ជាតិ
អ្នកលក់អនឡាញសិចស៊ី ថៃ ស្រីនាង៖ សូមបងប្អូនតាមហ្វេកប៊ុក កុំយកគំរូតាមនាងខ្ញុំ!
×![]()
ភ្នំពេញ៖ ស្ត្រីម្នាក់ឈ្មោះ វ៉ាន់ រចនា ដែលគេស្គាល់តាមហ្វេសប៊ុកថា «ថៃ ស្រីនាង» បានក្លាយជាមនុស្សដំបូងដែលត្រូវបានហៅទៅអប់រំ ដោយសារការបង្ហោះរូបភាព និងវីដេអូដ៏សិចស៊ីរបស់ខ្លួនជ្រុលហួសហេតុ នៅពេល Live ហ្វេសប៊ុកលក់សម្លៀកបំពាក់។ នេះជាចំណាត់ការដែលអធិការដ្ឋាននគរបាលខណ្ឌទួលគោក បានអនុវត្ត នារយៈពេល២ថ្ងៃក្រោយពេលដែលសម្តេចនាយករដ្ឋមន្ត្រី ហ៊ុន សែន បានព្រមានបិទហ្វេសប៊ុកណាដែលលក់ផលិតផល ជាមួយនឹងការបញ្ចេញកេរខ្មាស។
«នាងខ្ញុំសូមធ្វើការសុំទោសជាសាធារណៈដែលកន្លងមកនាងខ្ញុំបានបង្ហោះរូប-វីដេអូសិចស៊ី ធ្វើឲ្យប៉ះពាល់ដល់ប្រពៃណី និងកិត្តិយសរបស់ស្ត្រីខ្មែរ។ នាងខ្ញុំសូមសន្យាថា នឹងឈប់បង្ហោះរូបភាព-វីដេអូស៊ិចស៊ី និងសូមអំពាវនាវដល់បងប្អូននៅតាមបណ្ដាញសង្គមហ្វេកប៊ុកទាំងអស់កុំយកគំរូតាមនាងខ្ញុំ»។ ស្នងការដ្ឋាននគរបាលរាជធានីភ្នំពេញ បានបង្ហោះវីដេអូរយៈពេលជាង១នាទី ដែល ថៃ ស្រីនាង បានសុំទោស នាថ្ងៃទី១៩ ខែកុម្ភៈ នេះ។
លោកវរសេនីយ៍ទោ សុខ ហេង អធិការនគរបាលខណ្ឌទួលគោក បានបញ្ជាក់ឲ្យដឹងថា ថៃ ស្រីនាង ដែលតែងតែបង្ហោះរូបភាព និងវីដេអូឃ្លីប លក់សម្លៀកបំពាក់ សិចស៊ីជ្រុលហួសហេតុ ដែលធ្វើឲ្យប៉ះពាល់យ៉ាងខ្លាំងដល់ទំនៀមទំលាប់ប្រពៃណី និងកិត្តិយសរបស់ស្ត្រីខ្មែរ។
តារាដែលល្បីល្បាញពេញបណ្តាញសង្គមហ្វេសប៊ុករូបនេះ ត្រូវបាននាំខ្លួនទៅអធិការដ្ឋាននគរបាលខណ្ឌទួលគោក ដើម្បីទទួលការអប់រំ ណែនាំ និងធ្វើកិច្ចសន្យា ជាមួយនឹងវីដេអូសុំទោសជាសាធារណៈ។
សូមជម្រាបថា កាលពីថ្ងៃទី១៧ ខែកុម្ភៈ សម្តេចនាយករដ្ឋមន្ត្រី ហ៊ុន សែន បានបញ្ជាទៅក្រសួងប្រៃសនីយ៍ និងទូរគមនាគមន៍ ឲ្យបិទគណនី និង ទំព័រហ្វេសប៊ុក ឬបណ្តាញសង្គមផ្សេងទៀត ដែលផ្សាយលក់ផលិតផល ដោយការបញ្ចេញកេរខ្មាស៕
Tag:
ថៃ ស្រីនាង
អនឡាញ
© រក្សាសិទ្ធិដោយ thmeythmey.com
