ភ្នំពេញ៖ កម្ពុជា បានសម្រេចបិទក្រុមហ៊ុន និងភោជនីយដ្ឋានកូរ៉េខាងជើងប្រមាណ២០កន្លែង នៅក្នុងឆ្នាំ២០១៩ ក្រោមហេតុផលថា អនុវត្តតាមវិធានការដាក់ទណ្ឌកម្មរបស់ក្រុមប្រឹក្សាសន្តិសុខអង្គការសហប្រជាជាតិ។ នេះបើតាមរបាយការណ៍របស់រដ្ឋាភិបាលកម្ពុជា កាលពីថ្ងៃទី២០ មករា ២០២០ ដែលបានផ្ញើជូនទៅក្រុមប្រឹក្សាសន្តិសុខអង្គការសហប្រជាជាតិ (UNSC) ហើយទើបចេញផ្សាយនាថ្ងៃទី១៣ កុម្ភៈ។
របាយការណ៍កម្ពុជា ដែលផ្ញើទៅកាន់ក្រុមប្រឹក្សាសន្តិសុខអង្គការសហប្រជាជាតិ ហើយត្រូវបានផ្សព្វផ្សាយនៅលើវេបសាយគណៈកម្មាធិការទណ្ឌកម្មនោះ បានបញ្ជាក់ថា កម្ពុជា បានសម្រេចបិទក្រុមហ៊ុនចំនួន១២ ភោជនីយដ្ឋាន៨ រួមទាំងសារមន្ទីរ 3D ឬ សារមន្ទីរសព្វទស្សន៍អង្គរ «Angkor Grand Panorama» ដំបូងបង្អស់នៅកម្ពុជា ដែលវិនិយោគដោយក្រុមហ៊ុនមកពីប្រទេសកូរ៉េខាងជើង នៅក្នុងខេត្តសៀមរាបផងដែរ។ ដោយឡែកបុគ្គលិក និងកម្មករកូរ៉េខាងជើង១១៥នាក់ ក៏ត្រូវបានកម្ពុជាបញ្ជូនចេញទៀតផង។
របាយការណ៍រដ្ឋាភិបាលកម្ពុជា បានបញ្ជាក់ថា កម្ពុជាតែងតែប្រកាន់ជំហររឹងមាំរបស់ខ្លួន ក្នុងការគាំទ្រការមិនរីកសាយអាវុធប្រល័យលោក ដើម្បីឆ្ពោះទៅរកការលុបបំបាត់អាវុធទាំងនេះ ។ សារព័ត៌មាន NK News ដែលមានការិយាល័យកណ្ដាលនៅទីក្រុងសេអ៊ូល ប្រទេសកូរ៉េខាងត្បូងនេះ បានស្រង់របាយការណ៍រដ្ឋាភិបាលកម្ពុជា ដែលមានខ្លឹមសារដូច្នេះថា៖«ក្នុងនាមជាសមាជិករបស់អង្គការសហប្រជាជាតិ ដែលមានការទទួលខុសត្រូវនោះ ប្រទេសកម្ពុជាបានបំពេញកាតព្វកិច្ចអន្តរជាតិរបស់ខ្លួនទាំងស្រុងនៅក្រោមធម្មនុញ្ញរបស់អង្គការសហប្រជាជាតិ និងបានអនុវត្តសេចក្តីសម្រេចចិត្តរបស់ក្រុមប្រឹក្សាសន្តិសុខលើការដាក់ទណ្ឌកម្មទាក់ទងនឹងសាធារណរដ្ឋប្រជាធិបតេយ្យប្រជាមានិតកូរ៉េ»។
ក្រុមហ៊ុន ដែលបានបិទទ្វារនោះរួមមាន៖ Pyongyang Unhasu Co., Ltd., Sunrise Horizon Co., Ltd., U.J. Import Export Co., Ltd., The Brands Classic Co., Ltd., Mansudae New Tech Corporation Ltd., Jupic (Cambodia) Trading Co., Ltd., Haegeum River Soft Drink Shop, Sach Ang Sing Pyong, Ho Seryong Pyong Yang Arirang, Pyong Yang Traditional Noodle and Pyong Yang Restaurant។
ចំណែកភោជនីយដ្ឋានកូរ៉េខាងជើង៨ដែលបានបិទទ្វារនោះរួមមាន៖ Pyongyang Arirang Restaurant , Moranbong Restaurants , Pyongyang Unhasu Restaurant , Pyongyang (Koryo) Restaurant , Pyongyang Traditional Restaurant , Sach Ang Sing Pyong , Pyongyang Traditional Noodle និងFriendship/Pyongyang Restaurant។
