សួនកេសរកូលភ្នំគូលែន ប្រមូលផ្តុំប្រភេទកេសរកូលព្រៃជាង១០០ប្រភេទ

ជាតិ

សួនកេសរកូលភ្នំគូលែន ប្រមូលផ្តុំប្រភេទកេសរកូលព្រៃជាង១០០ប្រភេទ

02, Mar 2020 , 8:59 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ មជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន ត្រូវបានបង្កើតឡើងនៅដើមឆ្នាំ ២០១៩។ សួនកេសរកូល ឬយើងនិយមហៅ ផ្កាអ័រគេដេ មានទីតាំងស្ថិតនៅជើងភ្នំគូលែន គឺជាសួនកេសរកូលដំបូងគេបង្អស់របស់កម្ពុជា ក្នុងស្រាវជ្រាវ និងអភិរក្សប្រភេទកេសរកូល។ បច្ចុប្បន្ន មានប្រភេទផ្កាកេសរកូលចំនួន ១៤៨ប្រភេទ ដែលបានប្រមូលពីបណ្ដាខេត្តផ្សេងៗជុំវិញកម្ពុជា យកមករក្សាទុកនៅសួននេះ។

រដ្ឋាភិបាលកម្ពុជា តាមរយៈក្រសួងបរិស្ថាន បានបង្កើតមជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន នៅថ្ងៃទី២៣ មករា ឆ្នាំ២០១៩។ សួននេះបង្កើតឡើងក្នុងបំណង ដើម្បីរក្សា និងស្ដារពូជកេសរកូលព្រៃក្នុងស្រុក ប្រមូលផ្ដុំសំណាកកេសរកូលរស់ កត់ត្រា និងធ្វើសារពើភ័ណ្ឌ ជាកន្លែងសម្រាប់ស្រាវជ្រាវ ផ្តល់ចំណេះដឹង និងព័ត៌មានវិទ្យាសាស្ដ្រពីកេសរកូលព្រៃសម្រាប់មនុស្សជំនាន់ក្រោយ និងជាគោលដៅទេសចរណ៍ធម្មជាតិថ្មី។ល។ បច្ចុប្បន្នសួននេះ បានប្រមូលពូជកេសរកូលព្រៃពីតំបន់ភ្នំគូលែន ខេត្តកំពត ខេត្តកោះកុង ខេត្តមណ្ឌលគិរី និងតំបន់ការពារធម្មជាតិផ្សេងទៀតបានចំនួន ១៤៨ប្រភេទ ស្មើនឹងប្រមាណ ៣៥០០ថូ។ ក្នុងនោះ ក៏បាននាំយក និងរក្សាទុកកេសរកូល៣ប្រភេទពីប្រទេសសិង្ហបុរី ដែលមានឈ្មោះថ្នាក់ដឹកនាំសំខាន់ៗ រួមមាន ១. Mayara Prince Norodom Sihanouk ២. Dendrobium Norodom Sihamoni ៣. Pararachnis Hun Sen៕

ខាងក្រោមនេះជាទិដ្ឋភាពជុំវិញមជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន ដែលថតនៅថ្ងៃទី២៩ កុម្ភៈ ឆ្នាំ២០២០ សូមអញ្ជើញទស្សនា៖