជុំនេះរយៈពេល១០ថ្ងៃសិន។
ការជជែកលើការលទ្ធភាពពន្យារពេលកិច្ចប្រជុំសភាប្រជាជនដែលមានសមាជិកប្រមាណពីរពាន់នាក់ ធ្វើឡើងស្របពេលដែលចិនកំពុងតស៊ូយ៉ាងស្វិតស្វាញក្នុងការទប់ស្កាត់ និងគ្រប់គ្រងកូរ៉ូណាវីរុសដែលបង្កទៅជាជំងឺរលាកសួតធ្ងន់ធ្ងរ។ ភាគរយដែលកិច្ចប្រជុំដ៏សំខាន់ក្នុងប្រក្រតីទិននយោបាយរបស់ចិន ត្រូវលើកពេលអាចមានច្រើន ព្រោះការជួបជុំមនុស្សច្រើនបែបនេះ ពិតជាងាយស្រួលណាស់សម្រាប់ការឆ្លងវីរុសពីមនុស្សម្នាក់ទៅម្នាក់ទៀត។
ក្រៅពីជជែកលើការសេចក្ដីព្រាងការសម្រេចចិត្តលើកពេលប្រជុំសភា កិច្ចប្រជុំគណៈកម្មាធិការអចិន្ត្រៃយ៍សភាចិន ក៏នឹងជជែកលើសេចក្ដីព្រាងការសម្រេចចិត្តដើម្បីហាមជំនួញសត្វព្រៃ និងការលុបបំបាត់ទម្លាប់បរិភោគសត្វព្រៃដើម្បីការពារជីវិតប្រជាជន។ នេះបើតាមការផ្សាយរបស់ Xinhua ។ កូរ៉ូណាវីរុស ត្រូវគេជឿថា មានប្រភពពីទីផ្សារសត្វព្រៃមួយកន្លែងក្នុងទីក្រុងវូហាន ខេត្តហ៊ូប៉ី មុននឹងបន្តឆ្លងដល់មនុស្ស រួចពីមនុស្សទៅមនុស្សដូចស្ថានភាពបច្ចុប្បន្ន។
បើគិតត្រឹមព្រឹកថ្ងៃចន្ទ ទី១៧ ខែកុម្ភៈ អ្នកស្លាប់ដោយសារជំងឺរលាកសួតបង្កដោយមេរោគកូរ៉ូណាប្រភេទថ្មី (COVID-19) ឡើងដល់នាក់១៧៧៥នាក់ ដោយខេត្តហ៊ូប៉ី មានអ្នកស្លាប់ច្រើនជាងគេដដែល។ វីរុស បានរាលដាលនៅទូទាំងខេត្ត និងតំបន់របស់ចិន ក៏ដូចជានៅប្រទេសចំនួន២៦ទៀតនៅជុំវិញពិភពលោក៕
© រក្សាសិទ្ធិដោយ thmeythmey.com