កាលពីដើមខែមករា ឆ្នាំ២០២០ អាជ្ញាធរកម្ពុជាឃាត់ខ្លួន និងបណ្ដេញជនជាតិកូរ៉េខាងជើងចំនួន១៦នាក់ពីកម្ពុជាផងដែរ។ ការបណ្ដេញជនជាតិកូរ៉េខាងជើងនេះ ក្រោមហេតុផលថា ពួកគេលួចធ្វើការងារឱ្យក្រុមហ៊ុនហ្គេមអនឡាញខុសច្បាប់ឱ្យក្រុមហ៊ុនចិនមួយកន្លែង នៅក្នុងខេត្តសៀមរាប។
ក្រុមប្រឹក្សាសន្តិសុខអង្គការសហប្រជាជាតិ បានចេញដំណោះស្រាយនៃការដាក់ទណ្ឌកម្មស្តីពីប្រទេសកូរ៉េខាងជើង តាំងពីឆ្នាំ ២០០៦ ដោយស្នើឱ្យមានការអនុវត្តតាមសំណើរក្នុងរបាយការណ៍នេះ។ ក្រោយមកក្រុមប្រឹក្សាសន្តិសុខនៃអង្គការសហប្រជាជាតិ ក៏បានអនុម័តទៅលើដំណោះស្រាយមួយ (UNSCR) ដោយតម្រូវឱ្យសមាជិកប្រទេសទាំងអស់បញ្ឈប់រាល់សកម្មភាពរបស់ក្រុមហ៊ុនកូរ៉េខាងជើង កាលពីឆ្នាំ២០១៦។ ចំណាត់ការរបស់ក្រុមប្រឹក្សាសន្តិសុខនៃអង្គការសហប្រជាជាតិ គឺជាការដាក់សម្ពាធនិងទណ្ឌកម្មផ្នែកហិរញ្ញរបស់ទីក្រុងព្យុងយ៉ាង ដែលបានពឹងផ្អែកផ្លូវដង្ហើមលើកម្មាភិបាលកម្មកររបស់ខ្លួនធ្វើការនៅបរទេស សម្រាប់លំហូររូបិយប័ណ្ណបរទេស។
រដ្ឋាភិបាលកម្ពុជា បានអនុលោមតាមសេចក្តីសម្រេចរបស់អង្គការសហប្រជាជាតិនេះ។ រដ្ឋាភិបាលកម្ពុជា បានចាប់ផ្ដើមបង្កើតក្រុមការងារពិសេសរបស់អន្តរក្រសួង សម្រាប់ការត្រួតពិនិត្យឯកសារទាំងអស់និងការស៊ើបអង្កេតលើក្រុមហ៊ុន និងអាជីវកម្មរបស់កូរ៉េខាងជើង ដើម្បីអនុលោមតាមការដាក់ទណ្ឌកម្ម នៅថ្ងៃទី ១ ខែមីនាឆ្នាំ ២០១៨ ។ នេះបើតាមរបាយការណ៍រដ្ឋាភិបាលកម្ពុជា។
ចំណងការទូតរវាងកម្ពុជា និងកូរ៉េខាងជើង
ដ្បិតកម្ពុជា មានការអនុវត្តវិធានការតឹងរ៉ឹងបែបនេះ ទៅកាន់រដ្ឋាភិបាលព្យុងយ៉ាងក្តី ក៏ភាគីទាំងពីរនៅតែប្រកាសពីការរក្សាទំនាក់ទំនងល្អជាមួយគ្នា។ ជាក់ស្ដែងនៅក្នុងឆ្នាំ២០១៩ អនុរដ្ឋមន្ត្រីក្រសួងការបរទេសកូរ៉េខាងជើងលោក Ri Kil Song បានមកបំពេញទស្សនកិច្ចនៅកម្ពុជា មុនពេលដែលប្រតិភូគណបក្សប្រជាជនកម្ពុជា បានទៅប្រទេសកូរ៉េខាងជើងវិញ នៅខែវិច្ឆិកាឆ្នាំមុន។ ជាមួយគ្នានេះ ប្រមុខរដ្ឋប្រទេសទាំងពីរ ក៏បានផ្ញើសារទៅវិញទៅមក ដោយបានលើកឡើងពីទំនាក់ទំនងជាប្រពៃណីនៃប្រវត្តិសាស្ត្រ និងកិច្ចសហប្រតិបត្តិការទ្វេរភាគី ក្នុងនាមជាមិត្តភក្តិជាដើម។
គួរបញ្ជាក់ថា ទំនាក់ទំនងរវាងប្រទេសកម្ពុជា និងប្រទេសកូរ៉េខាងជើង បានចាប់ផ្ដើមឡើងនៅក្នុងឆ្នាំ ១៩៦៥ ដែលកាលណោះព្រះបរមរតនកោដ្ឋ នរោត្តម សីហនុ បានជួបជាមួយលោក គីម អ៊ីលស៊ុង នៅក្នុងទីក្រុង ហ្សាការតា ប្រទេសឥណ្ឌូណេស៊ី។ ហើយនៅឆ្នាំ១៩៧០ ក្រោយពីសម្ដេចនរោត្តម សីហនុ ត្រូវបានសេនាប្រមុខ លន់ នល់ ធ្វើរដ្ឋប្រហារទម្លាក់ចេញពីតំណែងនោះ ព្រះអង្គក៏បាននិរទេសព្រះកាយ យាងទៅរស់នៅប្រទេសកូរ៉េខាងជើង ដោយរដ្ឋាភិបាលកូរ៉េ បានកសាងព្រះរាជដំណាក់មួយថ្វាយជូនព្រះបរមរតនកោដ្ឋ ដែលមានឈ្មោះថា Changsuwon នៅជិតទីក្រុងព្យុងយ៉ាងផងដែរ៕