កីឡាអន្តរជាតិ
អន្តរជាតិ
Europa League៖ Arsenal, Wolves ឈ្នះ ឯ Man Utd បានត្រឹមស្មើជើងទី១
× ក្រុមមកពីអង់គ្លេស Arsenal និង Wolverhampton Wanderers សុទ្ធតែទទួលបានជ័យជម្នះរៀងខ្លួនក្នុងជំនួបជើងទី១ វគ្គ៣២ក្រុមចុងក្រោយ នៃពានរង្វាន់ UEFA Europa League ស្របពេល Manchester United បានត្រឹមស្មើប៉ុណ្ណោះ។ Arsenal បានយកឈ្នះ Olympiacos ១-០, Wolves ឈ្នះ Espanyol ៤-០ រីឯ Man Utd ស្មើ Club Brugge ១-១។
ខ្សែប្រយុទ្ធ Alexandre Lacazette ជាអ្នកស៊ុតបញ្ចូលទីនៅនាទី៨១ ដើម្បីជួយក្រុមរហស្សនាមកាំភ្លើងធំរកបានជ័យជម្នះនៅជើងទី១ ក្រៅដីនេះនាកីឡដ្ឋាន Karaiskaki នៅរាត្រីថ្ងៃទី២០ កុម្ភៈ។ មួយគ្រាប់នេះ នឹងធ្វើឲ្យក្រុមដែលមានអ្នកចាត់ការទូទៅលោក Mikel Arteta មានប្រៀបសម្រាប់ជំនួបជើងទី២ដែលត្រូវធ្វើនៅទឹកដីខ្លួន។
Diogo Jota បានធ្វើឲ្យមានការភ្ញាក់ផ្អើលសម្រាប់ក្រុមម្ចាស់ផ្ទះ Wolves បន្ទាប់ពីរូបគេរកបានដល់ទៅ៣គ្រាប់ (hat-trick) ក្នុងជំនួបជើងទី១ ដែលក្រុមរហស្សនាមឆ្កែព្រៃយកឈ្នះ Espanyol ដល់ទៅ ៤-០។ ក្រៅពី Jota ខ្សែបម្រើសញ្ជាតិព័រទុយហ្គាល់ម្នាក់ទៀត Ruben Neves ក៏រកបានមួយគ្រាប់ដែរ។
ដោយឡែកក្រុមពីក្របខណ្ឌលីគកំពូលអង់គ្លេសមួយទៀត Man Utd មិនបានបង្ហាញអ្វីជាដុំកំផួននោះទេនាការប្រកួតជើងទី១ នៅក្រៅដីនេះ។ បិសាចក្រហមទទួលបានលទ្ធផលស្មើគ្នាជាមួយក្រុមមកពីបែលហ្ស៊ិក Club Brugge ១-១ ប៉ុណ្ណោះ នាកីឡដ្ឋាន Jan Breydel យប់មិញ។
មួយគ្រាប់របស់ Man Utd ធ្វើបានដោយខ្សែប្រយុទ្ធ Anthony Martial ដែលជាគ្រាប់បាល់តាមស្មើ ក្រោយការនាំមុខរបស់ Club Brugge ដែលសម្រេចទីបានដោយខ្សែប្រយុទ្ធ Emmanuel Dennis។ យ៉ាងណាក៏ដោយ ក្រុមរបស់លោក Ole Gunnar Solskjaer នៅតែជាក្រុមមានប្រៀប ដ្បិតជើងទី២ត្រូវត្រឡប់ទៅ Old Trafford វិញ។
លទ្ធផលគូដទៃទៀតសម្រាប់ការប្រកួតក្របខណ្ឌលំដាប់ទី២អឺរ៉ុប Europa League វគ្គ៣២ក្រុមជើងទី១ មានដូចខាងក្រោម៖
Tag:
Europa League
Manchester United
Arsenal
© រក្សាសិទ្ធិដោយ thmeythmey.com