អន្តរជាតិ
ការគាំទ្រពីសំណាក់សហគមន៍អន្តរជាតិ ធ្វើឲ្យចិនមានទំនុកចិត្តយកឈ្នះ COVID-19
លោក វ៉ាង យី រដ្ឋមន្រ្តីការបរទេសចិន និយាយនៅក្នុងពិធីលៀងសាយភោជន នៃកិច្ចប្រជុំរដ្ឋមន្រ្តីការបរទេស ស្តីពីជំងឺផ្លូវដង្ហើមកូរ៉ូណា និងកិច្ចសហប្រត្តិបត្តិការ ទន្លេមេគង្គ-ឡានឆាងលើកទី៥។ រូបភាព៖ Xinhua
×![]()
ដោយ: ធៀន ភារិន្ទ
ពីប្រទេសឡាវ នាថ្ងៃទី២០ ខែកុម្ភៈ លោកវ៉ាង យី ទីប្រឹក្សារដ្ឋ និងប្រមុខការទូតចិន បានលើកឡើងថា ចិន មិនមែនប្រយុទ្ធប្រឆាំងជាមួយCOVID-19 តែម្នាក់ឯងនោះទេ ប៉ុន្តែប្រទេសដែលមានប្រជាជន១,៤ពាន់លាននាក់មួយនេះ បានទទួលការគាំទ្រយ៉ាងខ្លាំងពីសំណាក់ប្រទេស១៦០ និងអង្គការអន្តរជាតិចំនួន ៣០ នៅជុំវិញពិភពលោក។ ដោយសារតែមានការគាំទ្រយ៉ាងពេញទំហឹងបែបនេះ ចិន មានទំនុកចិត្តក្នុងការយកឈ្នះ COVID-19 ដែលកំពុងអុកឡុកនៅក្នុងប្រទេស។ 
នាពិធីលៀងសាយភោជន៍ នៃកិច្ចប្រជុំរដ្ឋមន្ត្រីការបរទេស ស្តីពីជំងឺផ្លូវដង្ហើមកូរ៉ូណា និងកិច្ចប្រជុំរដ្ឋមន្ត្រីការបរទេសស្តីពីកិច្ចសហប្រត្តិបត្តិការ ទន្លេមេគង្គ-ឡានឆាងលើកទី៥ លោក វ៉ាង យី រដ្ឋមន្ត្រីការបរទេស និងទីប្រឹក្សារដ្ឋចិន បានលើកឡើងថា ក្រោមការដឹកនាំរបស់ប្រធានាធិបតីចិន ស៊ី ជិនភីង ប្រជាជនចិនទាំងអស់ កំពុងរួមគ្នាប្រយុទ្ធប្រឆាំង COVID-19 ដែលកំពុងផ្ទុះឡើងនៅក្នុងប្រទេសចិន។
ស្ថានភាព COVID-19 នៅក្នុងចិនពេលនេះ គឺបានធូរស្រាលជាងមុន បើទោះបីជាក្រុងវូហាន និងខេត្តហ៊ូប៉ីនៅតែជាចំណុចក្តៅក៏ដោយ។ ករណីកូរ៉ូណាវីរុសនៅចិន បានធ្លាក់ចុះក្នុងរយៈពេល ១៥ថ្ងៃជាប់ៗ ដែលជាសញ្ញាវិជ្ជមានមួយ។ ត្រឹមថ្ងៃទី១៨ ខែកុម្ភៈ វាគឺជាករណីដំបូង ដែលអ្នកជំងឺCOVID-19 ១៤០០០ពាន់ ត្រូវបានគេអនុញ្ញាតឲ្យចាកចេញពីមន្ទីពេទ្យ ហើយក៏ជាតួលេខមួយនេះ គឺលើសពីចំនួន ដែលគេរកឃើញអ្នកផ្ទុកកូរ៉ូណាវីរុសថ្មីដែរ។ នេះបើតាមការអះអាងរបស់ប្រមុខការទូតចិន។
យ៉ាងណាក៏ដោយ លោក វ៉ាង បញ្ជាក់ថា ទំនុកចិត្តរបស់ចិន ក្នុងការព្យាបាល និងទប់ស្កាត់កូរ៉ូណាវីរុសនេះ គឺមិនអាចកាត់ផ្តាច់បានឡើងពីការគាំទ្ររបស់សហគមន៍អន្តរជាតិ ជាពិសេស អាស៊ាន ដែលតែងតែគាំទ្រចិនកន្លងមក។ បើតាមលោករដ្ឋមន្ត្រីការបរទេសចិនរូបនេះ ការគាំទ្រ ការផ្តល់ជំនួយពីសហគមន៍អន្តរជាតិបែបនេះហើយ ធ្វើឲ្យចិនកាន់តែជំរុញឲ្យចិនខិតខំបន្ថែមទៀត ដើម្បីជម្នះឧបសគ្គ។
ដោយមានវត្តមានរបស់រដ្ឋមន្ត្រី និងមន្ត្រីជាន់ខ្ពស់មកពីបណ្តាប្រទេសអាស៊ាន និងចិន លោកវ៉ាង បានបង្ហាញថា វីរុស គឺជាសត្រូវរួមរបស់មនុស្សជាតិ ហើយចិនមិនអាចដោះស្រាយម្នាក់ឯងបានទេ។ ការណ៍នេះ ត្រូវតែមានការចូលរួមពីបណ្តាប្រទេសទាំងអស់។ លោកទីប្រឹក្សារដ្ឋចិនរូបនេះ បានអះអាងថា កន្លងមក មានប្រទេសច្រើនជាង ១៦០ និងអង្គការអន្តរជាតិលើសពី៣០ បានបង្ហាញការគាំទ្រចិនយ៉ាងរឹងមាំ និងផ្តល់ជំនួយឲ្យចិន។
ក្រៅពី COVID-19 លោករដ្ឋមន្ត្រីការបរទេស និងទីប្រឹក្សារដ្ឋចិន ក៏បានលើកឡើងពីកិច្ចសហប្រតិបត្តិការទន្លេមេគង្គ-ឡានឆាង ផងដែរ។ ក្នុងនោះលោក វ៉ាង បានអះអាង ទំនាក់ទំនងចិន និងអាស៊ាន កាន់តែរឹងមាំ និងស៊ីជម្រៅថែមទៀត បន្ទាប់ពីកូរ៉ូណាវីរុស៕
Tag:
ចិន
អាស៊ាន
COVID-19
© រក្សាសិទ្ធិដោយ thmeythmey.com
