អន្តរជាតិ
COVID-19៖ អ្នកស្លាប់ឡើងដល់២៤៥៩នាក់ ដោយអ៊ីរ៉ង់ អ៊ីតាលី និងកូរ៉េខាងត្បូង កាន់តែរាលដាល រូបថត Xinhua
× អ្នកស្លាប់ដោយសារជំងឺរលាកសួតបង្កដោយមេរោគកូរ៉ូណាប្រភេទថ្មី (COVID-19) ឡើងដល់២៤៥៩នាក់ ហើយ បើគិតត្រឹមម៉ោង៧ និង១០នាទី ព្រឹកថ្ងៃអាទិត្យ ទី២៣ ខែកុម្ភៈ នេះ ដោយចិន មានអ្នកស្លាប់ជិត១០០នាក់បន្ថែមទៀតបើប្រៀបធៀបកាលពីម្សិលមិញ។ ក្រៅពីករណីនៅចិន និងជប៉ុន (ជាមួយនាវា Diamond Princess) អ៊ីរ៉ង់មានអ្នកស្លាប់៦នាក់ កូរ៉េខាងត្បូង និងអ៊ីតាលី មានអ្នក២នាក់រៀងៗខ្លួន ខណៈករណីឆ្លងត្រូវបានរកឃើញជាបន្តបន្ទាប់។
ទិន្នន័យគណៈកម្មកាសុខាភិបាលជាតិចិន បង្ហាញផងដែរថា តួលេខអ្នកជំងឺកើនឡើងដល់ប្រមាណ៧៩ ០០០នាក់ នៅប្រទេសចំនួន២៩ ដោយភាគច្រើនបំផុតនៅចិន ជាពិសេសនៅក្រុងវូហានដែលជាកន្លែងផ្ទុះជំងឺ។ អ្នកជំងឺប្រមាណ១២ ០០០នាក់ ត្រូវបានរាយការណ៍ថា ស្ថិតក្នុងស្ថានភាពគ្រោះថ្នាក់ និងប្រមាណ២៣ ០០០នាក់ បានសះស្បើយ និងត្រូវបានអនុញ្ញាតឲ្យចេញពីមន្ទីរពេទ្យ។
បច្ចុប្បន្ន អ្នកស្លាប់២៤៤៤នាក់ស្ថិតក្នុងប្រទេសចិន ដោយភាគច្រើនបំផុតនៅក្រុងវូហាន ខេត្តហ៊ូប៉ី ហើយតំបន់រដ្ឋបាលពិសេសចិន គឺហុងកុងមាន២ករណី និងតៃវ៉ាន់មាន១ករណី។ក្រៅពីចិន មាននៅអ៊ីរ៉ង់៦ករណី ជប៉ុន៣ករណី (អ្នកដំណើរលើនាវា Diamond Princess ២ករណី) កូរ៉េខាងត្បូង២ករណី អ៊ីតាលី២ករណី បន្ទាប់មកមាន បារាំង និងហ្វីលីពីន ដែលមាន១ករណីរៀងៗខ្លួន។
ក្រៅពីចិន និងរដ្ឋបាលពិសេសហុងកុង ម៉ាកាវ និងតៃវ៉ាន់ ប្រទេស២៨ផ្សេងទៀតដែលមានអ្នកជំងឺកូរ៉ូណាវីរុសរួមមាន ជប៉ុន (បញ្ចូលទាំងអ្នកជំងឺនៅលើនាវាទេសចរណ៍ Diamond Princess) ថៃ សិង្ហបុរី កូរ៉េខាងត្បូង អូស្ត្រាលី ម៉ាឡេស៊ី បារាំង សហរដ្ឋអាមេរិក អាល្លឺម៉ង់ វៀតណាម អេមីរ៉ាតអារ៉ាប់រួម កាណាដា អ៊ីតាលី រុស្ស៊ី ចក្រភពអង់គ្លេស កម្ពុជា ហ្វាំងឡង់ ឥណ្ឌា ណេប៉ាល់ ហ្វីលីពីន ស្រីលង្កា ស៊ុយអែត អេស្ប៉ាញ បែលហ្ស៊ិក អេហ្ស៊ីប អ៊ីរ៉ង់ អ៊ីស្រាអែល និងលីបង់។
ទីភ្នាក់ងារព័ត៌មានតួកគី Anadolu បានរាយការណ៍ពីករណីដំបូងនៅអ៊ីរ៉ាក់ ដោយអ្នកជំងឺជានិស្សិតម្នាក់ដែលទើបធ្វើដំណើរចេញពីក្រុង Qom របស់អ៊ីរ៉ង់ ប៉ុន្តែរដ្ឋាភិបាលអ៊ីរ៉ាក់មិនទាន់បានប្រកាសផ្លូវការនោះឡើយ៕
© រក្សាសិទ្ធិដោយ thmeythmey.com