ជាតិ
គណៈកម្មាធិការសិទ្ធិមនុស្ស បង្ហាញពីលទ្ធផលស៊ើបអង្កេតករណីស្លាប់ទារិកាអាយុ៥ខែ
×![]()
គណៈកម្មាធិការសិទ្ធិមនុស្សកម្ពុជា បានចាត់មន្ត្រីខ្លួន ឲ្យចុះទៅស៊ើបអង្កេតនៅមជ្ឈមណ្ឌលកែប្រែទី២(ព្រៃស) ក្រោយមានករណីស្លាប់ទារិកាអាយុ៥ខែ។ លទ្ធផលបានបង្ហាញថា ទារិកានោះពិតជាស្លាប់ដោយសាររលាកសួតធ្ងន់ធ្ងរ ប៉ុន្តែជាមួយគ្នានេះ គណៈកម្មាធិការសិទ្ធិមនុស្ស បានសម្រេចផ្តល់មេធាវីជួនដល់ស្ត្រីជាប់ឃុំដែលជាម្តាយរបស់ទារិកា រួមទាំងការស្នើសុំឲ្យនៅក្រៅឃុំជាបណ្តោះអាសន្ន។ 
ចំពោះករណីស្លាប់របស់ទារិកានេះ លោក អំ សំអាត នាយករងកម្មវិធីឃ្លាំមើលសិទ្ធិមនុស្សនៃអង្គការលីកាដូ ស្នើឲ្យអាជ្ញាធរបើកការស៊ើបអង្កេតជុំវិញបញ្ហានេះ ព្រោះ លោក សង្កេតឃើញថា ទារិកាដែលស្លាប់នោះ បានបាក់ឆ្អឹងភ្លៅម្ខាង ដោយមិនដឹងមូលហេតុ។ បន្ថែមលើនេះ លោក ស្នើឲ្យបង្កើតគោលការណ៍ណែនាំច្បាប់ពាក់ព័ន្ធនីតិវិធីបញ្ជូនកុមារនិងស្ត្រីមានផ្ទៃពោះទៅមន្ទីរពេទ្យ។
លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា កាលពីថ្ងៃទី១៩ កុម្ភៈ ឆ្នាំ២០២០ នេះ បានចាត់មន្ត្រីជំនាញឲ្យចុះទៅកាន់មណ្ឌលកែប្រែទី២ ដើម្បីស៊ើបអង្កេតរកមូលហេតុពិតនៃការស្លាប់បាត់បង់ជីវិតរបស់ទារិកាអាយុ៥ខែម្នាក់។ ប្រតិបត្តិការស៊ើបអង្កេតនេះ ដឹកនាំដោយលោក ជូ ហេង សមាជិកគណៈកម្មាធិការសិទ្ធិមនុស្សកម្ពុជា និងជាអគ្គនាយករងនៃអគ្គនាយកដ្ឋានស៊ើបអង្កេត និងអប់រំសិទ្ធិមនុស្ស រួមជាមួយមន្ត្រីជំនាញជាច្រើនរូបទៀត។
ក្រោយជួបជាមួយភាគីពាក់ព័ន្ធទាំងអស់ គណៈកម្មាធិការសិទ្ធិមនុស្សកម្ពុជា បានអះអាងពីករណីស្លាប់របស់ទារិកាអាយុ៥ខែនោះ ដែលមានម្តាយជាប់ចោទពីបទជួញដូរ និងប្រើប្រាស់សារធាតុញៀនខុសច្បាប់។ ទារិកានោះ បានស្លាប់នៅថ្ងៃទី២៦ ខែមករា ដោយសារជំងឺរលាកសួតធ្ងន់ធ្ងរ។
ខាងពន្ធនាគារក៏បានអះអាងប្រាប់គណៈកម្មាធិការសិទ្ធិមនុស្សកម្ពុជា ផងដែរពីការយកចិត្តទុកដាក់របស់ខ្លួនក្នុងការបញ្ជូនទៅព្យាបាល ប៉ុន្តែជាមួយគ្នានេះ ក្រុមស៊ើបអង្កេតពិនិត្យឃើញថា ស្ត្រីជាប់ឃុំមិនទទួលបានព័ត៌មានគ្រប់គ្រាន់ពាក់ព័ន្ធនឹងសិទ្ធិការពារខ្លួន។
គណៈកម្មាធិការសិទ្ធិមនុស្សកម្ពុជា បានសម្រេចផ្តល់មេធាវីការពារក្តីដោយឥតគិតថ្លៃសម្រាប់ស្ត្រីជាប់ឃុំដែលជាម្តាយរបស់ទារិកា ហើយក៏បានស្នើសុំឲ្យនៅក្រៅឃុំជាបណ្តោះអាសន្នផងដែរ។
លោក នុត សវនា អគ្គនាយករងនិងជាអ្នកនាំពាក្យនៃអគ្គនាយកដ្ឋានពន្ធនាគារបានអះអាងកាលពីម្សិលមិញថា៖ «យើងបានស្រាវជ្រាវលើករណីហ្នឹង ថាតើជាកំហុសរបស់មន្ត្រីយើង ឬក៏ជាកំហុសខាងមន្ទីរពេទ្យដែលមិនបានយកចិត្តទុកដាក់។ ជាក់ស្ដែងមន្ត្រីយើងបានបញ្ជូនកុមារទៅព្យាបាលហើយ នៅពេលគាត់មានអាការមិនស្រួលហ្នឹង ប៉ុន្តែក្នុងរបាយការណ៍មិនសូវយកចិត្តទុកដាក់ ហើយគាត់បដិសេធមិនទទួល»៕
Tag:
CHRC
កែវ រ៉េមី
ពន្ធនាគារ
ទារិកា៥ខែ
© រក្សាសិទ្ធិដោយ thmeythmey.com
