ពីនេះ ពីនោះ
ព័ត៍មានសុខភាព
តើអ្វីទៅដែលនៅពីក្រោយមួយថ្ងៃញ៉ាំផ្លែប៉ោមមួយផ្លែ នឹងមិនត្រូវការគ្រូពេទ្យព្យាបាលជំងឺទៅ?
× របបអាហារមានតុល្យភាពរួមមានអាហារបានមកពីក្រុមអាហារទាំងអស់ដូចជា បន្លែ ផ្លែឈើ សាច់ ឬអាហារធ្វើពីទឹកដោះគោ។ល។ តែផ្លែឈើជាប្រភពដ៏សំខាន់បំផុតនៃជីវជាតិដែលរាងកាយត្រូវការ។ ផ្លែឈើផ្តល់នូវជាតិសរសៃ វីតាមីន អង់ទីអុកស៊ីដង់ និងជាតិរ៉ែដែលមានប្រយោជន៍ចំពោះសុខភាពច្រើន។ ផ្លែឈើមួយដែលមានប្រយោជន៍ខ្លាំងគឺជាផ្លែប៉ោមតែម្តង ហើយវាក៏ត្រូវបានគេពេញនិយមច្រើនជាងគេដែរ បូករួមនឹងប្រយោជន៍ចំពោះសុខភាពយ៉ាងច្រើន។
ដូច្នេះតើវាមានប្រយោជន៍អ្វីខ្លះទៅ?
ផ្លែប៉ោមគឺជាផ្លែឈើមានជីវជាតិបំផុត
រាងកាយរបស់យើងត្រូវការមីក្រូជីវជាតិដើម្បីធ្វើការបានកាន់តែល្អ។ ជីវជាតិមួយនេះមិនត្រូវបានផលិតចេញដោយរាងកាយយើងឡើយតែវាត្រូវការដើម្បីរាងកាយធ្វើការងារជាច្រើន។ ដូច្នេះហើយ ទើបរាងកាយត្រូវការអាហារដែលយើងញ៉ាំដើម្បីទទួលបានជីវជាតិមួយនេះ។ នេះជាហេតុផលមួយដែលវាគឺជារឿងសំខាន់បំផុតក្នុងការញ៉ាំអាហារមានជីវជាតិច្រើន និងជីវជាតិច្រើនប្រភេទ ហើយអាហារមួយនោះគឺជាផ្លែប៉ោមតែម្តង ព្រោះវាមានជាតិវីតាមីន រ៉ែ យ៉ាងច្រើន។ នៅពេលរាងកាយទទួលបានជីវជាតិសំខាន់ៗទាំងអស់តាមតម្រូវការរាងកាយ វានឹងធ្វើឲ្យរាងកាយធ្វើការកាន់តែមានប្រសិទ្ធភាព រក្សារាងកាយឲ្យមានសុខភាពល្អ និងបន្ថយការកើតជំងឺ។
ជួយដល់ការសម្រកទម្ងន់
ផ្លែប៉ោមក៏មានសមត្ថភាពជំនួយដល់ការសម្រកទម្ងន់ផងដែរ។ វាសម្បូរទៅដោយជាតិសរសៃដែលអាចជួយឲ្យយើងឆាប់ឆ្អែតបានយូរ។ មានក៏មានកាឡូរីទាបផងដែរ ដូច្នេះនឹងអាចជួយដល់ការសម្រកទម្ងន់បាន។ ភាពធាត់ជ្រុលគឺជាកត្តាប្រឈមមុខមួយសម្រាប់ជំងឺរ៉ាំរ៉ៃជាច្រើនរួមទាំងទឹកនោមផ្អែម និងមហារីកផងដែរ។ ដូច្នេះហើយ ការសម្រកទម្ងន់អាចជួយការពារជំងឺទាំងនេះបាន។ ផ្លែប៉ោមក៏ដើរតួនាទីជា Prebiotic ដែលអាចបង្កើនសុខភាពរបស់បាក់តេរីក្នុងពោះវៀន និងជួយឲ្យរំលាយអាហារកាន់តែល្អជាងមុនថែមទៀត។ កាលណាការរំលាយអាហារកាន់តែល្អ នឹងជំរុញដល់ការសម្រកទម្ងន់។
ល្អចំពោះបេះដូង
យោងទៅតាមការសិក្សាបានឲ្យដឹងថា ផ្លែប៉ោមផ្ទុកទៅដោយជាតិសរសៃរលាយ ដែលអាចជួយបន្ថយកូឡេស្តេរ៉ុលអាក្រក់ក្នុងរាងកាយបាន។ អង់ទីអុកស៊ីដង់ក្នុងផ្លែប៉ោមក៏ប្រហែលជាជួយថែរក្សាសម្ពាធឈាម និងពង្រឹងដល់មុខងាររបស់បេះដូងទៀត។ ការសិក្សាក៏បានរកឃើញថា អ្នកញ៉ាំផ្លែប៉ោមមានការថយចុះការប្រឈមនឹងជំងឺដាច់សរសៃឈាមខួរក្បាល។
ជួយប្រឆាំងនឹងជំងឺហឺត
ផ្លែប៉ោមសម្បូរទៅដោយអង់ទីអុកស៊ីដង់ ហើយអង់ទីអុកស៊ីដង់នេះនឹងជួយបន្ថយការខូចខាតដោយសារអុកស៊ីតកម្មរបស់សួត ព្រមទាំងអាចបន្ថយការប្រឈមនឹងជំងឺហឺត និងទប់ស្កាត់ជំងឺកាន់តែល្អ។ ការញ៉ាំផ្លែប៉ោមមួយថ្ងៃមួយផ្លែត្រូវបានគេដឹងថាអាចបន្ថយការប្រឈមនឹងជំងឺហឺតបាន ១០ភាគរយដែរ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com