កីឡាអន្តរជាតិ
អន្តរជាតិ
Son របួសដៃត្រូវអវត្តមានដល់ចប់រដូវកាល ខណៈ Spurs ត្រូវប្រជែង Top4 និង UCL
×![]()
ដោយ: ទេព ពិទូរ្យ
Son Heung-min តារាឆ្នើមរបស់ Tottenham Hotspur បានរងរបូសបាក់ដៃខាងស្តាំអំឡុងជំនួបជាមួយ Aston Villa កន្លងទៅ។ របួសនេះទំនងធ្វើឲ្យរូបគេមិនអាចបង្ហាញខ្លួនសម្រាប់ប្រកួតដែលនៅសល់រដូវកាលនេះ ដែលធ្វើឲ្យប៉ះពាល់ធ្ងន់ធ្ងរដល់ Spurs ក្នុងការប្រជែងយកកៅអីលេង UEFA Champions League រដូវកាលក្រោយ។
ខ្សែប្រយុទ្ធអន្តរជាតិកូរ៉េខាងត្បូងវ័យ ២៧ ឆ្នាំរូបនេះបានស៊ុត២គ្រាប់ម្នាក់ឯងដើម្បីជួយ Spurs យកឈ្នះ Aston Villa ៣-២ ក្នុងការប្រកួតសប្តាហ៍ទី២៦ ក្របខណ្ឌ Premier League នាថ្ងៃទី១៦ កុម្ភៈ។
តាមពិតទៅ Son បានរងរបួសតាំងពីការប្រកួតទើបចាប់ផ្តើមបាន១នាទីម្លេះ បន្ទាប់ពីប្រជែងគ្នាយ៉ាងស្វិតស្វាញជាមួយកីឡាករ Ezri Konsa របស់ Aston។ ទោះបីរងរបួសដៃតែរូបគេនៅតែអាចជួយក្រុមដែលដឹកនាំដោយអ្នកចាត់ការ Jose Mourinho លេងរហូតបញ្ចប់ការប្រកួតពេញ៩០នាទី។
«Son Heung-min នឹងត្រូវវះកាត់នៅសប្តាហ៍នេះបន្ទាប់ពីរងរបួសបាក់ឆ្អឹងដៃស្តាំ»។ នេះជាការបញ្ជាក់របស់ក្លិប Spurs នៅថ្ងៃទី១៨ កុម្ភៈ ដោយបន្ថែមថា៖«បន្ទាប់ពីការវះកាត់បុគ្គលិកពេទ្យនឹងត្រូវពិនិត្យ Son ឡើងវិញម្តងទៀតដែលត្រូវចំណាយពេលសម្រាកជាច្រើនសប្តាហ៍»។
ក្នុងរដូវកាល ២០១៩-២០នេះ ម្ចាស់ជ័យលាភីកីឡាករបាល់ ទាត់ល្អបំផុតប្រចាំតំបន់អាស៊ី បានរកគ្រាប់ស៊ុតបញ្ចូលទី១៤គ្រាប់ និងបញ្ជូនបាល់ឲ្យដៃគូសម្រេចទី៨លើក គិតទាំងក្នុងលីគនិង Champions League។
ជាមួយគ្នានេះ អ្នកចាត់ការទូទៅលោក Mourinho មិនរំពឹងថាខ្សែប្រយុទ្ធកំពុងលេចធ្លោរូបនេះនឹងអាចបង្ហាញខ្លួននៅរដូវកាលនេះទៀតឡើយ។ បុរសសញ្ជាតិព័រទុយហ្គាល់បានប្រាប់អ្នកសាព័ត៌មានក្នុងសន្និសីទសារព័ត៌មានដូច្នេះថា៖«ខ្ញុំមិនពឹងផ្អែកទាំងស្រុងលើ Son ទៀតទេនៅរដូវកាលនេះ។ ប្រសិនបើគាត់លេងបានតែ ២ ឬ៣ ប្រកួតអញ្ចឹងគឺមិនអាចពឹងលើគាត់ឡើយ។
របួសរបស់ Son នឹងជះឥទ្ធិពលអាក្រក់ដល់ក្រុមរហស្សនាមមាន់ខ្លាយមាសក្នុងការប្រកួតក្របខណ្ឌអឺរ៉ុប និងក្របខណ្ឌលីគក្នុងស្រុករដូវកាលនេះ ស្រពេលខ្សែប្រយុទ្ធឆ្នើម Harry Kane ក៏កំពុងតែមានរបូសសរសៃពួររហូតដល់ខែមេសាទើបអាចចូលលេងវិញបាន។
Spur កំពុងប្រជែងយកចំណាត់ថ្នាក់ Top 4 ដើម្បីបានកៅអី Champions League រដូវកាលក្រោយ ដោយសព្វថ្ងៃឈរចំណាត់ថ្នាក់ទី៥ មាន៤០ពិន្ទុ តាមពីក្រោយក្រុមលេខ៤ Chelsea ចំនួន១ពិន្ទុ៕
Tag:
Tottenham Hotspur
Son Heung-min
© រក្សាសិទ្ធិដោយ thmeythmey.com
