ជាតិ
សម្តេច ស ខេង ស្នើឲ្យគ្រប់ភាគីដែលធ្វើផ្លូវ គិតគូររៀបប្រព័ន្ធចរាចរណ៍ផងដែរ ក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០១៩ របស់រដ្ឋបាលខេត្តបាត់ដំបង នាព្រឹកថ្ងៃទី២៦កុម្ភៈ ឆ្នាំ២០២០ ។
× ភ្នំពេញ៖ សម្តេច ស ខេង រដ្ឋមន្ត្រីក្រសួងមហាផ្ទៃ បានទាមទារឲ្យក្រសួង-ស្ថាប័នពាក់ព័ន្ធ ដែលមានតួនាទីរៀបចំការចំណាយក្នុងការធ្វើផ្លូវនីមួយៗ គិតបញ្ចូលទាំងគម្រោងចំណាយនៃការរៀបចំប្រព័ន្ធចរាចរណ៍ផងដែរ។ រដ្ឋមន្ត្រីរូបនេះ សង្កត់ធ្ងន់ថា គ្រប់ភាគីទាំងអស់ដែលពាក់ព័ន្ធក្នុងការធ្វើផ្លូវ ចាំបាច់ត្រូវផ្តល់អាទិភាពដល់ស្លាកសញ្ញាចរាចរណ៍ ហើយមិនត្រូវយកស្លាកផ្សាយពាណិជ្ជកម្ម មកដាក់បាំងពីមុខស្លាកសញ្ញាចរាចរណ៍ឡើយ។
ក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០១៩ របស់រដ្ឋបាលខេត្តបាត់ដំបង នាព្រឹកថ្ងៃទី២៦ ខែកុម្ភៈ ឆ្នាំ២០២០ សម្តេច ស ខេង ដែលមានឋានៈជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកផងនោះ បានកត់សម្គាល់ឃើញថា ក្នុងពេលធ្វើផ្លូវម្តងៗ ប្រហែលក្រសួងពាក់ព័ន្ធ មិនបានបញ្ជូលគម្រោងថវិកា ដើម្បីចំណាយទៅលើការដាក់ភ្លើងសញ្ញាចរាចរណ៍ នៅកន្លែងទីប្រជុំជន ទីក្រុង ឬក៏កន្លែងដែលមិនមានស្លាកសញ្ញាសម្រាប់ចរាចរណ៍នោះទេ។ រដ្ឋមន្ត្រីមហាផ្ទៃរូបនេះ បន្តថា ស្លាកសញ្ញាចរាចរណ៍នៅលើផ្លូវ និងនៅតាមដងផ្លូវនានា គឺនៅខ្វះច្រើនណាស់។
សម្តេច មានប្រសាសន៍ដូច្នេះថា៖«នេះគឺជាកម្មវត្ថុមួយ ដែលយើង ជជែក ពិភាក្សាគ្នា ថាតើត្រូវធ្វើយ៉ាងម៉េច...អាចទៅរួចទេ ក្នុងពេលដែលធ្វើផ្លូវជាតិមួយ ផ្លូវខេត្តមួយ តម្លៃផ្លូវមួយត្រូវគិតទាំងការធ្វើផ្លូវចាក់កៅស៊ូ ចាក់បេតុងនោះផង ហើយក៏គិតទាំងស្លាកសញ្ញាចរាចរណ៍នោះផង ឲ្យហើយតែម្តងទៅ ជៀសវាងពេលធ្វើផ្លូវរួចហើយ ដល់ពេលរៀបចំស្លាកសញ្ញាចរាចរណ៍ អត់មានលុយ»។ សម្តេច បានបន្ថែមថា មកដល់ពេលនេះ ផ្លូវនៅកន្លែងខ្លះ ត្រូវចាំបាច់ដាក់កាមេរ៉ានៅនឹងកន្លែង មិនមែនកាមេរ៉ាចល័តនោះទេ ដើម្បីចាប់លឿន។
ប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោករូបនេះ ទទួលស្គាល់ថាការធ្វើផ្លូវ គឺដើម្បីបម្រើដល់ការធ្វើដំណើរ ការដឹកជញ្ជូន និង ដំណើរទេសចរណ៍ជាដើម ប៉ុន្តែបើធ្វើផ្លូវហើយ មិនបំពាក់ឧបករណ៍ឬក៏ស្លាកសញ្ញាចរាចរណ៍ត្រឹមត្រូវ វា ប៉ះពាល់ជីវិតមនុស្ស មានន័យថា ការអភិវឌ្ឍមិនគ្រប់ជ្រុងជ្រោយ ដែលលែងមានសុវត្ថិភាព ក្នុងការធ្វើដំណើរ។ សម្តេច យល់ថា វា ជាបញ្ហាដែលត្រូវជជែកគ្នាបន្ថែមទៀតជាមួយក្រសួង-ស្ថាប័នពាក់ព័ន្ធ ពិសេសគឺទាក់ទងនឹងការសិក្សាអំពីវិសោធនកម្មច្បាប់ចរាចរណ៍ផ្លូវគោក៕
Tag:
ស្លាកសញ្ញាចរាចរណ៍
ស្លាកផ្សាយពាណិជ្ជកម្ម
ស ខេង
© រក្សាសិទ្ធិដោយ thmeythmey.com