កីឡាជាតិ
ជាតិ
លោក Conor Nestor (រូបក្នុងរង្វង់ខាងលើ) និងគ្រូជំនួយក្រុម Bali United, រូបភាពពីក្លិបបាល់ទាត់ព្រះខ័នរាជស្វាយរៀង
×![]()
លោក Eko Purdjianto គ្រូជំនួយក្រុម Bali United សរសើរទម្រង់លេងវាយបករបស់ព្រះខ័នរាជស្វាយរៀង ដែលជួយក្រុមនេះអាចយកឈ្នះក្រុមខ្លួនក្នុងលទ្ធផល ២-១ នាការប្រកួតពូល G នៃពានរង្វាន់ AFC Cup កាលពីថ្ងៃពុធ ម្សិលមិញ។ ផ្ទុយទៅវិញលោក Conor Nestor គ្រូបង្វឹកព្រះខ័នរាជស្វាយរៀង ហាក់មិនពេញចិត្តចំពោះទម្រង់លេងនេះឡើយ។ 
នាសន្និសីទសារព័ត៌មានក្រោយជំនួបព្រះខ័នរាជស្វាយរៀងយកឈ្នះ Bali United ២-១ លោក Eko Purdjianto គ្រូជំនួយ ក្រុម Bali United សរសើរព្រះខ័នរាជស្វាយរៀងថា ជាក្រុមមានសមត្ថភាពខ្លាំង និងមានការរៀបចំបានល្អ។ លើសពីនេះលោកសរសើរលើប្រព័ន្ធលេងវាយបករបស់ក្រុមមានមូលដ្ឋាននៅខេត្តស្វាយរៀងមួយនេះ។ លោកអះអាងថាប្រព័ន្ធលេងវាយបករបស់ស្វាយរៀងមានគុណភាពខ្ពស់ ដែលបានបង្កគ្រោះថ្នាក់ដល់ក្រុមរបស់លោក។
គ្រូជំនួយរូបនេះសង្កេតឃើញថា កូនក្រុមរបស់លោកបានបង្កកំហុសមួយចំនួននៅតំបន់ការពារក្នុងតង់ទី១ ដែលហុចឱកាសឲ្យកីឡាករព្រះខ័នរាជស្វាយរៀងអាចរកគ្រាប់បាល់នាំមុខ ២-០ នៅតង់ទី១។ ការលើកឡើងបែបនេះ ទំនងជាលោកចង់សំដៅទៅលើគ្រាប់បាល់ទីពីររបស់ព្រះខ័នរាជស្វាយរៀង ដែលខ្សែប្រយុទ្ធ Jean Befolo Mbarga បានឆាបយកបាល់ក្រោយការបញ្ចូនរបស់កីឡាករ Bali ទៅតំបន់ការពារ។
តែយ៉ាងណាគ្រូជំនួយរូបនេះ ទទួលស្គាល់ថា ការប្រកួតជាមួយព្រះខ័នរាជស្វាយរៀង គឺមានភាពតានតឹងនិងលំបាកខ្លាំងសម្រាប់ក្រុម Bali ដ្បិតពួកគេបិទបានយ៉ាងល្អមិនឲ្យកីឡាកររបស់ Bali លេងស្រួលនោះទេ ទោះបីក្រុមនេះបានគ្រប់គ្រងបាល់បានច្រើនក្នុងតង់ទី២ក៏ដោយ។ លោក ហាក់ខកចិត្តជាមួយកីឡាកររបស់លោក ដែលទទួលបានឱកាសជាច្រើន តែធ្វើមិនបានសម្រេច។
«ខ្ញុំបាននិយាយរួចហើយ វាមិនមែនជារឿងងាយស្រួលឡើយក្នុងការលេងជាមួយ ព្រះខ័នរាជស្វាយរៀង។ វាជាការប្រកួតដ៏ល្អ និងលំបាកខ្លាំងសម្រាប់ Bali ប៉ុន្តែយើងបានបង្កើតឱកាសជាច្រើន តែធ្វើមិនបានសម្រេច នេះគឺជាបាល់ទាត់។ នៅតង់ទី១ យើងបានបង្កើតកំហុសដល់ទៅពីរ និងមិនអាចរកគ្រាប់បាល់បាន។ ប៉ុន្តែនៅតង់ទី២ យើងធ្វើបានល្អជាងមុន និងអាចរកបាន១គ្រាប់»។ នេះជាការលើកឡើងរបស់លោក Eko Purdjianto។
ផ្ទុយទៅវិញ គ្រូបង្វឹកក្រុមព្រះខ័នរាជស្វាយរៀង លោក Conor Nestor ហាក់មិនពេញចិត្តចំពោះទម្រង់លេងបែបវាយបករបស់កូនក្រុមឡើយ ទោះបីពួកគេអាចជួយឲ្យស្វាយរៀងទទួលបានជ័យជម្នះក្នុងការប្រកួតនេះក៏ដោយ។ សម្រាប់លោកការប្រើទម្រង់លេងវាយបកនេះ គឺបង្ហាញពីភាពកំសោយរបស់កីឡាករក្នុងការគ្រប់គ្រងបាល់ ឬលេងប្រយុទ្ធតបទល់ជាមួយគូប្រកួត។
គ្រូបង្វឹកសញ្ជាតិអៀរឡង់រូបនេះ ក៏បានបង្ហាញអារម្មណ៍មិនពេញចិត្តផងដែរ ចំពោះទម្រង់លេងបែបការពាររបស់កូនក្រុមនៅតង់ទី២។ លោក Conor Nestor អះអាងថា លោកមិនបានរៀបចំឲ្យប្រើទម្រង់លេងបែបការពារនោះទេ ពោលគឺកាលៈទេសៈបង្ខំឲ្យកីឡាករលេងបែបនេះ ក្រោយរងការដាក់សម្ពាធខ្លាំងពីសំណាក់ក្រុម Bali United។ សម្រាប់ លោកការលេងបែបការពារមិនមែនជាការលេងដោយល្បិចកលនោះទេ ហើយការលេងបែបនេះ បង្ខំឲ្យកីឡាករត្រូវធ្វើការច្រើនជាងមុន ដើម្បីទប់ទល់នឹងការវាយសម្រុករបស់គូប្រកួត។
តែយ៉ាងណា គ្រូបង្វឹករូបនេះ សរសើរការខិតខំប្រឹងប្រែងរបស់កីឡាករព្រះខ័នរាជស្វាយរៀង ដែលអាចទប់មិនឲ្យមានការស៊ុតបញ្ចូលទីពីក្រុម Bali United ដែលព្យាយាមដាក់សម្ពាធមកលើពួកគេ។ មិនត្រឹមតែប៉ុណ្ណោះពួកគេ ថែមទាំងអាចរកគ្រាប់បាល់នាំជ័យជម្នះជូនក្រុម និងអ្នកគាំទ្រទៀតផង។ ជាមួយគ្នានេះ លោក ក៏បានអរគុណផងដែរដល់អ្នកគាំទ្រ ដែលបានមកជួយលើកទឺកចិត្ត និងផ្តល់កម្លាំងចិត្តឲ្យកីឡាករ រហូតអាចធ្វើរឿងដ៏អស្ចារ្យមួយនេះជូនជាតិមាតុភូមិ៕
Tag:
AFC Cup 2020
Conor Nestor
Eko Purdjianto
© រក្សាសិទ្ធិដោយ thmeythmey.com
