កូឡុំប៊ីជាទីតាំងដ៏គ្រោះថ្នាក់ជាងគេក្នុងពិភពលោកសម្រាប់សកម្មជនដែលព្យាយាមការពារដី និងបរិស្ថានធម្មជាតិ។ បើគិតចាប់តាំងពីខែមករា មក សកម្មជនការពារសិទ្ធិមនុស្ស និងមេដឹកនាំសហគមន៍ជាង៤០នាក់ ត្រូវបានសម្លាប់។ នេះបើតាមរបាយការណ៍មួយដែលត្រូវបានដកស្រង់ដោយសារព័ត៌មាន NBC។
បណ្តាញការពារសិទ្ធិមនុស្សអៀរឡង់ Front Line Defenders បានលើកឡើងពីករណីដ៏គ្រោះថ្នាក់របស់សកម្មជនបរិស្ថាន ជាពិសេសថ្នាក់ដឹកនាំសហគមន៍ជនជាតិដើមភាគតិចនៅកូឡុំប៊ី នៅពេលដែលពួកគេព្យាយាមការពារផលប្រយោជន៍សហគមន៍ ជាពិសេសការប្រឆាំងការរុករានឧទ្យានជាតិ រ៉ែធម្មជាតិ និងតំបន់ដែលជនជាតិដើមភាគតិចរស់នៅ។
មានមូលដ្ឋាននៅក្រុង Bogota អង្គការកសាងសន្តិភាព Indepaz បានរកឃើញថា មនុស្សជាង៤០នាក់ត្រូវបានសម្លាប់ ដោយអ្នកទាំងនោះ ជាសកម្មជនការពារសិទ្ធិមនុស្ស និងថ្នាក់ដឹកនាំសហគមន៍។ ស្ត្រីម្នាក់ឈ្មោះ Nidia Becerra ដែលតស៊ូដើម្បីប្រឆាំងការកាប់បំផ្លាញព្រៃឈើ និងការរុករានរករ៉ែខុសច្បាប់ បានអះអាងថា ជីវិតរបស់ខ្លួនប្រឈមនឹងមរណៈគ្រប់ពេលវេលា។
យោងតាមការផ្សាយរបស់ NBC, Becerra តែងតែប្រុងប្រយ័ត្នជានិច្ចនៅពេលធ្វើដំណើរ ដោយភាគច្រើនអមជាមួយកងកម្លាំងប្រដាប់អាវុធ ដែលផ្តល់ដោយរដ្ឋាភិបាល ឬពីការចូលរួមពីសំណាក់ពលរដ្ឋជនជាតិដើមភាគតិចដែលគាត់ជួយការពារផលប្រយោជន៍។
អស់រយៈពេលប៉ុន្មានឆ្នាំកន្លងមកនេះ Becerra ទទួលការហៅចូល និងសារគំរាមកំហែងរាប់ពាន់លើក ហើយថែមទាំងមានសំបុត្រគំរាមសម្លាប់ដែលផ្ញើទុកចោលនៅមុខទ្វារផ្ទះរបស់គាត់ផងដែរ។ នៅឆ្នាំ២០១៤ ខ្មាន់កាំភ្លើងម្នាក់ បានបាញ់ប្រហារទៅលើគាត់ ប៉ុន្តែមិនបណ្តាលឲ្យមានគ្រោះថ្នាក់ឡើយ។
សកម្មជនការពារបរិស្ថានតែងតែជាគោលដៅនៃការគំរាមសម្លាប់នៅទូទាំងពិភពលោក ដោយកាលពីខែមុន អ្នកអភិរក្សមេអំបៅ (Monarch Butterfly) ពីរនាក់ត្រូវបានសម្លាប់នៅម៉ិកស៊ិក រីឯនៅនីហ្គារ៉ាហ្គោ ពលរដ្ឋជនជាតិដើមភាគតិច៦នាក់នៅតំបន់អភិរក្សធនធានធម្មជាតិ ត្រូវខ្មាន់កាំភ្លើងសម្លាប់ផងដែរ។
យោងតាម Front Line Defenders សកម្មជនជាង៣០០នាក់ក្នុង៣១ប្រទេសត្រូវបានសម្លាប់កាលពីឆ្នាំងមុន ដោយភាគច្រើនជាសកម្មជនការពារបរិស្ថាន។ ប្រទេសដែលរងគ្រោះខ្លាំង បន្ទាប់ពីកូឡុំប៊ី រួមមាន ហ្វីលីពីន ហុងឌូរ៉ាស ម៉ិកស៊ិច និងប្រេស៊ីល។
សកម្មជននៅកូឡុំប៊ី បានអះអាងផងដែរថា បើទោះបីជាពួកគេមិនទទួលបានការគំរាមកំហែងអាយុជីវិតរបស់ពួកគេដោយផ្ទាល់ក៏ដោយ ប៉ុន្តែក៏សារគំរាមសម្លាប់ រំលោភ ក្រុមគ្រួសាររបស់ពួកគេផងដែរ។
អ្វីដែលជាបញ្ហានោះ ដោយសារតែតំបន់មួយចំនួនធំនៅកូឡុំប៊ី ត្រូវបានគ្រប់គ្រងដោយកងទ័ពបដិវត្តប្រជាជនកូឡុំប៊ី (FARC) ដែលមានជម្លោះជាមួយរដ្ឋាភិបាល។ ពួកគេតែងតែយាយីដល់ការរស់នៅរបស់សហគមន៍ជនជាតិដើមភាគតិច៕