អន្តរជាតិ
ជប៉ុនបញ្ចប់ការធ្វើរោគវិនិច្ឆ័យលើអ្នកដំណើរលើ Diamond Princess ខណៈអ្នកជំងឺមាន៥៤២នាក់
នាវាទេសចរណ៍ Diamond Princess។ រូបភាព៖ AP
×![]()
ដោយ: ធៀន ភារិន្ទ
អ្នកដំណើរ និងបុគ្គលិកលើនាវា Diamond Princess ត្រូវបានគេធ្វើរោគវិនិច្ឆ័យរកមើល COVID-19រួចរាល់អស់ហើយ។ ចំណែកអ្នកដែលបាននិយាយជាមួយអ្នកផ្ទុក COVIN-19 នឹងត្រូវគេដាក់នៅក្នុងមជ្ឈមណ្ឌលចត្តាឡីស័កសារជាថ្មី ហើយបុគ្គលិកនាវា នឹងត្រូវគេតាមដានបន្តទៀត។ នេះបើតាមការបញ្ជាក់របស់រដ្ឋាភិបាលជប៉ុន នៅថ្ងៃទី១៨ ខែកុម្ភៈ ខណៈពេលប្រទេសជាច្រើន បានជម្លៀស និងត្រៀមជម្លៀសប្រជាជនចេញពីនាវាទេសចរណ៍មួយគ្រឿងនេះ។ 
រដ្ឋមន្ត្រីសុខាភិបាលជប៉ុន លោក Katsunobu Kato ប្រាប់អ្នកកាសែតថា ជប៉ុន បានធ្វើរោគវិនិច្ឆ័យលើមនុស្សក្នុងនាវាទេសចរណ៍រួចរាល់អស់ហើយ មានអ្នកដំណើរខ្លះ ក៏បានចាកចេញពីនាវា ហើយមានអ្នកខ្លះ ក៏បានចេញលទ្ធផលមកច្បាស់លាស់ដែរ។ បើតាមលោករដ្ឋមន្ត្រី កិច្ចការបន្ទាប់ គឺជាការរៀបចំជម្លៀសមនុស្សចេញពីនាវា។ ក្នុងន័យនេះ ជប៉ុនអនុញ្ញាតឲ្យអ្នកគ្មាន COVID-19 តែប៉ុណ្ណោះ ទើបអាចចាកចេញពីនាវានៅថ្ងៃទី១៩ ខែកុម្ភៈ។ កិច្ចការឲ្យមនុស្សចាកចេញពីនាវានេះ អាចប្រើរយៈពេលពីរ ឬបីថ្ងៃ។
យ៉ាងណាក៏ដោយ ការអនុញ្ញាតឲ្យមនុស្សចាកចេញពីនាវាទេសចរណ៍ Diamond Princess មិនមែនធ្វើឡើងទាំងអស់នោះទេ ដោយមានករណីលើកលែងមួយចំនួន។ ក្នុងនោះ បុគ្គល ដែលធ្លាប់បាននិយាយទាក់ទងជាមួយអ្នកជំងឺ COVID-19 ក្នុងនាវា ត្រូវគេដាក់ចត្តាឡីស័កឡើងវិញ ដោយចាប់គិតពីថ្ងៃ ដែលបុគ្គលនោះ បាននិយាយជាមួយអ្នកជំងឺ។ បន្ថែមពីលើនេះ កងនាវិក ក៏ត្រូវបានរំពឹងថា នឹងត្រូវគេដាក់ចត្តាឡីស័កសាឡើងវិញផងដែរ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
គិតត្រឹមថ្ងៃនេះ នាវា Diamond Princess ត្រូវបានគេរកឃើញមាន COVID-19 រហូតដល់ ៥៤២ករណីឯណោះ។ ពាក់ព័ន្ធនឹងករណីឆ្លងបែបនេះហើយ ប្រទេសមួយចំនួនដូចជា កូរ៉េខាងត្បូង អូស្ត្រាលី កាណាដា បានគ្រោងជម្លៀសប្រជាពលរដ្ឋរបស់ខ្លួន ដែលជាប់នៅលើនាវានេះជាបន្តបន្ទាប់។ អាមេរិក ដឹកប្រជាជនខ្លួនចេញខ្លះហើយដែរ៕
Tag:
ជប៉ុន
COVID19
© រក្សាសិទ្ធិដោយ thmeythmey.com
