អន្តរជាតិ
COVID-19៖ កូរ៉េខាងត្បូង បន្តរកឃើញ ២ករណីស្លាប់ និងអ្នកឆ្លង ១២៣ករណីបន្ថែម មន្ត្រីសុខាភិបាលកូរ៉េខាងត្បូង បាញ់សម្លាប់មេរោគនៅមុខវិហារសាសនាគ្រឹស្ត Shincheonji ក្រុង Daegu។ រូបភាព៖ AFP
× កូរ៉េខាងត្បូង នាថ្ងៃទី២៣ ខែកុម្ភៈ បានរកឃើញករណីស្លាប់ដោយសារ COVID-19 ចំនួន ២ករណីបន្ថែមទៀត ខណៈពេលប្រទេសមួយនេះ នៅតែបន្តរកឃើញអ្នកឆ្លងជំងឺថ្មីនេះរហូតដល់ ១២៣ករណី។ ភាគច្រើននៃអ្នកឆ្លងថ្មីនេះ គឺមានពាក់ព័ន្ធទៅនឹងវិហារសាសនាShincheonji ក្នុងក្រុង Daegu កូរ៉េខាងត្បូង។
ក្នុងរយៈពេលប៉ុន្មានថ្ងៃចុងក្រោយនេះ កូរ៉េខាងត្បូងបន្តរកឃើញអ្នកផ្ទុក COVID-19 និងករណីស្លាប់ដោយជំងឺថ្មីនេះជាបន្តបន្ទាប់។ គ្រាន់តែថ្ងៃទី២២ ខែកុម្ភៈ អាជ្ញាធរសុខាភិបាលកូរ៉េខាងត្បូង បានរកឃើញអ្នកឆ្លង ៨៧ករណី។ ចំណែកនៅថ្ងៃទី២៣ ខែកុម្ភៈនេះ កូរ៉េខាងត្បូងបន្តរកឃើញអ្នកស្លាប់ចំនួន ២ករណី និងអ្នកឆ្លង មានរហូតដល់ទៅ ១២៣ករណី។ ការណ៍នេះ ធ្វើឲ្យចំនួនសរុបនៃអ្នកស្លាប់ដោយសារកូរ៉ូណាវីរុស បានកើនដល់ ៤នាក់ ខណៈអ្នកឆ្លង៥៥៦នាក់។
ក្នុងចំណោមអ្នកជំងឺឆ្លងថ្មី ១២៣នាក់នេះ ៧៥ករណីមានពាក់ព័ន្ធទៅនឹងព្រះវិហារសាសនា Shincheonji ក្នុងក្រុង Daegu។ បើតាមការអះអាងរបស់មជ្ឈមណ្ឌលទប់ស្កាត់ និងបង្ការជំងឺឆ្លងកូរ៉េខាងត្បូង ប្រជាជនក្រុង Daegu យ៉ាងហោចណាច់ ៩ពាន់នាក់ បានធ្វើចត្តាឡីស័កខ្លួនឯង ដើម្បីបង្ការការឆ្លងទៅអ្នកដទៃ។ ជាការពិត ការឆ្លងនៅក្នុងព្រះវិហារសាសនានេះ គឺមានពាក់ព័ន្ធទៅនឹងស្ត្រីករណីទី៣១ ដែលបានចម្លងមនុស្សជាច្រើននាក់ នៅក្នុងក្រុង Daegu។
ពាក់ព័ន្ធនឹងបញ្ហានេះ កូរ៉េខាងត្បូងនៅថ្ងៃទី២២ ខែកុម្ភៈ បានប្រកាសដាក់ក្រុង Daegu និងតំបន់ Cheongdo ជា «តំបន់ថែទាំពិសេស»។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។
សូមបញ្ជាក់ថា កូរ៉េខាងត្បូងនាព្រឹកថ្ងៃទី២៣ ខែកុម្ភៈនេះ បានធ្វើរោគវិនិច្ឆ័យ និងដាក់ចត្តាឡីស័កមនុស្សចំនួនជាង ៦ពាន់នាក់។ កូរ៉េខាងត្បូងបានសង្ស័យថា ពលរដ្ឋរបស់ខ្លួនចំនួន ២២៦៣៣នាក់ មានផ្ទុកCOVID-19 ប៉ុន្តែពលរដ្ឋចំនួន ១៦០៣៨នាក់ ក្នុងចំណោមនោះ ត្រូវបានគេរកឃើញថាគ្មានផ្ទុកកូរ៉ូណាវីរុស។ មកដល់ពេលនេះ កូរ៉េខាងត្បូង បានអនុញ្ញាតឲ្យអ្នកជំងឺចំនួន ១៨នាក់ ចាកចេញពីមន្ទីពេទ្យហើយ៕
Tag:
កូរ៉េខាងត្បូង
COVID-19
© រក្សាសិទ្ធិដោយ thmeythmey.com