សៀមរាប៖ កសិករដាំតាសក់ផ្អែមស្រុកបន្ទាយស្រី បានជួបបញ្ហាប្រឈមនៅពេលដែលកសិផលខ្លួន ស្ទះមិនអាចលក់ចេញបាន ដោយសារអតិថិជនកាត់បន្ថយការទិញស្ទើរ៩០ភាគរយ។ នៅចំពោះមុខស្ថានការណ៍ដ៏ពិបាកនេះ អភិបាលស្រុកបន្ទាយស្រីបានចេញមុខជួយអន្ដរាគមន៍ភ្លាមៗ ដោយអំពាវនាវឱ្យប្រជាពលរដ្ឋគ្រប់មជ្ឈដ្ឋានជួយទិញតាសក់ផ្អែមរបស់កសិករ។ ក្នុងរយៈពេល២ថ្ងៃប៉ុណ្ណោះ តាសក់ផ្អែមប្រមាណ៣០តោន ត្រូវបានលក់អស់ តាមរយៈការបញ្ជាទិញពីប្រជាពលរដ្ឋជិតឆ្ងាយ។ ប្រជាកសិករអ្នកដាំតាសក់ផ្អែម បានបង្ហាញអារម្មណ៍រីករាយជាពន់ពេក និងមានកម្លាំងចិត្តបន្តដាំដំណាំនេះ ដោយមិនធ្វើឱ្យបាត់ផលិតផលសម្គាល់របស់ស្រុកបន្ទាយស្រីនេះឡើយ។
ព័ត៌មានពិស្ដារ សូមស្ដាប់បទយកការណ៍ដែលរៀបរៀងដោយអ្នកនាង អ៊ីសា រ៉ហានី ពីខេត្តសៀមរាប ដូចតទៅ
តាសក់ផ្អែម ជាដំណាំមួយបែបដែលកសិករក្នុងស្រុកបន្ទាយស្រីនិយមដាំ ដើម្បីផ្គត់ផ្គង់ទីផ្សារក្នុងក្រុងសៀមរាប។ តាសក់ផ្អែម ងាយស្រួលដាំដុះ និងប្រើពេលខ្លីសម្រាប់ប្រមូលផល។ ក្នុងស្ថានការណ៍ពិភពលោកកំពុងតានតឹង ពិសេសក្រោយផ្ទុះមេរោគកូរ៉ូណា ឬ COVID-19 ធ្វើឱ្យមានបរិយាកាលមិនល្អនៅក្នុងឧស្សាហកម្មទេសចរណ៍។ អតិថិជនធំៗដែលធ្លាប់បញ្ហាទិញតាសក់ផ្អែមច្រើនតោនក្នុងមួយថ្ងៃៗ បានបន្ថយការទិញ និងខ្លះទៀតលែងទិញតែម្ដង ព្រោះថាលក់មិនដាច់។ ការណ៍នេះ ធ្វើឱ្យវគ្គប្រមូលផលតាសក់ផ្អែមចុងក្រោយនៃពាក់កណ្ដាលខែ កុម្ភៈនេះ ត្រូវប្រឈមមុខគ្មានទីផ្សារ រីឯកសិករប្រឈមមុខខ្ពស់ក្នុងការខាតបង់ ឬគ្មានប្រាក់សងធនាគារ។
នៅថ្ងៃទី១៨ កុម្ភៈ តាសក់ផ្អែមរបស់កសិករស្រុកបន្ទាយស្រីប្រមាណ៣០តោន ត្រូវបាននាំមកលក់នៅផ្សារហេរីថេក នៅកណ្ដាលក្រុងសៀមរាប។ ប្រជាពលរដ្ឋទាំងអ្នកធម្មតា មន្ត្រីរាជការ បានបន្តកន្ទុយគ្នាទិញតាសក់ផ្អែម ខ្លះទិញតិចខ្លះជួយទិញច្រើន ដើម្បីបង្ហាញស្មារតីជួយគាំទ្រដំណាំកសិករខ្មែរ។
