រដ្ឋមន្ត្រីសុខាភិបាល ស្នើអភិបាលរាជធានី-ខេត្ត ណែនាំពលរដ្ឋពីការការពារ COVID-19 និង H1N1

COVID-19

ជាតិ

សង្គមជាតិ

រដ្ឋមន្ត្រីសុខាភិបាល ស្នើអភិបាលរាជធានី-ខេត្ត ណែនាំពលរដ្ឋពីការការពារ COVID-19 និង H1N1

27, Feb 2020 , 8:39 pm

រូបភាព

រដ្ឋមន្រ្តីសុខាភិបាល ពេលចុះទៅពិនិត្យម៉ាស៊ីនស្កែនកម្តៅ នៅអាកាសយានដ្ឋានសៀមរា កន្លងមក

ដោយ: ថ្មីៗ

លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានចេញសេចក្តីជម្រាបជូន៣តៗគ្នា ទៅកាន់គ្រប់អភិបាលរាជធានី-ខេត្ត ឲ្យជួយចូលរួមអប់រំណែនាំប្រជាពលរដ្ឋ ពីវិធានការការពារជំងឺ COVID-19 ដែលមានប្រភពដើមនៅចិន និងជំងឺផ្តាសាយបក្សី H1N1 ដែលមានប្រភពដើមនៅវៀតណាម។

តាមរយៈសេចក្តីជម្រាបជូន ដែលធ្វើឡើងនៅថ្ងៃទី២៥ ខែកុម្ភៈ ឆ្នាំ២០២០ លោក ម៉ម ប៊ុនហេង ស្នើឲ្យអភិបាលរាជធានី-ខេត្ត ជំរុញការផ្សព្វផ្សាយព័ត៌មាននិងវិធានការការពារជំងឺ COVID-19 ដល់ប្រជាពលរដ្ឋនៅតាមភូមិ ឃុំ-សង្កាត់ ក្រុង-ស្រុក-ខណ្ឌ និង រាជធានី-ខេត្ត បន្ថែមទៀត។

កាលពីថ្ងៃទី៥ ខែកុម្ភៈ កន្លងមក លោក ម៉ម ប៊ុនហេង ធ្លាប់បានចេញសេចក្តីជម្រាបជូនម្តងរួចមកហើយ ដោយស្នើសុំឲ្យអភិបាលរាជធានី-ខេត្ត ប្រាប់ទៅគ្រប់ប្រធានមន្ទីរសុខាភិបាល ឲ្យផ្អាកធ្វើដំណើរទៅបរទេសមួយរយៈ ទោះស្ថិតក្នុងការបំពេញទស្សនកិច្ច សិក្សារៀនសូត្រផ្លូវការ ឬក្រៅផ្លូវការក៏ដោយ ហើយឲ្យពួកគាត់ មានវត្តមានជាប្រចាំនៅតាមអង្គភាពរៀងៗខ្លួន ដើម្បីត្រៀមលក្ខណៈចាត់ចែងបង្ការទប់ស្កាត់ការចម្លងជំងឺ COVID-19។

រហូតដល់ថ្ងៃទី២៦ ខែកុម្ភៈ លោក ម៉ម ប៊ុនហេង ក៏បានចេញសេចក្តីជម្រាមជូនមួយទៀត ស្នើសុំឲ្យអភិបាលរាជធានី-ខេត្ត អប់រំប្រជាពលរដ្ឋ ពីការបង្ការនិងការទប់ស្កាត់ការឆ្លងជំងឺផ្តាសាយបក្សី H1N1 ជាពិសេសនៅតាមបណ្តាខេត្តជាប់ព្រំដែនជាមួយវៀតណាម ដូចជា កណ្តាល ស្វាយរៀង ព្រៃវែង ត្បូងឃ្មុំ កំពត រតនគិរី មណ្ឌលគិរី កែប និង តាកែវ។

រដ្ឋមន្ត្រីសុខាភិបាល ណែនាំខ្លះៗជាមុនថា ប្រជាពលរដ្ឋ មិនត្រូវទទួលទានសត្វបក្សីឈឺឬងាប់ឡើយ ហើយរាល់ម្ហូបអាហារ ត្រូវចម្អិតឲ្យបានឆ្អិតល្អ។ ប្រជាពលរដ្ឋ ត្រូវលាងដៃឲ្យបានញឹកញាប់ជាមួយសាប៊ូ មុនពេលបរិភោគ ឬបន្ទាប់ពីប៉ះពាល់បក្សី។

លោករដ្ឋមន្រ្តី អះអាងថា កាលពីថ្ងៃទី១៧ ខែកុម្ភៈ ជំងឺផ្តាសាយបក្សី H1N1 បានផ្ទុះឡើងនៅភាគខាងត្បូងនៃប្រទេសវៀតណាម ហើយអាជ្ញាធរវៀតណាម បានកម្ទេចសត្វមាន់ប្រមាណ៥,៥ម៉ឺនក្បាល។

យ៉ាងណា មិនទាន់មានសេចក្តីរាយការណ៍ថា ជំងឺផ្តាសាយបក្សី H1N1 រាលដាលចូលមកដល់កម្ពុជានោះទេ។ ចំណែក ជំងឺ COVID-19 កម្ពុជា បានរកឃើញ១ករណីក្នុងខេត្តព្រះសីហនុ លើបុរសជនជាតិចិនវ័យ៦០ឆ្នាំម្នាក់ កាលពីកន្លងទៅ តែគាត់ ត្រូវបានព្យាបាលឲ្យជាសះស្បើយ និងបានចាកចេញពីកម្ពុជាទៅប្រទេសចិនវិញហើយ។ មិនទាន់មានការអះអាងពីការរកឃើញករណី COVID-19 បន្ថែមនៅកម្ពុជានោះទេ។

គិតមកដល់ពេលនេះ អ្នកស្លាប់ដោសារជំងឺ COVID-19 មានជាង២,៧ពាន់នាក់ ហើយអ្នកឆ្លង មានជាង៨,១ម៉ឺនាក់។

បើប្រជាពលរដ្ឋណាម្នាក់ មានអាការៈគួរឲ្យសង្ស័យ ដូចជា ក្តៅខ្លួនលើសពី៣៨.៥ អស្សាសេ ក្អក ហៀរសំបោរ ពិបាកដកដង្ហើម និង ធ្លាប់ប៉ះពាល់បក្សី ជាដើម ត្រូវហៅទូរស័ព្ទទៅកាន់លេខ១១៥, ០១២ ៤៨៨ ៩៨១, ឬ ០១២ ៨៣៦ ៨៦៨ ដើម្បីសួរព័ត៌មានពីជំងឺ COVID-១៩ ឬ ជំងឺ H1N1៕