Spurs ធានាថា Son នឹងមិនឆ្លង COVID-19 អំឡុងទៅព្យាបាលរបួសនៅកូរ៉េខាងត្បូង

COVID-19

កីឡាអន្តរជាតិ

អន្តរជាតិ

Spurs ធានាថា Son នឹងមិនឆ្លង COVID-19 អំឡុងទៅព្យាបាលរបួសនៅកូរ៉េខាងត្បូង

27, Feb 2020 , 5:29 pm

រូបភាព

ដោយ: ទេព ពិទូរ្យ

Tottenham Hotspur ជឿជាក់ថា Son Heung-min នឹងមិនឆ្លងជំងឺ COVID-19 ទេ បន្ទាប់ពីក្លិបអនុញ្ញាតឲ្យកីឡាកររូបនេះធ្វើដំណើរទៅប្រទេសកូរ៉េខាងត្បូងដើម្បីវះកាត់ និងសម្រាកព្យាបាលរបួស។ ស្រុកកំណើតរបស់ Son មានចម្ងាយប្រមាណតែ២៤០គីឡូម៉ែត្រ ពីតំបន់ដែលរងគ្រោះដោយជំងឺឆ្លងដ៏សាហាវក្នុងប្រទេសនេះ។

អត្ថបទទាក់ទង

Son របួសដៃត្រូវអវត្តមានដល់ចប់រដូវកាល ខណៈ Spurs ត្រូវប្រជែង Top4 និង UCL

ខ្សែប្រយុទ្ធ វ័យ២៧ឆ្នាំរូបនេះបានត្រឡប់ទៅកាន់មាតុភូមិវិញកាលពីសប្តាហ៍មុន ដោយត្រូវចូលក្រុងសេអ៊ូលជាមុបសិនដើម្បីពិនិត្យអាការបាក់ដៃខាងស្តាំរបស់ខ្លួនក្រោយរងរបួសពេល Spurs ប៉ះ Aston Villa នាជំនួបក្នុងក្របខណ្ឌ Premier League។

ការសម្រេចចិត្តអនុញ្ញាតឲ្យ Son ធ្វើដំណើរទៅប្រទេសកំណើតនេះ ស្របពេលមានការរីករាលដាលយ៉ាងខ្លាំងនៃជំងឺរលាកសួតធ្ងន់ធ្ងរបង្កដោយកូរ៉ូណាវីរុសប្រភេទថ្មី (COVID-19) នៅទឹកដីកូរ៉េខាងត្បូង។

Son បច្ចុប្បន្នកំពុងសម្រាកព្យាបាលជំងឺនៅកូរ៉េខាងត្បូង ហើយនឹងត្រូវត្រឡប់ទៅកាន់ប្រទេសអង់គ្លេសវិញនៅសប្តាហ៍នេះ។ ដំណើរវិលត្រឡប់នេះ Spurs បានធានាថា Son នឹងធ្វើតាមគោលការណ៍សុខភាពរបស់រដ្ឋាភិបាល ដ្បិតត្រូវចាកចេញពីប្រទេសដែលកំពុងរងផលប៉ះពាល់ខ្លាំងនៃ COVID-19។ មួយវិញទៀតរូបគេ ក៏មិនត្រូវឲ្យធ្វើចត្តាឡីស័កដែរប្រសិនរកមិនឃើញសញ្ញាអ្វីគួរគត់សម្គាល់នោះ។

ក្លិបរហស្សនាមមាន់ខ្លាយមាស ធានាថាដំណើរទៅកាន់ទ្វីបអាស៊ីរបស់ Son គឺប្រាកដជាមិនឆ្លងជំងឺកូរ៉ូណាវីរុសប្រភេទថ្មី COVID-19 នេះឡើយ។

សូមបញ្ជាក់ថា នៅថ្ងៃទី២៧ ខែកុម្ភៈនេះ អាជ្ញាធរសុខាភិបាលកូរ៉េខាងត្បូង បានរកឃើញមានជំងឺផ្លូវដង្ហើមបង្កឡើងដោយកូរ៉ូណាវីរុសសរុបចំនួន ១៥៩៥នាក់ហើយ។ តួលេខនេះ ជាករណីឆ្លងដែលបានរកឃើញច្រើនបំផុតក្នុងប្រទេសនេះ ចាប់តាំងពីករណីឆ្លងដំបូងបានរកឃើញកាលពីថ្ងៃទី២០ ខែមករា មក៕