កីឡាអន្តរជាតិ
អន្តរជាតិ
×![]()
ដោយ: ទេព ពិទូរ្យ
អ្នកប្រណាំងក្របីម្នាក់នៅប្រទេសឥណ្ឌា ត្រូវបានប្រៀបធៀបជាមួយកំពូលកីឡាកររត់ប្រណាំងអូឡាំពិក Usain Bolt បន្ទាប់ពីរូបគេ រត់ក្នុងវាលស្រែជាមួយក្របីក្នុងល្បឿនដ៍លឿន។
Srinivas Gowda រត់ពីក្រោយក្របីចំនួន២ក្បាលបានរយៈចម្ងាយ ១៤២,៥ ម៉ែត្រ ដោយប្រើរយៈពេល ១៣,៦២វិនាទី ក្នុងកម្មវិធីប្រណាំងក្របីប្រចាំឆ្នាំបែបប្រពៃណីនៅប្រទេសឥណ្ឌាមានឈ្មោះថា Kambala ដែលប្រព្រឹត្តិទៅ កាលពីថ្ងៃទី៣១ មករា។ ដោយសាររត់បានល្បឿនលឿនបែបនេះ Gowda បង្កើតបានកំណត់ត្រាមួយក្នុងកម្មវិធីនោះ។
ការរត់របស់ Gowda នេះមាន័យថាស្មើនឹងការរត់១០០ម៉ែត្រ ក្នុងថេរវេលា៩,៥៥វិនាទី បើប្រៀបធៀបនឹងកំណត់ត្រាពិភពលោកគឺ ៩,៥៨វិនាទី ដែលធ្វើបានដោយអតីតកំពូលអ្នករត់ប្រណាំងសញ្ជាតិហ្សាម៉ាអ៊ិក Usain Bolt។ Bolt វ័យ៣៣ឆ្នាំ ដែលមានរហ្សនាមស្តេចល្បឿននិងបានចូលនិវត្តន៍ទៅហើយ ធ្លាប់ជាម្ចាស់មេដាយមាសរត់ចម្ងាយអូឡាំពិកយ៉ាងច្រើន។
សម្រាប់បុរសជនជាតិឥណ្ឌា Gowda វិញ ក្រោយបង្ហាញទេពកោសល្យ រូបគេទទួលបានកិត្តិពីកម្មវិធី និងទទួលបានការអញ្ជើញពីរដ្ឋមន្ត្រីកីឡាឥណ្ឌាដើម្បីឲ្យរូបគេចូលរួមក្នុងការសាកល្បងសមត្ថភាពផង។
ម្យ៉ាងវិញទៀត បើយោងតាមប្រព័ន្ធផ្សព្វផ្សាយក្នុងស្រុក លោក Nishant Shetty ដែលជាម្ចាស់ក្របីអះអាងថា ក្របីរបស់លោកបានរំខាន់ដល់ការរត់របស់ Gowda ផង បើមិនដូចឆ្នោះទេរូបគេនឹងរត់បានលឿនជាងនេះទៅទៀត។
Kambala គឺជាពិធីបុណ្យប្រចាំឆ្នាំមួយក្នុងវិស័យកសិកម្មដែលធ្វើឡើងនៅរដូវរងារ ក្នុងរដ្ឋ Karnataka ប្រទេសឥណ្ឌា ហើយអ្នកដែលចូលរួមប្រកួតសុទ្ធតែជាអ្នកជោគជាំជាមួយភក់ក្នុងវាលស្រែ និងក្របីតាំងពីក្មេងមក។
បុរស Gowda ដែលបានជួបជាមួយរដ្ឋមន្ត្រីរដ្ឋ Karnataka នៅថ្ងៃទី១៧ កុម្ភៈ បានបដិសេធទៅសាកល្បងសមត្ថភាព ដោយលើកហេតុផលថារូបគេផ្តោតអារម្មណ៍លើកីឡារបស់គេនេះទេ ហើយបន្ថែមថាកម្មវិធី Kambala និងព្រឹត្តិការណ៍ផ្សេងទៀតគឺខុសគ្នា៕
Tag:
Usain Bolt
Srinivas Gowda
© រក្សាសិទ្ធិដោយ thmeythmey.com
