ជាតិ
សង្គមជាតិ
បុគ្គលិក City Bus បាត់បង់ការងារដោយសារបន្ទោបង់ទឹកនោមដាក់កង់រថយន្ត
× ភ្នំពេញ៖ អ្នកបើករថយន្តក្រុង (City Bus) របស់រដ្ឋាករស្វយ័តដឹកជញ្ជូនសាធារណៈ បានបាត់បង់ការងារធ្វើ ដោយសារតែរូបថតមួយសន្លឹកដែលចែកចាយពេញបណ្តាញសង្គម។ តាមរូបនៅលើហ្វេសប៊ុក បុគ្គលិក City Bus រូបនោះ បានឈរបន្ទោបង់ទឹកនោមដាក់កង់រថយន្ត នៅផ្លូវមួយក្នុងរាជធានីភ្នំពេញ នាវេលាថ្ងៃត្រង់កាលពីថ្ងៃទី២៧ ខែកុម្ភៈ។
ក្រោយការចែករំលែករូបថតតៗគ្នាពេញបណ្តាញសង្គមជាមួយនឹងការរិះគន់ជាច្រើន រដ្ឋាករស្វយ័ដឹកជញ្ជូនសាធារណៈ បានចេញចំណាត់ការដ៏ម៉ឺងម៉ាត់។ «រដ្ឋាករស្វយ័តដឹកជញ្ជូនសាធារណៈរថយន្តក្រុង (City Bus) រាជធានីភ្នំពេញ បានចាត់វិធានការបញ្ឈប់បុគ្គលិកនេះ ពីរដ្ឋាករចាប់ពីពេលនេះតទៅ។» នេះបើតាមសេចក្តីប្រកាសព័ត៌មាននាថ្ងៃទី២៨ ខែកុម្ភៈ ឆ្នាំ២០២០។
បើតាមសេចក្ដីប្រកាសព័ត៌មានរបស់រដ្ឋាករស្វ័យតដឹកជញ្ជូនសាធារណៈរថយន្តក្រុងចេញថ្ងៃទី២៨ កុម្ភៈនេះ បានសម្រេចបញ្ឈប់ការងារបុរសនេះ ដោយពិនិត្យឃើញថា ប៉ះពាល់ដល់សេចក្ដីថ្លៃថ្នូរ សុជីវធម៌ អនាម័យ សណ្ដាប់ធ្នាប់សាធារណៈ និងសោភ័ណភាពរាជធានីភ្នំពេញ។
សារព័ត៌មានថ្មីៗ មិនទទួលបានការពន្យល់បន្ថែមពីសំណាក់លោក អ៊ាន សុឃីម អភិបាលរដ្ឋករស្វយ័តដឹកជញ្ជូនសាធារណៈ បានឡើយ នារសៀលថ្ងៃទី២៨ ខែកុម្ភៈ នេះ៕
© រក្សាសិទ្ធិដោយ thmeythmey.com