អន្តរជាតិ
COVID-19៖ ប្រមុខ WHO សរសើរសិង្ហបុរីចំពោះចំណាត់ការច្បាស់លាស់ និងមិនមើលស្រាលស្ថានការណ៍
អគ្គនាយកអង្គការសុខភាពពិភពលោកTedro Adhanom Ghebreyesus (ឆ្វេង) និងនាយករដ្ឋមន្ត្រីសិង្ហបុរី លី សៀនឡុង (AFP)
×![]()
ប្រមុខដឹកនាំអង្គការសុខភាពពិភពលោក (WHO) លើកសរសើរចំពោះកិច្ចប្រឹងប្រែងរបស់រដ្ឋាភិបាលសិង្ហបុរីក្នុងការដោះស្រាយករណីកូរ៉ូណាវីរុស (COVID-19)។ ទន្ទឹមនេះលោកបានអរគុណដល់រដ្ឋមន្ត្រីសុខាភិបាលសិង្ហបុរីចំពោះភាពដឹកនាំលើការត្រៀមលក្ខណៈទប់ទល់វីរុសឆ្លងនេះដោយមិនមានការមើលស្រាលស្ថានការណ៍។ 
«យើង ពិតជាភ្ញាក់ផ្អើលជាខ្លាំងចំពោះកិច្ចប្រឹងប្រែងដែលពួកគេ (អាជ្ញាធរសិង្ហបុរី) កំពុងធ្វើដើម្បីស្វះស្វែងរករាល់ករណីឆ្លង (COVID-19), យកចិត្តទុកដាក់មើលថែ និងបញ្ឈប់ការឆ្លង»។ លោកអគ្គនាយកអង្គការសុខភាពពិភពលោក Tedro Adhanom Ghebreyesus បញ្ជាក់បែបនេះ លើបណ្ដាញសង្គម Twitter នៅថ្ងៃអង្គារ ១៨ ខែកុម្ភៈ។
លោក Tedro បញ្ជាក់បន្តថា សិង្ហបុរី សាកល្បងគ្រប់មធ្យោបាយដែលពួគគេអាចដើម្បីសម្រេចរឿងនេះ ដូចជា ការធ្វើតេស្តលើរាល់ករណីឈឺពាក់ព័ន្ធនឹងផ្ដាសាយ និងផ្លូវដង្ហើម ។ ត្រង់នេះ លោក សង្កត់ធ្ងន់ថា ជាលទ្ធផល អាជ្ញាធរសុខាភិបាលសិង្ហបុរី ពុំបានរកឃើញករណីឆ្លងតាមរយៈសហគមន៍ពួកគេឡើយ។
ប្រមុខអង្គការអន្តរជាតិរូបនេះ អះអាងទៀតថា លោកបានជជែកពិភាក្សាជាមួយរដ្ឋមន្ត្រីសុខាភិបាលសិង្ហបុរី Gan Kim Yong កាលពីថ្ងៃចន្ទ ១៧ ខែកុម្ភៈ ដោយនិយាយអរគុណដល់រដ្ឋមន្ត្រីសម្រាប់ការដឹកនាំលោកលើការត្រៀមលក្ខណៈ។
សូមបញ្ជាក់ថា បច្ចុប្បន្ន សិង្ហបុរី បានរកឃើញករណីឆ្លង COVID-19 ៨១នាក់ ដែលក្នុងនោះ គិតត្រឹមយប់ថ្ងៃអង្គារ ១៨ ខែកុម្ភៈ អ្នកជំងឺ ២៩នាក់ បានជាសះស្បើយ ហើយអនុញ្ញាតឲ្យចេញពីមន្ទីរពេទ្យ។ ដោយមើលឃើញការលំបាករបស់ពលរដ្ឋ អាជ្ញាធរសិង្ហបុរី បានបញ្ចេញលុយជាង១ពាន់លានដុល្លារដើម្បីជួយលើការចំណាយពួកគេ៕
Tag:
សិង្ហបុរី
ម៉ាឡេស៊ី
កម្ពុជា
កូរ៉ូណាវីរុស
COVID-19
© រក្សាសិទ្ធិដោយ thmeythmey.com
