អន្តរជាតិ
តុលាការធម្មនុញ្ញថៃ រំលាយបក្សលោក Thanathorn រឿងលុយចំនួន៦លានដុល្លារ លោក Thanathorn Juangroongruangkit ប្រធានគណបក្សអនាគតឈានមុខដែលត្រូវបានរំលាយដោយតុលាការធម្មនុញ្ញថៃ។ រូបថត AFP
× តុលាការធម្មនុញ្ញថៃ នៅថ្ងៃទី២១ ខែកុម្ភៈ បានប្រកាសរំសាយបក្សអនាគតឈានមុខរបស់លោក Thanathorn Juangroongruangkit ពាក់ព័ន្ធរឿងលុយចំនួន៦លានដុល្លារ។ គណៈកម្មការបោះឆ្នោតថៃ ជាអ្នកប្ដឹងឲ្យរំលាយបក្សប្រឆាំងធំជាងគេទីបីរបស់ប្រទេស ដោយចោទថា បំពានច្បាប់បោះឆ្នោត។
ក្រៅពីរំលាយបក្សអនាគតឈានមុខ ថ្នាក់ដឹកនាំបក្សនេះចំនួន១៦នាក់រួមទាំងប្រធានបក្ស គឺលោក Thanathorn Juangroongruangkit នឹងត្រូវហាមចូលរួមប្រកួតប្រជែងសម្រាប់តំណែងនយោបាយរយៈពេល១០ឆ្នាំ។ ចៅក្រម Nakarin Mektriarat នៃតុលាការធម្មនុញ្ញថៃប្រកាសបែបនេះក្នុងសវនាការនៅថ្ងៃទី២១ ខែកុម្ភៈ។
រឿងរ៉ាវដែលឈានដល់ការរំលាយបក្សអនាគតឈានមុខដែលទទួលសំឡេងច្រើនទីបីក្នុងការបោះឆ្នោតឆ្នាំ២០១៩ មានទាក់ទងនឹងលុយចំនួន៦លានដុល្លារ។ គណៈកម្មការបោះឆ្នោតថៃ ដែលជាដើមបណ្ដឹង អះអាងថា កំហុសរបស់បក្សនេះ គឺទទួលលុយពីលោក Thanathorn ដែលរឿងនេះផ្ទុយពីច្បាប់ដែលហាមបក្សនយោបាយទទួលលុយលើស១០លានបាត ឬស្មើនឹង៣១៨,០០០ដុល្លារ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
តាមពិតទៅ លោក Thanathorn ផ្ទាល់បានទទួលស្គាល់រឿងលុយនេះ ប៉ុន្តែអះអាងថា មិនខុសច្បាប់ឡើយ។ ការរំលាយបក្សរបស់លោកពេលនេះ ទំនងបង្កទៅជាវិបត្តិនយោបាយថ្មីមួយទៀតនៅថៃមិនខាន។
កាលពីប៉ុន្មានសប្ដាហ៍មុន បក្សអនាគតឈានមុខ ដែលក្លាយជាគំរាមកំហែងមុតស្រួចសម្រាប់លោក ប្រាយុទ្ធ បានរួចខ្លួនពីការរំលាយម្ដងហើយពាក់ព័ន្ធការមិនគោរពព្រះមហាក្សត្រ។ ប៉ុន្តែបក្សនេះឆ្លងមិនផុតសំណុំរឿងទីពីរនេះឡើយ៕
Tag:
ថៃ
Thanathorn Juangroongruangkit
© រក្សាសិទ្ធិដោយ thmeythmey.com