កសិករដែលដឹកតាសក់មកលក់ផ្ទាល់ បានបង្ហាញទឹកមុខរីករាយជាខ្លាំង នៅពេលតាសក់ផ្អែមពួកគេមានការតាំងលក់ក្នុងផ្សារទំនើប។ លោក ប៊ូ ម៉ាន កសិករមួយរូបបាននិយាយថា លោកសប្បាយចិត្តជាខ្លាំង ពេលដែលកសិផលតាសក់លោកបានលក់ចេញនៅលើទីផ្សារ។ លោក ម៉ាន ប្រាប់ថា រូបលោកព្រមទាំងកសិករដទៃទៀតសឹងបាក់ទឹកចិត្តទៅហើយក្នុងការដាំតាសក់នេះ ដោយសារក្នុងរយៈពេលចុងក្រោយនេះ គ្មានទីផ្សារលក់ចេញ។ លោក ម៉ាន បន្ថែមថា កសិករប្រឈមនឹងការខាតបង់ច្រើន ប្រសិនបើកសិផលលក់មិនដាច់។
ទីផ្សារសំខាន់សម្រាប់តាសក់ផ្អែមរបស់អ្នកស្រុកបន្ទាយស្រី គឺនៅតាមបណ្ដាផ្សារទំនើបធំៗក្នុងក្រុងសៀមរាប ភោជនីយដ្ឋាន ហាងលក់ផ្លែឈើ ជាដើម តែមួយរយៈចុងក្រោយនេះទាំងអ្នកបោះដុំនិងលក់រាយ ពួកគេលែងបញ្ជាទិញច្រើនៗទៀត ដែលធ្វើឱ្យតាសក់ជន់ ស្ទះលក់មិនចេញ។ លោក ម៉ាន ប្រាប់ថា លោកមិនបានដឹងពីការស្ទះទីផ្សារតាសក់ផ្អែមនេះទេ លោកដឹងតែផលិតដើម្បីរុញទៅទីផ្សារប៉ុណ្ណោះ។
«អត់ដឹងបញ្ហាស្ទះទីផ្សារទេ ខ្ញុំជាកសិករ ខ្ញុំដឹងតែផលិតដើម្បីរុញមកទីផ្សារទាំងមូល ខ្ញុំសង្កេតឃើញថាគ្មានការនាំចូលពីខាងណាទេ គឺផលិតផលតាសក់ផ្អែមមិនដែលមានការនាំចូលទេ តែរុញអត់ចេញ។...ភ្ញៀវ(អតិថិជន) និយាយដែរ ថាស្ងាត់ភ្ញៀវ អត់មានអតិថិជនជួយទិញ... ខ្ញុំដាំតម្រូវការដដែលដូចមុនៗ ទូទៅលក់អស់មិនដែលសល់ទេរយៈពេល១០ឆ្នាំតែងលក់អស់ៗ មកដល់ចុងក្រោយនេះខ្ញុំអត់ដឹងមកពីមូលហេតុអ្វី»។
អភិបាលស្រុកបន្ទាយស្រី លោក ឃឹម ហ្វីណង់ ដែលជាអ្នកចេញមុខធ្វើទីផ្សារនិងសហការរៀបចំការលក់តាសក់នៅផ្សារទំនើបហេរីថេក ប្រាប់ថា លោកមានអារម្មណ៍តក់ស្លុតជាខ្លាំងពេលដឹងថាដំណាំតាសក់ផ្អែមដែលល្បីឈ្មោះក្នុងស្រុកនេះ គ្មានអ្នកទិញ។ ដោយបារម្ភខ្លាចក្រែងកសិករបាក់ទឹកចិត្ត លែងដាំ និងត្រូវជាប់បំណុលធនាគារផង ថ្នាក់ដឹកនាំរូបនេះ បានប្រកាសជួយលក់តាសក់កសិករក្នុងបណ្ដាញសង្គម និងសម្រួលទីតាំងសម្រាប់ការដាក់លក់ផ្ទាល់ផង។ ជាលទ្ធផល ត្រឹម២ថ្ងៃប៉ុណ្ណោះ គឺថ្ងៃទី១៧ និង១៨ កុម្ភៈ តាសក់ផ្អែមប្រមាណ៣០តោន ពីចម្ការកសិករ បានលក់ចេញអស់។
យ៉ាងណាក៏ដោយ មហាជនមួយចំនួនក្រៅតែពីកោតសរសើរ ក៏មានអ្នកយល់ថា ការធ្វើបែបនេះមិនមែនជាដំណោះស្រាយពិតប្រាកដនោះទេ។ ចំណុចនេះលោក ហ្វីណង់ ពន្យល់ថា ដោយសារលោកឃើញបញ្ហានេះគឺជាបញ្ហាបណ្ដោះអាសន្ន ទើបលោកបញ្ចេញដំណោះស្រាយបណ្ដោះអាសន្នសម្រាប់កសិករ។ លោកបន្ថែមថា ប្រសិនបើបញ្ហាជាបញ្ហាអចិន្ត្រៃយ៍មែន នោះលោកប្រហែលមិនជ្រើសរើសដំណោះស្រាយបែបនេះឡើយ។
