ជាតិ
បទយកការណ៍ / បទសម្ភាសន៍
រូបថត ព្រះអង្គផ្តល់ឲ្យ
×![]()
ភ្នំពេញ៖ សម្រាប់អ្នកជំនួញ ភាពជោគជ័យរបស់គេ គឺមុខរបររបស់ពួកគេមានប្រាក់ចំណេញ។ តែនៅក្នុងព្រះពុទ្ធសាសនា ភាពជោគជ័យពិតប្រាកដ គឺមានទាំងប្រាក់ចំណេញ និងផ្តល់អត្ថប្រយោជន៍ដល់អ្នកដទៃ និងសង្គម។ ព្រះតេជព្រះគុណ សុខ សុផៃ មានសង្ឃដីកាថា ការប្រកបរបរដែលបំផ្លាញអ្នកដទៃ មិនមែនជាភាពជោគជ័យនោះទេ។ តើអ្វីជាភាពជោគជ័យពិតប្រាកដសម្រាប់ជីវិត?
សូមអញ្ជើញស្ដាប់បទសម្ភាសរវាង លោក រ៉ឹម ភារី និង ព្រះតេជគុណ សុខ សុផៃ ដូចតទៅ៖
បច្ចុប្បន្ន មនុស្សតែងតែឱ្យតម្លៃលើភាពជោគជ័យទៅលើមុខរបរ ឬមុខជំនួញ។ តែសម្រាប់ភាពជោគជ័យសំខាន់ជាងនេះនោះ គឺការចេះគ្រប់គ្រងខ្លួនឯង។ ព្រះពុទ្ធទ្រង់សម្តែងថា«ការគ្រប់គ្រងខ្លួនឯងបាន ជាកំពូលមនុស្ស»។ នេះជាសង្ឃដីការរបស់ព្រះតេជគុណ សុខ សុផៃ ដែលគង់នៅវត្តនិគ្រោធវ័ន ហៅវត្តគល់ទទឹង ក្នុងខណ្ឌច្បារអំពៅនៃរាជធានីភ្នំពេញ។
បើតាមសង្ឃដីការបស់ព្រះតេជគុណ គោលការណ៍នៃភាពជោគជ័យតាមទ្រឹស្តីពុទ្ធសាសនា គឺទាល់តែអាចយកឈ្នះខ្លួនផង និងឈ្នះអ្នកដទៃផង ពោលគឺការធ្វើឲ្យខ្លួនឯង និងអ្នកដទៃមានសេចក្តីសុខ។
ព្រះតេជគុណពន្យល់ថា៖ «ទ្រឹស្តីពុទ្ធសាសនាចែងថា ធម្មតារបស់ក្នុងលោកមិនទៀងទេ។ ដូច្នេះ ត្រូវមានភាពជោគជ័យក្នុងខ្លួនឯង ពោល គឺត្រូវត្រៀមខ្លួនដើម្បីទទួលស្គាល់ការពិតនៃរឿងរ៉ាវ។ រឿងរ៉ាងក្នុងលោក វាតែងតែប្រែប្រួលហើយ យើងមិនអាចជោគជ័យមួយជីវិតទេ។ វាតែងតែមានភាពបរាជ័យខ្លះ ឬជួបរឿងស្មុគស្មាញខ្លះ។ ពេលយើងមានជ័យជម្នះលើខ្លួនឯង មានន័យថា គ្រប់គ្រងខ្លួនឯងបាន ពេលជួបរឿងទុក្ខ យើងមិនសូវកើតទុក្ខ។ អាហ្នឹង ជោគជ័យក្នុងមុខជំនួញហើយ ជោគជ័យលើខ្លួនឯងទៀត។ ជោគជ័យនេះ មិនត្រឹមតែសម្រាប់សុភមង្គលខ្លួនឯងទេ សូម្បីអ្នកនៅជុំវិញខ្លួនយើងក៏មានសុភមង្គលដែរ»។
នៅពេលដែលសួរថា តើការប្រកបរបរទុច្ចរិតទទួលបានជោគជ័យ អាចចាត់ទុកថា ជារឿងជោគជ័យសម្រាប់ជីវិតដែរឬទេ? ព្រះតេជគុណ សុខ សុផៃ មានសង្ឃដីកាថា ព្រះពុទ្ធមិនគាំទ្រភាពជោគជ័យនៅលើគំនរទុក្ខអ្នកដទៃនោះទេ។
បើតាមទ្រឹស្តីពុទ្ធសាសនា ការងារ៥យ៉ាង រួមមាន៖ ការជួញដូរមនុស្ស ការជួយដូរសត្វ ការជួញដូរគ្រឿងញៀន និងគ្រឿងស្រវឹង ការជួញដូរថ្នាំពិសនិងថ្នាំពុល និងការជួញដូរអាវុធ សុទ្ធសឹងជាការងារ ដែលបានបានបៀតបៀនអ្នកដទៃ និងផ្តល់ទុក្ខទោសដល់អ្នកដទៃ។ តាមទ្រឹស្តីព្រះពុទ្ធសាសនា មនុស្សត្រូវប្រកបការងារត្រឹមត្រូវ (សម្មាអាជីវៈ) មានន័យថា ការងារដែលផ្តល់ប្រយោជន៍ដល់ខ្លួនផង មិនធ្វើឲ្យអ្នកដទៃឈឺចាប់ និងផ្តល់ប្រយោជន៍ដល់សង្គមផងដែរ៕
Tag:
ជោគជ័យ
ពុទ្ធសាសនា
© រក្សាសិទ្ធិដោយ thmeythmey.com
