ភ្នំពេញ៖ តំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ នៅហ្សឺណែវ អះអាងប្រាប់គណៈប្រតិភូសហភាពអឺរ៉ុប ថា សិទ្ធិមនុស្ស និងសេរីភាពព័ត៌មាននៅកម្ពុជាល្អប្រសើរ។ តំណាងកម្ពុជា អះអាងបែបនេះ ដើម្បីឆ្លើយតបទៅនឹងគណៈប្រតិភូអឺរ៉ុប (តំណាងក្រូអាស៊ី) អូស្ត្រាលី និងបារាំង ដែលវាយតម្លៃថា ស្ថានភាពសិទ្ធិមនុស្ស និងសារព័ត៌មាននៅកម្ពុជា នៅតែរងការគំរាមកំហែង ក្រោមសម្ពាធរដ្ឋាភិបាល។
លោក អាន សុខខឿន តំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ នៅហ្សឺណែវ ចាត់ទុកការវាយតម្លៃរបស់គណៈប្រតិភូអឺរ៉ុបនេះ ជាការបរិយាយមិនត្រឹមត្រូវពីស្ថានភាពកម្ពុជា តាមរយៈសេចក្តីថ្លែងការណ៍លម្អៀងជ្រើសរើសតែមួយជ្រុង ក្រោមហេតុផលនយោបាយ និងស្ដង់ដារពីរ។
ច្រានចោលការលើកឡើងរបស់អឺរ៉ុបហើយ លោក អាន សុខខឿន បានបន្តអះអាងថា ស្ថានភាពនយោបាយនៅកម្ពុជា មានភាពល្អប្រសើរ តាមរយៈការអនុគ្រោះរបស់រដ្ឋាភិបាល ដល់មន្ត្រីអតីតគណបក្សសង្គ្រោះជាតិ ដែលជាប់បម្រាមធ្វើនយោបាយ ហើយចង់បន្តអាជីពខ្លួនវិញ ពោលគឺរដ្ឋាភិបាលបានស្នើទៅព្រះមហាក្សត្រ ដើម្បីផ្ដល់សម្បទារនយោបាយដល់ពួកគេ។ មកដល់ពេលនេះ មានអតីតសមាជិក៩រូបនៃគណបក្សប្រឆាំង ត្រូវបានផ្ដល់នីតិសម្បទារឡើងវិញ ដោយបានបង្កើតគណបក្សថ្មីហើយ។
តំណាងអចិន្ត្រៃយ៍កម្ពុជាប្រចាំអង្គការសហប្រជាជាតិរូបនេះ បានសង្កត់ធ្ងន់ដូច្នេះថា៖« ស្ថានភាពជាក់ស្ដែង គឺថ លំហនយោបាយបើកទូលាយនៅកម្ពុជា ត្រូវបានលើកកម្ដើងយ៉ាងប្រសើរ»។
ងាកមកនិយាយពីបញ្ហាសេរីភាពប្រព័ន្ធផ្សព្វផ្សាយ និងការបញ្ចេញមតិវិញ លោក អាន សុខខឿន បានអះអាងថា រដ្ឋាភិបាលផ្ដល់សិទ្ធិឱ្យប្រព័ន្ធផ្សព្វផ្សាយប្រហែល១០០០ស្ថាប័ន បើកដំណើរការនៅកម្ពុជា ខណៈវិទ្យុសំឡេងអាមេរិក(VOA) និងវិទ្យុអាស៊ីសេរី(RFA)ផ្សាយជាភាសាខ្មែរ អាចស្ដាប់តាមអនឡាញ ដោយពុំមានការត្រួតពិនិត្យជាមុន។ ដោយឡែករដ្ឋាភិបាល ក៏បានអនុញ្ញាតឱ្យការិយាល័យវិទ្យសំឡេងអាមេរិក(VOA) ចុះបញ្ជិកា កាលពីឆ្នាំ២០១៩ដែរ។ តំណាងកម្ពុជារូបនេះ បានបន្ថែមថា រដ្ឋាភិបាលក៏បើកចំហសេរីភាពឱ្យអ្នកប្រើប្រាស់ហ្វេសប៊ុកជាង៧,៨លានគណនី ដែលជាវេទិកាដ៏មានឥទ្ធិពល សម្រាប់បញ្ចេញមតិយោបល់ជាសាធារណៈទៀតផង ។
«ការថ្លែងសារនយោបាយ និងការបញ្ចេញមតិលើកិច្ចការសាធារណជាមួយនឹងការជេរប្រទេច ញុះញង់ឱ្យមានអំពើហិង្សា ការរើសអើងពូជសាសន៍ និងការអំពាវនាវឱ្យមានការបះបោរប្រឆាំងនឹងរដ្ឋាភិបាល ដែលកើតចេញពីការបោះឆ្នោតជ្រើសរើសដោយប្រជាជន ពុំមែនមានន័យស្មើនឹងសេរីភាពនៃការបញ្ចេញមតិឡើយ»។ នេះជាការបញ្ជាក់របស់លោក អាន សុខខឿន។
ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅទីក្រុងហ្សឺណែវ អ្នកស្រី Michelle Bachelet បានលើកឡើងថា ស្ថានភាពសិទ្ធិមនុស្សនៅកម្ពុជារងការបំភិតបំភ័យ។ លោកស្រី ដែលទទួលបានរបាយការណ៍ជុំវិញបញ្ហាសិទ្ធិមនុស្សនៅកម្ពុជា បានសង្កត់ធ្ងន់ថា អង្គការសិទិ្ធមនុស្សខ្លះ ត្រូវបានអាជ្ញាធររារាំងសកម្មភាពពួកគេ ដោយមិនឱ្យឃ្លាំមើល និងរាយការណ៍ពីបញ្ហានៅកម្ពុជាឡើយ។ បើតាមលោកស្រី Michelle Bachelet គណបក្សនយោបាយ និងអ្នកប្រឆាំងរដ្ឋាភិបាល ក៏ប្រឈមមុខនឹងការចាប់ឃុំខ្លួន ក្រោមហេតុផលអនុវត្តច្បាប់ដោយមិនត្រឹមត្រូវជាដើម។
ដោយសារមើលឃើញពីបញ្ហានេះ ទើបឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សរូបនេះ ស្នើឱ្យមេដឹកនាំកម្ពុជាលើកស្ទួយសិទ្ធិមនុស្ស សេរីភាពសារព័ត៌មាន និងប្រព័ន្ធច្បាប់ឱ្យបានត្រឹមត្រូវ ដោយឈរលើការឆន្ទៈ និងការប្តេជ្ញាចិត្តរបស់រដ្ឋាភិបាលកន្លងមក។
ឆ្លើយតបនឹងការលើកឡើងខាងលើនេះ លោក អាន សុខខឿន អះអាងក្នុងន័យនេះថា រដ្ឋាភិបាលចាត់វិធានការច្បាប់ តែលើមន្ត្រីស្ថាប័ន និងគណបក្សនយោបាយណា ដែលអនុវត្តខុសច្បាប់ប៉ុណ្ណោះ។«នៅកម្ពុជាគ្រប់គណបក្សនយោបាយ អង្គការសង្គមស៊ីវិល និងប្រព័ន្ធផ្សព្វផ្សាយទាំងអស់ ដែលគោរពច្បាប់អាចធ្វើប្រតិបត្តិការដោយសេរី លើកលែងតែស្ថាប័នប្រព្រឹត្តខុសច្បាប់ទេ ដែលត្រូវហាមឃាត់។ ករណីនេះ ក៏ដូចគ្នាទៅនឹងប្រទេសដទៃទៀត ដែលមានវត្តមាននៅក្នុងក្រុមប្រឹក្សាសិទ្ធិមនុស្សនេះដែរ។បទល្មើសគឺជាបទល្មើស ហើយមិនអាចប្រើជាទឡ្ហីករណ៍ សម្រាប់គោលបំណងផ្សេងណាមួយទៀតឡើយ»។ នេះជាការតំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ ។
លោក អាន សុខខឿន ក៏ស្នើឱ្យគណៈប្រតិភូសហភាពអឺរ៉ុប និងបណ្ដាប្រទេសខ្លះ កុំប្រើប្រាស់យន្តការសិទ្ធិមនុស្ស ធ្វើជាឧបករណ៍នយោបាយ ដើម្បីជ្រៀតជ្រែកចូលផ្ទៃក្នុងកម្ពុជា។ លោក សុខខឿន សង្កត់ធ្ងន់ដូច្នេះថា៖«គណៈប្រតិភូយើងខ្ញុំកត់សម្គាល់ឃើញថា បណ្ដាប្រទេសខ្លះមានកំណត់ត្រាមិនទាន់ល្អលើបញ្ហាសិទ្ធិមនុស្សនៅឡើយ មានដូចជាការវាយប្រហារទៅលើសេរីភាពសារព័ត៌មាន ច្បាប់ប្រឆាំងនឹងការធ្វើបាតុកម្ម គោលនយោបាយរើសអើងជនអន្តោប្រវេសន៍ និងការមិនអត់ឱនចំពោះជនជាតិភាគតិច។ បញ្ជីនៃបញ្ហានេះនៅមានបន្តទៀត។ តែទោះជាយ៉ាងនេះក៏ដោយ កម្ពុជាគោរពយ៉ាងខ្ជាប់ខ្ជួននូវគោលការណ៍នៃការមិនធ្វើនយោបាយភាវូបនីយកម្មបញ្ហាសិទ្ធិមនុស្ស។ ក្នុងន័យនេះប្រទេសទាំងនោះ គួរជៀសវាងការប្រើប្រាស់សិទ្ធិមនុស្សជាឧបករណ៍នយោបាយ និងអនុវត្តស្ដង់ដារពីរ ប្រសិនបើយើងចង់បង្កើតបរិយាកាសនៃទំនុកចិត្ត និងភាពជឿជាក់បានរបស់ក្រុមប្រឹក្សាសិទ្ធិមនុស្សនេះ»៕