អន្តរជាតិ
កូរ៉េខាងត្បូង រកឃើញអ្នកឆ្លង COVID-19 ៨៧ករណីបន្ថែម, សរុប ៤៣៣ករណី មន្ត្រីសុខាភិបាលកូរ៉េខាងត្បូង បាញ់សម្លាប់មេរោគនៅមុខវិហារសាសនាគ្រឹស្ត Shincheonji ក្រុង Daegu នៅថ្ងៃ ២០ ខែកុម្ភៈ (AFP)
× គិតត្រឹមរសៀលថ្ងៃសៅរ៍ទី២២ កុម្ភៈ អាជ្ញាធរសុខាភិបាលកូរ៉េខាងត្បូង បានរកឃើញករណីឆ្លងជំងឺផ្លូវដង្ហើមបង្កឡើងដោយកូរ៉ូណាវីរុស (COVID-19) ចំនួន ៨៧ករណីបន្ថែមទៀត។ បើបូកតួលេខករណីឆ្លងកាលពីព្រឹកមិញដែលមាន១៤២ករណីនោះ ករណីឆ្លងសរុបសម្រាប់ថ្ងៃសៅរ៍នេះ បានឡើងដល់២២៩ករណី។ តួលេខថ្មីនេះ បានធ្វើឲ្យចំនួនអ្នកជំងឺ COVID-19 ទូទាំងប្រទេសកូរ៉េខាងត្បូងឡើងដល់ ៤៣៣នាក់ហើយ។ បន្ថែមពីតួលេខឆ្លងនេះ កូរ៉េខាងត្បូង កាលពីសុក្រក៏បានប្រកាសពីករណីស្លាប់ទី២ ដោយសារវីរុសនេះផងដែរ។
ជាមួយតួលេខអ្នកឆ្លងជំងឺដល់ជាង៤០០នាក់នេះ កូរ៉េខាងត្បូងបានក្លាយជាប្រទេសឆ្លង COVID-19 ច្រើនបំផុតបន្ទាប់ពីចិន។ ទាក់ទិនរឿងនេះ អភិបាលក្រុង Daegu ក្រុងធំបំផុតលំដាប់ទី៤របស់កូរ៉េខាងត្បូង ជាមួយប្រជាជនជាង២,៨លាននាក់ បានអំពាវនាវឲ្យពលរដ្ឋសម្ងំក្នុងផ្ទះ និងបញ្ចៀសការដើរហើរ ប្រសិនបើមិនចាំបាច់។
សូមបញ្ជាក់ថា ប្រទេសចិនទាំងមូល មានករណីឆ្លង COVID-19 ចំនួនជាង៧៦០០០នាក់ ខណៈអ្នកស្លាប់មាន២៣៤៥នាក់ ។ កូរ៉េខាងត្បូងឈរលេខមួយជាមួយតួលេខថ្មី ៤៤៣នាក់ ខណៈជប៉ុនបន្តពីក្រោយ ១០៩ករណី ហើយសិង្ហបុរីឈរលេខរៀងបន្ទាប់ ៨៦ករណី។ ដោយឡែកអ្នកឆ្លង COVID-19 លើនាវាទេសចរណ៍ដែលចតនៅជប៉ុន Diamond Princess មាន ៦៣៤ ករណី ហើយ២នាក់ស្លាប់៕
© រក្សាសិទ្ធិដោយ thmeythmey.com