សង្គមអន្តរជាតិ
អន្តរជាតិ
អគ្គនាយក WHO លោក Tedros Adhanom Ghebreyesus (Twitter-WHO)
×![]()
អង្គការសុខភាពពិភពលោក (WHO) បានដំឡើងការវាយតម្លៃហានិភ័យជាសាកលនៃកូរ៉ូណាវីរុសប្រភេទថ្មី (COVID-19) ដល់កម្រិតខ្ពស់បំផុត ខណៈវីរុសនេះបានឆ្លងជិត៦០ប្រទេសនៅទូទាំងពិភពលោក។ គិតត្រឹមព្រឹកថ្ងៃសៅរ៍ទី ២៩ ខែកុម្ភៈ ករណីឆ្លងជំងឺផ្លូវដង្ហើមកូរ៉ូណាសរុបមានជាង៨៤០០០នាក់ហើយ និងស្លាប់ជិត៣ពាន់នាក់។ 
«ឥឡូវនេះ យើងបានសម្រេចដំឡើងការវាយតម្លៃហានិភ័យការរាលដាល និងហានិភ័យផលប៉ះពាល់នៃ COVID-19 ដល់កម្រិតខ្ពស់បំផុត នៅកម្រិតសាកល»។ អគ្គនាយក WHO លោក Tedros Adhanom Ghebreyesus ប្រាប់អ្នកសារព័ត៌មានបែបនេះ។
យ៉ាងណាមិញ លោក បន្តថា៖«យើងពុំទាន់មើលឃើញភស្តុតាងណាមួយនៅឡើយទេពាក់ព័ន្ធនឹងរឿងថា វីរុសនេះ កំពុងផ្ទុះរាលដាលដោយសេរីក្នុងសហគមន៍នានា។ ដរាបណាស្ថានការណ៍ស្ថិតបែបនេះ យើងនៅតែមានឱកាសទប់ស្កាត់វីរុសនេះបាន»។
តាមការចុះផ្សាយរបស់ទីភ្នាក់ងារព័ត៌មាន AFP លោកអគ្គនាយក Tedros និយាយបន្តទៀតថា គន្លឹះដ៏សំខាន់នៃការទប់ស្កាត់វីរុសនេះ គឺបំបែកសង្វាក់នៃការចម្លង។ ត្រង់នេះ លោក សង្កត់ធ្ងន់ពីសារសំខាន់នៃបុគ្គលម្នាក់ៗក្នុងការចាត់វិធានការបង្ការទុកជាមុនដើម្បីបញ្ឈប់ការឆ្លងនៃជំងឺ COVID-19 ។
«សត្រូវធំបំផុតរបស់យើង គឺពុំមែនជា វីរុស (COVID-19) នោះទេ តែវាគឺជាភាពភ័យខ្លាច, ពាក្យចចាមអារ៉ាម និងការរើសអើងក្នុងសង្គម»។ លោក Tedros អះអាងបែបនេះ ដោយបន្ថែមថា ការចាំបាច់បំផុតរបស់ពិភពលោកពេលនេះ គឺជា ការពិត, ហេតុផល និងសាមគ្គីភាព។
ដូចគ្នានេះដែរ អគគ្គលេខាធិការអង្គការសហប្រជាជាតិ លោក Antonio Guterres សង្កត់ធ្ងន់ថា៖«វាពុំមែនជាពេលវេលាសម្រាប់ការភិតភ័យទេ។ វាគឺជាពេលវេលាសម្រាប់ការត្រៀមខ្លួន ហើយត្រៀមខ្លួនយ៉ាងពេញលេញផងដែរ»៕
Tag:
អង្គការសុខភាពពិភពលោក
WHO
Tedros Adhanom Ghebreyesus
© រក្សាសិទ្ធិដោយ thmeythmey.com
