ជាតិ
ទោះមាន COVID-19 តែមួយករណី WHO ប្រាប់កម្ពុជាត្រៀមឆ្លើយតបឲ្យទាន់ពេល លោក Tedros Adhanom Ghebreyesus អគ្គនាយកអង្គការសុខភាពពិភពលោក។ រូបថត AFP
× អង្គការសុខភាពពិភពលោក (WHO) ទទូចឲ្យកម្ពុជាត្រៀមលក្ខណៈឆ្លើយតបឲ្យទាន់ពេលវេលាក្នុងករណីផ្ទុះរាលដាលនាពេលអនាគតនៃជំងឺផ្លូវដង្ហើមបង្កឡើងកូរ៉ូណាវីរុស (COVID-19)។ ការលើកឡើងបែបនេះ ធ្វើឡើងខណៈ WHO កត់សម្គាល់ឃើញថា ការរាលដាលនៃជំងឺ COVID-19 នៅតែបន្តនៅប្រទេសជាច្រើនជុំវិញពិភពលោក ទោះបីជាមានការថមថយការឆ្លងនៅក្រៅបរទេសចិន ដែលជាចំណុចផ្តើមនៃការផ្ទុះវីរុសនេះក៏ដោយក្តី។ ទន្ទឹមនេះ អង្គការអន្តរជាតិមួយនេះ បានសង្កត់ធ្ងន់ថា COVID-19 នៅតែជាអាសន្នសុខភាពសាធារណៈជាសាកលដដែល ដែលត្រូវបានប្រកាស កាលពីថ្ងៃ ៣០ មករា ឆ្នាំ២០២០កន្លងទៅ។
ក្នុងសេចក្តីប្រកាសព័ត៌មាន ចុះផ្សាយថ្ងៃ១៩ ខែកុម្ភៈ អង្គការសុខភាពពិភពលោក ស្នើសុំយ៉ាងពេញទំហឹងឲ្យរដ្ឋជាសមាជិកទាំងអស់ ដែលមានទាំងកម្ពុជាផងនោះ យកចិត្តទុកដាក់លើការត្រៀមខ្លួនសម្រាប់ការឆ្លើយតបយ៉ាងល្អចំពោះករណីឆ្លង COVID-19 បន្ថែម និងការឆ្លងសាយភាយកាន់តែធំដែលអាចកើតមានឡើង។ ត្រង់នេះ អង្គការ WHO សង្កត់ធ្ងន់ថា ចំណាត់ការឆ្លើយតបនានាពីសំណាក់រដ្ឋាភិបាលទាំងអស់ គប្បីអនុលោមតាម ផែនការឆ្លើយតបនិងការត្រៀមលក្ខណៈបែបយុទ្ធសាស្ត្រ COVID-19 ដែលដាក់ចេញដោយ WHO ។
«ក្នុងប្រទេសកម្ពុជា ខណៈ WHO បាននិងកំពុងគាំទ្រទាំងផ្នែកបច្ចេកទេសនិងប្រតិបត្តិការដល់ក្រសួងសុខាភិបាលក្នុងការឆ្លើយតបចំពោះករណីឆ្លងទីមួយ (បុរសជនជាតិចិននៅក្រុងព្រះសីហនុ) ក៏ដូចជាហេតុការណ៍នាវាទេសចរណ៍ Westerdam ការត្រៀមលក្ខណៈសម្រាប់លទ្ធភាពឆ្លងកាន់តែធំ គឺនៅតែមានសារសំខាន់»។ អង្គការ WHO បញ្ជាក់បែបនេះក្នុងសេចក្តីប្រកាសព័ត៌មានខ្លួន។
មកទល់ពេលនេះ ប្រទេស កម្ពុជា បានរកឃើញករណីឆ្លង COVID-19 តែមួយគត់ ហើយអ្នកជំងឺនោះដែលជាជនជាតិចិនមកពីវូហាន បានជាសះស្បើយ និងបានធ្វើតេស្តវិជ្ជមានសម្រាប់ជំងឺនេះ។ ទោះជាបែបនេះក្តី អង្គការ WHO បានលើកឡើងជាក្តីកង្វល់ថា ក្រោយហេតុការណ៍នាវា Westerdam កើតឡើង ដែលមានស្ត្រីជាអ្នកទេសចរអាមេរិកលើនាវានេះបានរកឃើញថាមានផ្ទុក COVID-19 ក្នុងប្រទេសម៉ាឡេស៊ី សកម្មភាពត្រៀមលក្ខណៈពីសំណាក់រដ្ឋាភិបាលកម្ពុជា មានភាពចាំបាច់ដើម្បីធានាឲ្យបានពីការឆ្លើយតបទាន់ពេលវេលា។
«ដើម្បីត្រៀមលក្ខណៈសម្រាប់ការឆ្លងរាលដាលតាមសហគមន៍ អង្គការ WHO កំពុងធ្វើការជាមួយក្រសួងសុខាភិបាល (កម្ពុជា) និងបណ្ដាដៃគូផ្សេងទៀត ដើម្បីធ្វើបច្ចុប្បន្នភាពការត្រៀមលក្ខណៈថ្នាក់ជាតិរបស់កម្ពុជា និងផែនការឆ្លើយតប ព្រមទាំងកំណត់គម្លាតសម្រាប់គោលដៅត្រៀមខ្លួនដែលជាអាទិភាព»។ អង្គការ WHO គូសបញ្ជាក់បែបនេះក្នុងសេចក្តីប្រកាសព័ត៌មានខ្លួន។
សូមបញ្ជាក់ថា ក្រសួងសុខាភិបាលកម្ពុជា ក្នុងសេចក្តីប្រកាសព័ត៌មាននៅថ្ងៃ២០ ខែកុម្ភៈ បានគូសបញ្ជាក់ថា សំណាកចំនួន ១២៨៦ នាក់ចុងក្រោយក្នុងចំណោមអ្នកលើនាវាជាង២ពាន់នាក់ បានធ្វើតេស្តទាំងអស់ ហើយលទ្ធផល បង្ហាញ អវិជ្ជមាន សម្រាប់ COVID-19។ ក្រសួងបន្តទៀតថា ស្ថានភាពសុខភាពទូទៅរបស់អ្នកដំណើរទាំងអស់ មានសភាល្អប្រសើរ និងមិនមានអ្នកឡើងកំដៅខ្លួនឡើយ។ អ្នកដំណើរនាវា Westerdam ទាំងអស់នេះ គឺជាអ្នកដែលនៅសេសសល់នៅរាជធានីភ្នំពេញ និងខេត្ត ព្រះសីហនុ ៕
Tag:
កម្ពុជា
WHO
អង្គការសុខភាពពិភពលោក
កូរ៉ូណាវីរុស
COVID-19
© រក្សាសិទ្ធិដោយ thmeythmey.com