អន្តរជាតិ
ជប៉ុន អនុញ្ញាតឲ្យអ្នកដំណើរចាកចេញពីនាវា Diamond Princess នាវាទេសចរណ៍ Diamond Princess។ រូបភាព៖ EPA
× ជប៉ុន នៅថ្ងៃទី១៩ ខែកុម្ភៈ អនុញ្ញាតឲ្យអ្នកដំណើរចាកចេញពីនាវាDiamond Princess បណ្តើរៗ បន្ទាប់ពីដាក់ចត្តាឡីស័កអស់រយៈពេល ១៤ថ្ងៃ។ មុននឹងចាកចេញ អ្នកដំណើរទាំងអស់ ត្រូវត្រួតពិនិត្យមើលជាលើកចុងក្រោយដោយក្រុមវេជ្ជបណ្ឌិត ដើម្បីធានាថាគ្មានជំងឺ COVID-19 សំដៅទប់ស្កាត់ករណីឆ្លង។
បន្ទាប់ពីឃាត់ទុកតាំងពីថ្ងៃទី៣ ខែកុម្ភៈ និងដាក់ចត្តាឡីស័ករយៈពេល ១៤ថ្ងៃ ពេលនេះជប៉ុន អនុញ្ញាតឲ្យអ្នកដំណើរទាំងអស់ចាកចេញពីនាវាទេសចរណ៍ Diamond Princess។ ជប៉ុនត្រូវប្រើរយៈពេល ៣ថ្ងៃ ដើម្បីត្រួតពិនិត្យអ្នកដំណើរ មុននឹងអនុញ្ញាតឲ្យចាកចេញពីនាវា។ មនុស្សចាស់ប្រមាណ ៥០០នាក់ គឺជាអាទិភាព ក្នុងការជម្លៀសចេញពីនាវា ប៉ុន្តែអ្នកទាំងនោះត្រូវតែគ្មាន COVID-19 និងមានការពិនិត្យយ៉ាងត្រឹមត្រូវពីសំណាក់ក្រុមវេជ្ជបណ្ឌិត ទើបអាចចាកចេញបាន។
មន្ត្រីជប៉ុនប្រាប់អ្នកដំណើរតាមក្រដាសព័ត៌មានថា «បើអ្នក និងអ្នករួមបន្ទប់ជាមួយអ្នក គ្មានផ្ទុកCOVID-19 និងក្តៅខ្លួនទេ អ្នកអាចរៀបចំក្នុងការចាកចេញពីនាវានេះបាន»។ ក្នុងរយៈពេលរង់ចាំធ្វើតេស្តលទ្ធផលចុងក្រោយនេះ គឺជារយៈពេលដ៏យូរមួយសម្រាប់អ្នកដំណើរទាំងអស់ ដែលចង់ចាកចេញពីនាវា។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
នាវា Diamond Princess ត្រូវបានជប៉ុនឃាត់ទុកតាំងពីថ្ងៃទី៣ ខែកុម្ភៈ មកម្លេះ នាកំពង់ផែ Yokohama បន្ទាប់ពីជប៉ុនរកឃើញបុរសហុងកុងម្នាក់មានផ្ទុកCOVID-19។ ចាប់តាំងពីឃុំឃាំង នាវាទេសចរណ៍ដែលមានមនុស្សប្រមាណ ៣៧០០នាក់រួចមក ជប៉ុនបានរកអ្នកផ្ទុកកូរ៉ូណាវីរុសជាបន្តបន្ទាប់ និងកើនឡើងពីមួយថ្ងៃទៅមួយថ្ងៃ។ គិតត្រឹមថ្ងៃទី១៨ ខែកុម្ភៈ គេរកឃើញ COVID-19 នៅក្នុងនាវាទេសចរណ៍មួយគ្រឿងនេះ កើនដល់ចំនួន ៥៤២ករណី។
ពាក់ព័ន្ធនឹងបញ្ហានេះ ប្រទេសមួយចំនួន ដែលមានពលរដ្ឋខ្លួនក្នុងនាវា Diamond Princess បានជម្លៀសពលរដ្ឋរបស់ខ្លួន និងគ្រោងជម្លៀសពលរដ្ឋរបស់ខ្លួន។ តួយ៉ាងអាមេរិក និងកូរ៉េខាងត្បូង បានជម្លៀសពលរដ្ឋខ្លួន បានមួយចំនួនហើយ ចំណែកកាណាដា និងអូស្ត្រាលី គ្រោងជម្លៀសប្រជាពលរដ្ឋរបស់ខ្លួន។
សូមបញ្ជាក់ថា នាវា Diamond Princess បានចាកចេញពីកំពង់ផែ Yokohama នាថ្ងៃទី២០ ខែមករា និងបានធ្វើដំណើរទៅហុងកុង វៀតណាម និងតៃវ៉ាន់ មុនពេលត្រលប់មកកំពង់ផែ Yokohama វិញ នៅថ្ងៃទី៣ ខែកុម្ភៈ៕
© រក្សាសិទ្ធិដោយ thmeythmey.com