អន្តរជាតិ
រដ្ឋមន្ត្រីជប៉ុន ចេញមុខសុំទោស បន្ទាប់ពីស្ត្រីម្នាក់ចាកចេញពីនាវា Diamond Princess មានផ្ទុក COVID-19 នាវាទេសចរណ៍ Diamond Princess។ រូបភាព៖ Reuters
× រដ្ឋមន្ត្រីសុខាភិបាលជប៉ុន នាថ្ងៃទី ២២ ខែកុម្ភៈ បានចេញមុខជាសាធារណៈ បន្ទាប់ពីគេរកឃើញស្ត្រីម្នាក់ដែលបានចាកចេញពីនាវា Diamond Princess មានផ្ទុក COVID-19 ដែលបង្កដោយកូរ៉ូណាវីរុស។ ទាក់ទងទៅនឹងបញ្ហានេះ អាជ្ញាធរខេត្តរបស់ជប៉ុន បានទទូចឲ្យរដ្ឋាភិបាលរឹតបន្តឹងថែមទៀត លើការធ្វើរោគវិនិច្ឆ័យជនសង្ស័យ ដែលមានផ្ទុក COVID-19 និងមនុស្សផ្សេងទៀត។
អ្នកដំណើរក្នុងនាវាទេសចរណ៍ Diamond Princess ត្រូវបានជប៉ុនអនុញ្ញាតឲ្យចាកចេញពីនាវាតាំងពីថ្ងៃទី១៩ ខែកុម្ភៈ មកម្លេះ ខណៈពេលចំនួនអ្នកឆ្លង COVID-19 បានកើនដល់ ៦៣៤ករណី និងមានអ្នកស្លាប់ ២ករណី។ មុននឹងចាកចេញពីនាវា អ្នកដំណើរទាំងអស់ ត្រូវបានពិនិត្យដោយក្រុមវេជ្ជបណ្ឌិតជាមុនសិន ដើម្បីធានាគ្មានកូរ៉ូណាវីរុស។
ពាក់ព័ន្ធនឹងបញ្ហានេះ ជប៉ុន បានរកឃើញស្ត្រីវ័យជាង ៦០ឆ្នាំម្នាក់ មានផ្ទុក COVID-19 នៅខេត្ត Tochigi ភាគខាងជើងទីក្រុងតូក្យូ បន្ទាប់ពីចាកចេញពីនាវា Diamond Princess នាថ្ងៃទី១៩ ខែកុម្ភៈ។
តាមរយៈសន្និសីទកាសែតនាទីក្រុងតូក្យូ នៅថ្ងៃទី២២ ខែកុម្ភៈ លោករដ្ឋមន្ត្រីសុខាភិបាលជប៉ុន Katsunobu Kato បានបញ្ជាក់ថា មនុស្សចំនួន ២៣នាក់ ដែលបានចាកចេញពីនាវានៅថ្ងៃទី១៩ និង ២០ ខែកុម្ភៈ មិនធ្លាប់ត្រូវបានអាជ្ញាធរជប៉ុនធ្វើរោគវិនិច្ឆ័យ តាំងពីមុនថ្ងៃទី៥ ខែកុម្ភៈមកម្លេះ ហើយអាជ្ញាធរ ក៏បានស្វែងរកពួកគេយកមកធ្វើរកវិនិច្ឆ័យម្តងទៀតផងដែរ។
ដោយមានបញ្ហានេះកើតឡើង លោករដ្ឋមន្ត្រីរូបនេះ បានបញ្ជាក់យ៉ាងដូច្នេះថា៖ «យើងសុំទោស ចំពោះស្ថានការណ៍ ដែលបង្កដោយកំហុសអចេតនារបស់យើង»។ បើតាមលោកKatsunobu អាជ្ញាធរសុខាភិបាល នឹងចាត់វិធានការសំខាន់ៗទាំងអស់ ដើម្បីការពិនិត្យជនសង្ស័យកើតកូរ៉ូណាវីរុសទ្វេដង ដើម្បីទប់ស្កាត់ និងការពារមិនឲ្យរឿងបែបនេះកើតឡើងម្តងទៀត។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ចំណែកលោកអភិបាលខេត្ត Tochigi វិញ បានជំរុញឲ្យរដ្ឋាភិបាលជប៉ុនរឹងបន្តឹងបន្ថែមទៀតជុំវិញបញ្ហានេះ ដើម្បីបង្ការករណីឆ្លងនៅក្នុងប្រទេស និងទទូចឲ្យរដ្ឋាភិបាលចាត់វិធានការគ្រប់បែបយ៉ាង។
សូមបញ្ជាក់ថា នាវា Diamond Princess ដែលមានផ្ទុកមនុស្សចំនួនជាង ៣៧០០នាក់ បានចាកចេញពីកំពង់ផែ Yokohama នាថ្ងៃទី២០ ខែមករា និងបានធ្វើដំណើរទៅហុងកុង វៀតណាម និងតៃវ៉ាន់ មុនពេលត្រលប់មកកំពង់ផែ Yokohama វិញនៅថ្ងៃទី៣ ខែកុម្ភៈ មុនពេលរដ្ឋាភិបាលជប៉ុនឃាត់ទុកនៅកំពង់ផែ Yokohama៕
© រក្សាសិទ្ធិដោយ thmeythmey.com