អន្តរជាតិ
COVID-19៖ ៣ករណីដំបូងនៅកូវ៉ែត និង១ករណីដំបូងនៅបារ៉ែន ដែលសុទ្ធតែមានប្រភពពីអ៊ីរ៉ង់ រដ្ឋមន្ត្រីក្រសួងសុខាភិបាលកូវ៉ែត Sheikh Basel al-Sabah នាសន្និសីទសារព័ត៌មានកន្លងមក។ រូបថត AFP
× ក្រសួងសុខាភិបាលកូវ៉ែត និងបារ៉ែន នៅថ្ងៃចន្ទ ទី២៤ ខែកុម្ភៈ នេះ បានប្រកាសពីការរកឃើញអ្នកកើតកូរ៉ូណាវីរុស (COVID-19) ដំបូងនៅប្រទេសរៀងៗខ្លួន ដោយកូវ៉ែតមាន៣ករណី រីឯបារ៉ែន មាន១ករណី។
បីករណីដំបូងនៅកូវ៉ែត មានពលរដ្ឋកូវ៉ែតអាយុ៥៣ឆ្នាំ ពលរដ្ឋអារ៉ាប៊ីសាអូឌីតអាយុ៦១ឆ្នាំ និងម្នាក់ទៀតអាយុ២១ឆ្នាំ ដែលមិនមានការបញ្ជាក់ច្បាស់ពីសញ្ជាតិ។ ក្រសួងសុខាភិបាលកូវ៉ែត បានបញ្ជាក់ថា ករណីទាំងបី សុទ្ធតែទើបធ្វើដំណើរពីក្រុង Mashhad ប្រទេសអ៊ីរ៉ង់។
ដូចគ្នាផងដែរ ទីភ្នាក់ងារព័ត៌មាន BNA របស់បារ៉ែន បានដកស្រង់ប្រភពពីក្រសួងសុខាភិបាល ទាក់ទងនឹងការធ្វើតេស្តវិជ្ជមានពលរដ្ឋបារ៉ែនម្នាក់ ដោយនេះជាករណីដំបូងក្នុងប្រទេសមួយនេះ។ អ្នកជំងឺបានធ្វើតេស្តសុខភាពនៅមជ្ឈមណ្ឌលសុខភាព Ebrahim Khalil Kanoo បន្ទាប់ពីធ្វើដំណើរមកពីអ៊ីរ៉ង់៕
© រក្សាសិទ្ធិដោយ thmeythmey.com