ជប៉ុន ផ្តល់ជំនួយជាង១,៤លានដុល្លារ លើវិស័យកសិកម្ម អាហារូបត្ថម្ភ និង បោសសម្អាតមីន

ជាតិ

ជប៉ុន ផ្តល់ជំនួយជាង១,៤លានដុល្លារ លើវិស័យកសិកម្ម អាហារូបត្ថម្ភ និង បោសសម្អាតមីន

26, Feb 2020 , 8:19 pm

រូបភាព

ពិធីចុះហត្ថលេខារវាង លោក ម៉ាសាហ៊ីរ៉ូ ឯកអគ្គរាជទូតជប៉ុនប្រចាំកម្ពុជា (អង្គុយពាក់អាវខ្មៅ) និង លោក ស៊ុអេណាហ្គា ណូរិយូស៊ី ប្រធានតំណាងអង្គការ JMAS

ដោយ: ឡាយ សុភាវតី

ភ្នំពេញ៖ ជប៉ុនផ្ដល់ជំនួនឥតសំណងជាង១,៤លានដុល្លារ សម្រាប់ជួយលើវិស័យកសិកម្ម អាហារូបត្ថម្ភ និង បោសសម្អាតមីន នៅក្នុងខេត្តកំពង់ឆ្នាំង កំពង់ធំ និង កំពង់ចាម។

លោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំកម្ពុជា ប្រារព្ធពិធីចុះហត្ថលេខាប្រគល់ជំនួយនេះ ដល់អង្គការ៣ នៅស្ថានទូតជប៉ុន នាថ្ងៃទី២៦ ខែកុម្ភៈ ឆ្នាំ២០២០។

អង្គការមូលនិធិសម្រាប់ការអភិវឌ្ឍន៍និងជំនួយសង្គ្រោះអន្តរជាតិ (FIDR) ទទួលបានជំនួយជាង២៦ម៉ឺនដុល្លារ។ ជំនួយនេះ គឺសម្រាប់គម្រោងសន្តិសុខស្បៀងនិងអាហារូបត្ថម្ភក្នុងខេត្តកំពង់ឆ្នាំង រយៈពេលឆ្នាំទី៣។ លោកឯកអគ្គរាជទូត បានលើកឡើងក្នុងពិធីចុះហត្ថលេខាថា អង្គការ FIDR រួមចំណែកយ៉ាងសំខាន់ក្នុងការលើកកម្ពស់ជីវភាពពលរដ្ឋ ដោយបានណែនាំធ្វើកសិកម្មនិងស្ថានភាពសុខភាព តាមការអប់រំអនាម័យនិងអាហារូបត្ថម្ភក្នុងខេត្តកំពង់ឆ្នាំង។

លោក មានប្រសាសន៍ថា៖«ឆ្នាំនេះ ជាឆ្នាំចុងក្រោយ សម្រាប់គម្រោងនេះ ដូច្នេះយើងរំពឹងតំបន់គោលដៅអភិវឌ្ឍប្រកបដោយចីរភាព តាមរយៈការជំរុញរក្សាឲ្យបានបច្ចេកទេស និងចំណេះដឹងពីរឆ្នាំកន្លងមក និងពង្រឹងការបណ្ដុះបណ្ដាលអ្នកដឹកនាំក្នុងតំបន រួមទាំងធ្វើបណ្ដាញប្រជាជននិងប្រជាជន ដើម្បីអភិវឌ្ឍថែមទៀត ក្នុងតំបន់ក្រោយគម្រោងនេះបញ្ចប់»។

ការថតរូបជុំគ្នារវាងក្រុមអង្គការ FIDR ជាមួយឯកអគ្គរាជទូតជប៉ុនប្រចាំកម្ពុជា

ចំណែក អង្គការសកម្មភាពកម្ចាត់មីនជប៉ុន (JMAS) ទទួលបានជំនួយជាង៧២ម៉ឺនដុល្លារ សម្រាប់គម្រោងផ្ទេរបច្ចេកទេសមេកានិចគ្រប់ជ្រុងជ្រោយ ក្នុងការបោសសម្អាតមីននៅខេត្តកំពង់ធំ ឆ្នាំទី៣។ លោកឯកអគ្គរដ្ឋទូត បានបញ្ជាក់ថា គម្រោងផ្ទេរបច្ចេកទេសនេះ ក៏ជាឆ្នាំចុងក្រោយដែរ សម្រាប់ការផ្ទេរបច្ចេកទេសទៅដល់មជ្ឈមណ្ឌលសកម្មភាពកម្ចាត់មីនកម្ពុជា (CMAC)។ លោក បង្ហាញក្តីរំពឹងថា៖«តាមរយៈគម្រោងនេះ សហគមន៍មូលដ្ឋាន នឹងមិនមានការភ័យខ្លាចពីមីននិងអាវុធយុទ្ធភណ្ឌមិនទាន់ផ្ទុះទេ ហើយនឹងមានការអភិវឌ្ឍសហគមន៍បន្ថែម»។

រីឯ វិទ្យាស្ថានកែលម្អនិងអភិរក្សបរិស្ថាន (ERECON) ទទួលបានជំនួយជាង៤៣ម៉ឺនដុល្លារ សម្រាប់គម្រោងលើកកម្ពស់ស្ថានភាពកសិកម្មប្រកបដោយចីរភាព ដើម្បីកាត់បន្ថយភាពក្រីក្រ ក្នុងខេត្តកំពង់ចាម រយៈពេលឆ្នាំទី៣។ លោកឯកអគ្គរាជទូត និយាយថា គម្រោងរបស់ ERECON គឺឆ្នាំចុងក្រោយដូចគ្នា ហើយលោក សង្ឃឹមថា ERECON នឹងជំរុញការផ្សព្វផ្សាយអំពីវិធីប្រើប្រាស់ឡើងវិញនូវធនធានធម្មជាតិដល់កសិករធម្មតា និងលក់ផលិតផលកសិកម្មតាមរយៈប្រព័ន្ធចែកចាយ៕