ពីនេះ ពីនោះ
រូបត្លុក
កាហ្វេថ្មីៗ៖ ស្លៀកពាក់«ខោអាវក្នុង»ថតLive អាចជំរុញការជួញដូរផ្លូវភេទ
× ចំណាត់ការរបស់រដ្ឋាភិបាលដែលបិទការផ្សព្វផ្សាយផ្ទាល់ (Live) របស់ស្ត្រីអ្នកលក់ផលិតផលអនឡាញមួយចំនួនដោយការបញ្ចេញរាងកាយសិចស៊ី នៅតែជាប្រធានបទនៃការជជែកគ្នាតាមបណ្តាញសង្គម ដូចរឿងមេរោគ Covid-19 ដែរ។ សុធីរ និងសំណាង ក៏ជជែករឿងនេះដោយនៅតែមានចំងល់ថា ហេតុអ្វីបានជាខាងអង្គការសង្គមស៊ីវិលយល់ឃើញថា ការហាមឃាត់ស្ត្រីខ្មែរមិនឱ្យស្លៀកពាក់លេចលើលិចក្រោម ហើយថតបង្ហាញខ្លួនឯងជាសាធារណៈ ហើយពេលខ្លះទៀតប្រើប្រាស់ពាក្យជេរប្រទេចគ្នា អសុរោះទៀតផងនោះ ជាការរំលោភសិទ្ធិទៅវិញ?
សុធីរ៖ មើលអាសំណាង អ្ហែងយល់យ៉ាងម៉េចដែរ រឿងបង្ក្រាបស្រីៗ Live លក់ឡេហ្នឹង? ប៉ះពាល់សេចក្តីថ្លៃថ្នូរសង្គម ឬជាសិទ្ធិបុគ្គល សិទ្ធិស្ត្រី?
សំណាង៖ អ្ហែងសួរគំនិតអញ អញឆ្លើយគំនិតអញ។ អញយល់ស្របថាស្លៀកពាក់ជាសិទ្ធិបុគ្គល។ ហើយអញក៏យល់ស្របដែរ បើគេស្លៀកឈុតប៊ីគីនីហែលទឹកនៅតាមឆ្នេរសមុទ្រ វាជាសិទ្ធិរបស់គេ។ ប៉ុន្តែពាក់អាវទ្រនាប់ ខោទ្រនាប់ ស្ទើរចេញកេរភេទ ក្នុងនៅមុខកាមេរ៉ាដើម្បីផ្សព្វផ្សាយលក់ដូរផលិតផល វាជារឿងដែលត្រូវពិចារណាអំពីសីលធម៌។ ពាក្យគន្លឹះក្នុងរឿងនេះ គឺផ្សព្វផ្សាយ ហើយផ្សព្វផ្សាយរាល់ថ្ងៃដោយគ្មានការទទួលខុសត្រូវផ្នែកសីលធម៌។ នៅពេលសារព័ត៌មានផ្សាយរូបអាសអាភាស ក្រុមសង្គមស៊ីវិល និងមហាជនរិះគន់សារព័ត៌មាននោះថា គ្មានសីលធម៌។ ដល់ពេលស្រីៗស្លៀកពាក់បញ្ចេញសាច់លើ សាច់ក្រោម ក្រុមសិទ្ធិមនុស្សថា អានេះសិទ្ធិបុគ្គលវិញ។ នេះអញមិនទាន់និយាយរឿង សុំច្បាប់លក់តាមអនឡាញ ផង។ ច្បាប់ទើបចេញថ្មីៗ១ខែ ២ខែមុននេះទេ។ កាលមុនសម្បូរហាងកាហ្វេបញ្ចាំងរឿងអាសអាភាស សម្បូរតូបលក់ឌីសវីដេអូអាសអាភាសនៅតាមផ្សារ ក្រុមសង្គមស៊ីវិល អំពាវនាវឱ្យរដ្ឋាភិបាលបង្ក្រាប ព្រោះការណ៍ទាំងនោះហើយ ដែលជំរុញឱ្យមានករណីរំលោភផ្លូវភេទ។ ឥឡូវ ត្រឹមស្លៀកពាក់ ស្ទើរស្រាត ជាសិទ្ធិបុគ្គលក្នុងការស្លៀកពាក់។ អញមិនយល់ស្របទេ។
