ជាតិ
លោក ហ៊ុន ម៉ានី៖ «ការងារនយោបាយ គឺមិនត្រឹមជាតួនាទីនោះទេ តែជាការលះបង់»
×![]()
ភ្នំពេញ៖ នៅរសៀលថ្ងៃទី២០ កុម្ភៈនេះ គណៈកម្មការទី៧ នៃរដ្ឋសភា បានជួបសំណេះសំណាលជាមួយប្រតិភូសាលាខុនរ៉ាដអាដិនណៅអ៊ែរ សម្រាប់អ្នកនយោបាយវ័យក្មេង។ ក្នុងជំនួបជាមួយប្រតិភូអ្នកនយោបាយវ័យក្មេងលោក ហ៊ុន ម៉ានី លើកឡើងថា៖ «ការងារនយោបាយ គឺមិនត្រឹមជាតួនាទីនោះទេ តែគឺជាការលះបង់ ហើយអ្នកនយោបាយក៏គួរតែយល់ថា ការងារនយោបាយមិនអាចបំពេញចិត្តមនុស្សគ្រប់រូបបាននោះទេ»។
លោក CHRISTAN ECHLE នាយកកិច្ចពិភាក្សាកម្មវិធីនយោបាយ ប្រចាំតំបន់អាស៊ី និងលោក DANIEL SCHMUECKING ប្រធានមូលនិធិខុនរ៉ាដអាដិនណៅអ៊ែរប្រចាំកម្ពុជា បានដឹកនាំប្រតិភូសាលាខុនរ៉ាដអាដិនណៅអ៊ែរ សម្រាប់អ្នកនយោបាយវ័យក្មេង ចំនួន ២៥នាក់ មកពី១១ប្រទេស ជួបសម្ដែងការគួរសម ជាមួយគណៈកម្មការទី៧ នៃរដ្ឋសភា នារដ្ឋសភាជាតិ។
នាជំនួបជាមួយប្រតិភូអ្នកនយោបាយវ័យក្មេង លោក ហ៊ុន ម៉ានី បានវាយតម្លៃខ្លស់ចំពោះការរៀបចំវេទិកាឲ្យអ្នកនយោបាយវ័យក្មេងមកពីបណ្តាលប្រទេសក្នុងអាស៊ី បានជួបគ្នា និងស្វែងយល់លើកិច្ចការងារនយោបាយ តាមរយៈការពិភាក្សា និងចែករំលែកពីបទពិសោធន៍នៃប្រទេសរបស់ខ្លួន។ ប្រតិភូយុវជនទាំងនេះ មកពីប្រទេសឥណ្ឌូនេស៊ី ម៉ាឡេស៊ី ម៉ាល់ឌីវ ម៉ុងហ្គោលី មីយ៉ាន់ម៉ា នេប៉ាល់ ប៉ាគីស្ថាន ហ្វីលីពីន ស្រីលង្កា ថៃ រួមទាំងកម្ពុជា។
ក្នុងជំនួបខាងលើ លោក ហ៊ុន ម៉ានី ក៏បានលើកឡើងទៅកាន់ប្រតិភូអ្នកនយោបាយវ័យក្មេងថា៖ «ការដឹកនាំប្រទេសមួយ គឺមិនមែនផ្តោតលើតែចំនុចណាមួយតែមួយផ្នែកនោះទេ គឺទាមទារឲ្យយើងដឹង និង ស្វែងយល់ស៊ីជម្រៅគ្រប់ជ្រុងជ្រោយលើគ្រប់ទិដ្ឋភាពក្នុងពេលតែមួយ ដោយការចេះវាយតម្លៃ និងកំណត់ច្បាស់លាស់នូវកត្តាអាទិភាព និងចាំបាច់ដែលឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋ»។
សូមបញ្ជាក់ថា ជំនួបរបស់ប្រតិភូយុវជននេះ ជាផ្នែកមួយនៃវគ្គសិក្សា សាលាខុនរ៉ាដអាដិនណៅអ៊ែរ ដើម្បីផ្តល់ជាឱកាសឲ្យប្រតិភូអ្នកនយោបាយវ័យក្មេង បានពិភាក្សាដោយផ្ទាល់ជាមួយអ្នកដឹកនាំក្នុងតំបន់ អំពីបរិបទ និងដំណើរការនៃនយោបាយក្នុងតំបន់៕
Tag:
ហ៊ុន ម៉ានី
យុវជន
ខុនរ៉ាដអាដិនណៅអ៊ែរ
© រក្សាសិទ្ធិដោយ thmeythmey.com
