អន្តរជាតិ
តុលាការឧទ្ធរណ៍កូរ៉េខាងត្បូង សម្រេចឲ្យអតីតប្រធានាធិបតី លី ម្យុងបាក់ ជាប់គុក១៧ឆ្នាំ អតីតប្រធានាធិបតីកូរ៉េខាងត្បូង Lee Myung-bak ដើរចូលទៅក្នុងការិយាល័យរបស់ព្រះរាជអាជ្ញា នាថ្ងៃទី១៤ ខែមីនា ឆ្នាំ២០១៨។ រូបភាព៖ EPA-EFE
× តុលាការឧទ្ធរណ៍ នៅថ្ងៃទី១៩ ខែកុម្ភៈ បានកាត់ទោសអតីតប្រធានាធិបតីកូរ៉េខាងត្បូង លី ម្យុងបាក់ (Lee Myung-bak) ឲ្យជាប់ពន្ធនាគារយៈពេល១៧ឆ្នាំ ពីបទទទួលសំណូក និងបង្វែរទឹកប្រាក់ខុសច្បាប់។ ការសម្រេចចិត្តរបស់តុលាការជាន់ខ្ពស់លើកនេះ គឺវាខ្ពស់ជាងសេចក្តីសម្រេចរបស់តុលាការជាន់ទាប ដែលបានចេញកាលពីខែតុលា ឆ្នាំ២០១៨ ហើយដែលលោក លី តវ៉ា។
អតីតប្រធានាធិបតីកូរ៉េខាងត្បូង លោក Lee Myung-bak ដែលបានកាន់តំណែងចាប់ពីឆ្នាំ ២០០៨ ដល់ ឆ្នាំ ២០១៣ ត្រូវបានតុលាការជាន់ទាបកាត់ទោសឲ្យជាប់ពន្ធនាគាររយៈពេល ១៥ឆ្នាំម្តងរួចមកហើយ។ ប៉ុន្តែអតីតប្រធានាធិបតីវ័យ ៧៨ឆ្នាំរូបនេះ ត្រូវបានគេអនុញ្ញាតឲ្យនៅក្រៅឃុំវិញ នាខែមីនា ឆ្នាំ ២០១៩ ដោយសារបញ្ហាសុខភាព ខណៈបានប្ដឹងទៅកាន់សាលាឧទ្ធរណ៍ដើម្បីជំទាស់ការកាត់ទោសនេះ។
ប៉ុន្តែពេលនេះ លោកត្រូវជាប់ពន្ធនាគារច្រើនជាងមុន ដោយសារសេចក្តីសម្រេចរបស់តុលាការឧទ្ធរណ៍។ ក្នុងសាលដីកាលើកនេះ អតីតប្រធានាធិបតី ត្រូវបានតុលាការកាត់ទោសឲ្យជាប់ពន្ធនាគាររយៈពេល ១៧ឆ្នាំ ទាមទារសំណងចំនួនជិត ១១លានដុល្លារ និងរឹបអូសទ្រព្យសម្បត្តិជាង ៤លានដុល្លារ។ តុលាការឧទ្ធរណ៍ បានចោទលោក លី ពីបទទទួលសំណូក និងបង្វែងទឹកប្រាក់ខុសច្បាប់។
យ៉ាងណាក៏ដោយ លោក Lee បានបដិសេធមិនទទួលកាតព្វកិច្ច ការទទួលខុសត្រូវ និងអំពើខុសច្បាប់របស់ខ្លួនដូចជាការទទួលសំណូកពីមន្ត្រីសាធារណៈ និងក្រុមហ៊ុនឯកជនជាដើម។ បន្ថែមពីលើនេះ លោកក៏បានបដិសេធម្តងហើយម្តងទៀតថា លោកក៏មិនមែនជាម្ចាស់ពិតប្រាកដរបស់ក្រុមហ៊ុនDAS ដែលជាក្រុមហ៊ុនផលិតគ្រឿងបន្លាស់រថយន្តផងដែរ។
បើតាមការរកឃើញរបស់តុលាការជាន់ទាបកន្លងទៅ លោក Lee គឺជាម្ចាស់ពិតប្រាកដរបស់ក្រុមហ៊ុន DAS និងបានប្រើអំណាចជាប្រធានាធិបតី ដើម្បីបម្រើផលប្រយោជន៍ក្រុមហ៊ុន និងរូបលោកផ្ទាល់ ជាពិសេសលោក Lee ថែមទាំងទទួលសំណូកពីក្រុមហ៊ុន Samsung ថែមទៀត។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។
នាខែមករាកន្លងទៅ រដ្ឋអាជ្ញាអមសាលាឧទ្ធរណ៍ បានទាមទារឲ្យតុលាការឧទ្ធរណ៍ដាក់ទោសអតីតប្រធានាធិបតីរូបនេះរហូតដល់ ២៣ឆ្នាំឯណោះ ដោយសារលោក លី មិនទទួលខុសត្រូវលើបញ្ហានេះ បូករួមទាំងការទម្លាក់កំហុសលើអ្នកដទៃ។
សូមបញ្ជាក់ថា តុលាការឧទ្ធរណ៍បានរកឃើញថា លោក លី បានបង្វែរទឹកប្រាក់ពីក្រុមហ៊ុន DAS រហូតដល់ជាង ២១លានដុល្លារ និងលុយសំណូកជិត ៨លានដុល្លារ ដែលចំនួននេះលើពីការរកឃើញរបស់តុលាការជាន់ទាបឆ្ងាយណាស់ ។ កន្លងទៅ តុលាការជាន់ទាប បានរកឃើញថា លោក លី បានបង្វែរប្រាក់ពីក្រុមហ៊ុន DAS ចំនួនជាង ២០លានដុល្លារ និងទទួលប្រាក់សំណូកជាង ៧លានដុល្លារ៕
© រក្សាសិទ្ធិដោយ thmeythmey.com