សូធីរ៖ អញគិតដូចអ្ហែងដែរ។ អញក៏មើលដែរវើយ ហើយពេលខ្លះ ពួកគេនិយាយពាក្យជេរប្រទេចគ្នាជាមួយពាក្យពេចន៍អាក្រក់ៗ តាមវីដេអូ Live ដែលមានមនុស្សកំពុងមើលរាប់ពាន់នាក់។ ប៉ុន្តែ អញគិតឆ្ងាយជាងនេះ។ អាចមានបច្ច័យអាក្រក់២ ដែលចេញពីរការលក់ដូរអនឡាញនេះ។ ទីមួយ គឺការជួញដូរផ្លូវភេទ។ ទីពីរ សព្វថ្ងៃនេះ ស្ត្រីកាន់តែច្រើន បានចេញមកលក់ដូរបែបនេះ។ អញមិនដឹងចំនួនប៉ុន្មានទេ តែយើងអាចឃើញថា សម្បូរ។ ដូច្នេះ អញបារម្ភថា ក្មេងស្រីជំទង់ៗនៅតាមជនបទ មើលឃើញគំរូបែបនេះ ព្រោះវាស្រួលធ្វើពេក។ ទូរសព្ទមួយគ្រឿង សេវាអ៊ីនធឺណិតមានគ្រប់កន្លែង បណ្តាញយកផលិតផលមកលក់ក៏សម្បូរ ហើយមនុស្សស្រីដែលប្រើប្រាស់គ្រឿងបំប៉នសម្រស់ក៏កាន់តែច្រើន។ យូរៗ ក្មេងស្រីៗ ឡើងមកធ្វើអីចឹងគ្រប់គ្នាហើយ។ អញគ្រាន់តែយល់ស្របចំពោះការចាត់វិធានការ ប៉ុន្តែអាជ្ញាធរក៏ត្រូវអនុវត្តតាមនីតិច្បាប់ត្រឹមត្រូវដែរ។
សំណាង៖ អ្ហេ រឿងហ្នឹងច្បាស់ណាស់។ វិធានការដោះស្រាយបញ្ហាជារឿងមួយ រីឯការអនុវត្តនីតិវិធី ជារឿងរបស់ប៉ូលិស ត្រូវធ្វើតាមច្បាប់ត្រឹមត្រូវ មិនមែនចាប់ថតបង្ហោះរូបគេអ៊ីចឹងទេ។ ប៉ូលិសយើងសព្វថ្ងៃនេះ រហ័សណាស់រឿងបង្ហោះរូបគេហ្នឹង។ សរុបមកវិញ បើទោះជាគ្មានការផ្តល់និយមន័យច្បាស់លាស់ថា អ្វីទៅជាការប៉ះពាល់សីលធម៌ សេចក្តីថ្លៃថ្នូររបស់សង្គម របស់ស្ត្រី ដូចការលើកឡើងរបស់ក្រុមអង្គការក៏ដោយ តែអញក៏មិនជឿថា អង្គការទាំងនោះយល់ស្របឱ្យមានស្ត្រីម្នាក់ស្លៀកប៊ីគីនីដើរតាមផ្លូវ ឬដើរចូលផ្សារដែរ។ ថត Live ខ្លួនឯងដែលមានមនុស្សកំពុងមើលរាប់ពាន់នាក់ មានអីខុសពីស្លៀកពាក់អីចឹងដើរតាមផ្លូវអ្ហា?
សុធីរ៖ ហ្នឹងគំនិតពួកយើងទេ។ អ្ហែងនិងអញជជែកគ្នាតែពីរនាក់បាន។ ហ៊ានតែយកទៅផ្សាយ អាចត្រូវគេចោទប្រកាន់ វិនិច្ឆ័យ កាត់ទោសអ្ហែងពេញហ្វេសប៊ុកទៀត។ ស្រុកយើងឥឡូវ សម្បូរអ្នកច្បាប់ណាស់។ នៅពេញតែផ្លូវហ្នឹង។ មានទូរសព្ទមួយ បញ្ចូលកម្មវិធីហ្វេសប៊ុកហើយ កាត់ទោសអ្ហែងបានហើយ!!!
© រក្សាសិទ្ធិដោយ thmeythmey.com