មានសំណួរចោទឡើង ថាមានដំណាំផ្សេងទៀតនៅស្រុកបន្ទាយស្រីដែលកំពុងជួបបញ្ហាទីផ្សារ រួមមានស្វាយកែវរមៀត ស្វាយចន្ទី ដំឡូងមី។ល។ ដែលត្រូវការរកដំណោះស្រាយជាបន្ទាន់។ ចំណុចនេះ លោក ហ្វីណង់ ពន្យល់ថា មូលហេតុនៃការធ្លាក់ថ្លៃទំនិញទាំងនោះគឺមកពីទីផ្សារអន្ដរជាតិ ដូច្នេះវាពិបាកដោះស្រាយភ្លាមៗ។ សម្រាប់ អភិបាលស្រុក លោកជំរុញឱ្យកសិករដាំដំណាំបែបកសិទេសចរណ៍ ដ្បិតងាយរកទីផ្សារ និងមានតម្លៃថ្លៃ ខុសពីដំណាំបែបកសិឧស្សាហកម្ម។ លោកពន្យល់យ៉ាងដូច្នេះថា៖« ដំណាំមួយចំនួនជួបបញ្ហា ហើយជាបញ្ហាធំ ឧទាហរណ៍ ស្វាយ ដំឡូងមី ម្រេច ស្វាយចន្ទី ជារឿងមួយពិបាកដោះស្រាយ ហើយបន្ទាយស្រីខ្លួនឯងក៏មិនដឹងដោះស្រាយដែរ យោងតម្លៃទីផ្សារធ្លាក់អត់មានជម្រើសទេ យើងខ្ញុំជំរុញកសិករបន្ទាយស្រីងាកមកដាំផលិតផលណាមួយដែលមានតម្លៃខ្ពស់ ហើយវាមិនឡើងចុះខ្លាំង»។
កសិករនៅស្រុកបន្ទាយស្រីបានចងក្រងជាសហគមន៍ក្នុងការដាំដំណាំតាសក់ផ្អែម ដើម្បីងាយស្រួលរក្សាតម្លៃក្នុងទីផ្សារ និងការផ្គត់ផ្គង់ជាដើម។ លោក ប៊ូ ម៉ាន បញ្ជាក់ថា ក្នុងមួយវគ្គៗកសិករមួយគ្រួសារដែលដាំខ្នាតធំអាចដាំតាសក់ផ្អែមបានចន្លោះពី២០ទៅ៣០តោន ហើយឆ្នាស់គ្នាដាំជាបន្តបន្ទាប់មិនដាច់ឡើយ។ ក្នុងមួយឆ្នាំៗ ការដាំតាសក់ផ្អែមអាចធ្វើឆ្នាស់គ្នាប្រមាណ៣០ដង ដែលមានរយៈពេលចន្លោះ២ខែទៅ២ខែជាង។ ដ្បិតថា បច្ចុប្បន្នដំណាំតាសក់ផ្អែមកំពុងមានបញ្ហាទីផ្សារក្ដី តែកសិករអ្នកដាំបញ្ជាក់ថា ពួកគេបន្ដដាំទៀតមិនរួញរាឡើយ ព្រោះមិនចង់បោះបង់ដំណាំមួយនេះ។
សម្រាប់លោក ហ្វីណង់ នេះជាមោនកភាពរបស់លោក ដែលសឹងតែមិនជឿថាអាចជួយកសិករពេលកំពុងមានបញ្ហាស្ទះទីផ្សារបែបនេះ។ អ្វីដែលលោក ហ្វីណង់ ចង់បានពីកិច្ចការទាំងនេះគឺប្រជាជនខ្មែរចេះជួយប្រជាជនខ្មែរដូចគ្នា ជួយទិញផលិតផលកសិកម្មរបស់ពលរដ្ឋខ្លួន ដោះស្រាយបញ្ហារួមគ្នា ហើយលោកសង្ឃឹមថានិន្នាការនេះនឹងបន្តមានរហូត៕