កីឡាអន្តរជាតិ
អន្តរជាតិ
ករណីរើសអើងពូជសាសន៍៖ FIFPRO គាំទ្រកីឡាករដើរចេញពីទីលាន Moussa Marega ខ្សែប្រយុទ្ធក្រុម FC Porto ដែលទទួលការប្រមាថពីក្រុមអ្នកគាំទ្រកន្លងមក
× សហព័ន្ធកីឡាករបាល់ទាត់អាជីពពិភពលោក (FIFPRO) នៅថ្ងៃទី១៧ កុម្ភៈ ថា ខ្លួនគាំទ្រកីឡាករ ឬក្រុមកីឡាណាដែលដើរចេញពីទីលាន ក្នុងករណីមានការរើសអើងជាតិសាសន៍កើតឡើង។ FIFPRO អះអាងបែបនេះ ក្រោយមានការរើសអើងកើតឡើងលើកីឡាករ Moussa Marega ខ្សែប្រយុទ្ធ FC Porto អំឡុងការប្រកួតក្របខណ្ឌលីគកំពូលព័រទុយហ្កាល់កាលពីចុងសប្តាហ៍។
ខ្សែប្រយុទ្ធសញ្ជាតិម៉ាលី Moussa Marega បានរងការរំលោភបំពានយ៉ាងធ្ងន់ធ្ងរ តាមរយៈសម្រែក «រើសអើងពូជសាសន៍» ពីសំណាក់ក្រុមអ្នកគាំទ្រនៅទីលានរបស់ក្រុម Vitoria Guimaeres នាជំនួបដែល Porto យកឈ្នះ ២-១។ ភ្លាមៗក្រោយលឺសំឡេងស្រែកបែបនោះ Marega ក៏បានដើរចេញពីទីលានទាំងខឹងសម្បា បើទោះបីមិត្តរួមក្រុម និងកីឡាករ Vitoria ព្យាយាមឃាត់រូបគេក្តី។
ក្នុងករណីរើសអើងបែបនេះ FIFPRO បានផ្តល់ការគាំទ្រយ៉ាងពេញទំហឹងសម្រាប់កីឡាករដែលដើរចេញពីទីលាន។ ស្ថាប័នកីឡាដ៏ធំមួយនេះក៏បានបញ្ជាក់ទៀតថា នេះជាលើកទី១ហើយដែលខ្លួនបានគាំទ្រសម្រាប់សកម្មភាពបែបនេះ។
«ដោយសារការអនុវត្តវិធានការណ៍ក្នុងការការពារកីឡាករបាល់ទាត់អាជីពហាក់មិនទាន់មានផ្លែផ្កា FIFPRO នឹងគាំទ្រយ៉ាងពេញទំហឹងចំពោះកីឡាករ និងក្រុមដែលសម្រេចចិត្តដើរចេញពីទីលាន ហើយថែមទាំងនឹងផ្តល់ជំនួយដល់កីឡាករទាំងនោះតាមវិធីចាំបាច់ទៀតផង។ យើងពិតជាមានការព្រួយបារម្ភខ្លាំងចំពោះសុខុមាលភាពរបស់កីឡាករដែលទទួលរងការរើសអើងពណ៌សម្បុរប្រភេទនេះ»។ នេះជាការលើកឡើងរបស់ FIFPRO។
ស្ថាប័នគ្រប់គ្រងកីឡាករបាល់ទាត់អាជីពពិភពលោកមួយនេះ បន្តថាករណីរើសអើងជាច្រើនបានកើតឡើងនាពេលថ្មីៗនេះ ស្របពេលវិធីសារក្នុងការប្រឆាំងនឹងការរើសអើងពូជសាសន៍ក្នុងបាល់ទាត់នៅមិនទាន់បានអនុវត្តគ្រប់គ្រាន់នៅឡើយទេ ហើយក៏មិនមានគោលដៅច្បាស់លាស់សម្រាប់ការប្រឆាំងនឹងទង្វើបែបនេះដែរ៕
Tag:
FIFPRO
Moussa Marega
FC Porto
© រក្សាសិទ្ធិដោយ thmeythmey.com