ជាតិ
សិល្បះ
ក្រុមនិស្សិតសាកលវិទ្យាល័យជាតិគ្រប់គ្រង បានលេខ១ ក្នុងកម្មវិធី «យុវជនដើម្បីវប្បធម៌ជាតិ» ជ័យលាភីទាំង៣ក្រុម (រូបពីក្រសួងវប្បធម៌ និងវិចិត្រសិល្បៈ)
× ភ្នំពេញ៖ ការប្រកួតប្រជែងសមត្ថភាពយល់ដឹងលើវិស័យសិល្បៈវប្បធម៌ជាតិ លើប្រធានបទ «យុវជនដើម្បីវប្បធម៌ជាតិ» បានរកឃើញម្ចាស់ជ័យលាភីលេខ១ លេខ២ និងលេខ៣ហើយ ដែលវគ្គផ្ដាច់ព្រ័ត្របានបញ្ចប់នៅថ្ងៃទី២៥ ខែកុម្ភៈ។ ការប្រកួតប្រជែងសមត្ថភាពនេះ ធ្វើឡើងដើម្បីអបអរសាទរទិវាវប្បធម៌ជាតិ៣មីនាលើកទី២២ ឆ្នាំ២០២០នេះ។
ការប្រកួតប្រជែងសមត្ថភាពយល់ដឹង លើវិស័យសិល្បៈវប្បធម៌ជាតិ ដែលមាន៣វគ្គ ក្រោមប្រធានបទ «យុវជនដើម្បីវប្បធម៌ជាតិ» មានសាកលវិទ្យាល័យនិងវិទ្យាស្ថានចំនួន១២ ចូលរួម និងបានជម្រុះនៅសល់តែ៣សាកលវិទ្យាល័យ ដើម្បីដណ្ដើមយកពានរង្វាន់។
សាកលវិទ្យាល័យទាំង៣ដែលទទួលបានជ័យលាភីរួមមាន សាកលវិទ្យាល័យជាតិគ្រប់គ្រង ដណ្ដើមបានចំណាត់លេខ១ ហើយសាកលវិទ្យាល័យប៊ែលធីអន្តរជាតិ បានលេខ២ ចំណែកចំណាត់ថ្នាក់លេខ៣ គឺបានទៅលើសាកលវិទ្យាល័យភ្នំពេញអន្តរជាតិ។
លោក ប្រាក់ សុណ្ណារ៉ា រដ្ឋលេខាធិការនៃក្រសួងវប្បធម៌ និងវិចិត្រសិល្បៈ បានប្រាប់សារព័ត៌មានថ្មីៗថា ការប្រកួតប្រជែងនេះធ្វើឡើងដោយចែកចេញជា៣ដំណាក់កាលឬ៣វគ្គ ដោយវគ្គនីមួយៗមានសំណួរផ្សេងៗគ្នា ប៉ុន្តែសុទ្ធតែផ្ដោតលើសិល្បៈវប្បធម៌ជាតិ។
យុវជននៃសកលវិទ្យាល័យជាតិគ្រប់គ្រង ដែលទទួលបានជ័យលាភីលេខ១(រូបពីក្រសួងវប្បធម៌ និងវិចិត្រសិល្បៈ)
លោកពន្យល់៖«សំណួររបស់យើងផ្ដោតលើការអភិរក្សលើមូលដ្ឋានអភិវឌ្ឍន៍ ឬអភិវឌ្ឍន៍លើមូលដ្ឋានអភិរក្ស ដូចជា ថា តើផលប៉ះពាល់ចំពោះតំបន់រមណីយដ្ឋានវប្បធម៌ ក្នុងដំណាក់កាលប្រទេសជាតិកំពុងមានការអភិវឌ្ឍលើគ្រប់វិស័យក្រោមម្លប់សន្តិភាព កើតឡើងដោយកត្តាអ្វីខ្លះ? តើប្អូនមានវិធានឬដំណោះស្រាយយ៉ាងណា ចំពោះបញ្ហានេះ? ខ្ញុំសុំសរសើរប្អូនៗដែលមកប្រកួតប្រជែង គាត់មានចំណេះដឹងច្រើនពាក់ព័ន្ធនឹងវប្បធម៌ជាតិ។ តែទោះជាយ៉ាងណាគាត់ក៏នៅមានចំណុចខ្វះខាតខ្លះដែរ ហើយគណៈកម្មការបានបំពេញបន្ថែមលើចំណុចទាំងនោះដែរជូនពួកគាត់ ដើម្បីឱ្យគាត់ពង្រីកចំណេះដឹងបន្ថែម»។
សម្រាប់ការវាយតម្លៃដាក់ពិន្ទុវិញ លោក ប្រាក់ សុណ្ណារ៉ា បានបញ្ជាក់ដូច្នេះ៖«គណៈកម្មការ៧រូប ដែលមកពីក្រសួងវប្បធម៌ និងវិចិត្រសិល្បៈ ដាក់ពិន្ទុទៅលើសំណេរ ខ្លឹមសារ កាយវិកា ការលើកដាក់សំឡេង ការគោរពពេលវេលា និងទៅលើសំណួរចម្លើយ»។
រដ្ឋលេខាធិការក្រសួងវប្បធម៌រូបនេះ បានសង្កត់ធ្ងន់ថា ការចូលរួមរបស់យុវជន ក្នុងការផ្សព្វផ្សាយចំណេះដឹងដែលខ្លួនមានលើវិស័យសិល្បៈវប្បធម៌ ទៅកាន់សាច់ញាតិ មិត្តភ័ក្ដិ និងមនុស្សដែលនៅជុំវិញខ្លួន គឺជារឿងដ៏សំខាន់ ដើម្បីថែរក្សាការពារ អភិរក្សក៏ដូចជាអភិវឌ្ឍន៍ សិល្បៈវប្បធម៌ជាតិឱ្យកាន់តែរុងរឿង៕
យុវជននៃសកលវិទ្យាល័យប៊ែលធីអន្តរជាតិ ដែលទទួលបានជ័យលាភីលេខ២ (រូបពីក្រសួងវប្បធម៌ និងវិចិត្រសិល្បៈ)
លោក ប្រាក់ សុណ្ណារ៉ា រដ្ឋលេខាធិការ នៃក្រសួងវប្បធម៌ និងវិចិត្រសិល្បៈ (រូបផ្ដល់ឱ្យ)
យុវជននៃសកលវិទ្យាល័យភ្នំពេញអន្តរជាតិ ដែលទទួលបានជ័យលាភីលេខ៣ (រូបពីក្រសួងវប្បធម៌ និងវិចិត្រសិល្បៈ)
គណៈកម្មការវាយតម្លៃទាំង៧រូប ដែលធ្វើការនៅក្រសួងវប្បធម៌ និងវិចិត្រសិល្បៈ (រូបពីក្រសួងវប្បធម៌ និងវិចិត្រសិល្បៈ)
Tag:
វប្បធម៌
សិល្បៈ
ក្រសួងវប្បធម៌
ប្រកួតប្រជែង
© រក្សាសិទ្ធិដោយ thmeythmey.com