ពីនេះ ពីនោះ
ព័ត៍មានសុខភាព
×![]()
ដោយ: ថ្មីៗ
ភាគច្រើននៃពួកយើងសុទ្ធតែដឹងហើយថាការទទួលទានបន្លែផ្លែឈើ គឺដើរតួយ៉ាងសំខាន់សម្រាប់សុខភាពរាងកាយល្អប្រសើរ។ ទោះជាយ៉ាងណាអ្នកប្រហែលជាមិនធ្លាប់ចាប់អារម្មណ៍ទេថា បន្លែផ្លែឈើក៏ជះឥទ្ធិពលលើស្បែកគួរឱ្យកត់សម្គាល់។ 
ខាងក្រោមនេះយើង នឹងបង្ហាញឱ្យដឹងពីផ្លែឈើដែលអ្នកគួរទទួលទាន ប្រសិនបើចង់បានស្បែកស្រស់ស្អាតមានសុខភាពល្អ ៖
១. ក្រូច
ភាគច្រើននៃពួកយើងសុទ្ធតែដឹងហើយថាក្រូចមានផ្ទុកសម្បូរទៅដោយវីតាមីន C។ ក្រៅពីជួយពង្រឹងប្រព័ន្ធភាពស៊ាំរាងកាយហើយនោះ វីតាមីន C ក៏ចាំបាច់សម្រាប់ដំណើរការនៃការសំយោគកូឡាជែនសំខាន់ចំពោះសុខភាពស្បែកផងដែរ។ កូឡាជែនជាប្រូតេអ៊ីនមួយប្រភេទដែលធ្វើឱ្យស្បែកតឹងណែននិងគ្មានភាពជ្រីវជ្រួញ។
២. ក្រូចឆ្មារ
ក៏ជាប្រភពដ៏ល្អបំផុតមួយនៃវីតាមីន C! ហើយដូចបានលើកឡើងក្នុងចំណុចខាងលើវីតាមីន C ចាំបាច់សម្រាប់រក្សាសុខភាពស្បែក។ ដូច្នេះកុំភ្លេចរួមបញ្ចូលទឹកក្រូចឆ្មារ ឬក្រូចឆ្មារក្នុងរបបអាហារប្រចាំថ្ងៃ។
៣. ល្ហុង
ល្ហុងមានផ្ទុកសម្បូរទៅដោយវីតាមីន C និងវីតាមីន A ដែលសុទ្ធតែល្អសម្រាប់រក្សាសុខភាពស្បែក។ ការទទួលទានល្ហុងជាប្រចាំអាចជួយបង្កើនកម្រិតកូឡាជែនរបស់ស្បែកគួរឱ្យកត់សម្គាល់។
៤. ផ្លែបឺរ
មានផ្ទុកសម្បូរទៅដោយជាតិខ្លាញ់ល្អ monounsaturated ដែលជួយរក្សាជាតិសំណើមនៃស្បែកបានយ៉ាងប្រសើរ ខណៈដែលស្នាមជ្រីវជ្រួញងាយនឹងលេចឡើងចំពោះស្បែកស្ងួត។ លើសពីនេះទៅទៀត ជាតិខ្លាញ់ monounsaturated ក៏ជួយអោយរាងកាយអាចស្រូបសារធាតុចិញ្ចឹម និងវីតាមីនផ្សេងៗដែលស្បែកត្រូវការបានពេញលេញផងដែរ។
៥. ស្វាយ
ជាប្រភពដ៏ប្រសើរនៃវីតាមីន C និងវីតាមីន A។ ការទទួលទានស្វាយអាចជួយទប់ស្កាត់បញ្ហាស្បែកសឹងគ្រប់ប្រភេទ។
៦. ផ្លែចេក
មានផ្ទុកសម្បូរទៅដោយជាតិប៉ូតាស្យូមដែលចាំបាច់ក្នុងការរក្សាតុល្យភាពនៃជាតិសំណើមរបស់ស្បែក។ ករណីខ្លះ គឺស្បែកស្ងួតបណ្ដាលមកពីកង្វះនៃជាតិប៉ូតាស្យូម។ ដូច្នេះព្យាយាមរួមបញ្ចូលផ្លែចេកក្នុងរបបអាហារប្រចាំថ្ងៃរបស់អ្នក៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
