អន្តរជាតិ
លោក ត្រាំ និងលោក ចូកូវី ត្រៀមពិភាក្សាគ្នាលើការវិនិយោគអាមេរិកក្នុងរដ្ឋធានីថ្មីរបស់ឥណ្ឌូណេស៊ី
ប្រធានាធិបតីឥណ្ឌូណេស៊ី ចូកូ វីដូដូ ។ រូបភាព Anatara
×![]()
រដ្ឋមន្ត្រីទទួលបន្ទុកកិច្ចការដែនសមុទ្រ និងវិនិយោគឥណ្ឌូណេស៊ី លោក Luhut Pandjaitan បានបង្ហើបឲ្យដឹងថា លោកប្រធានាធិបតី ចូកូ វីដូដូ និង ប្រធានាធិបតីអាមេរិក លោក ដូណាល់ ត្រាំ មានផែនការជួបគ្នានាពេលខាងមុខដ៏ខ្លី ដើម្បីពិភាក្សាលើទំនាក់ទំនងទ្វេភាគី និងចំណាប់អារម្មណ៍របស់អាមេរិកក្នុងការវិនិយោគលើរដ្ឋធានីថ្មីរបស់ឥណ្ឌូណេស៊ី។
តាមការអះអាងរបស់លោករដ្ឋមន្ត្រី Luhut Pandjaitan នៅថ្ងៃទី២៥ ខែកុម្ភៈកន្លងទៅ ប្រមុខដឹកនាំកំពូលឥណ្ឌូណេស៊ី និងអាមេរិក នឹងមានជំនួបមួយជាមួយគ្នា ដើម្បីពិភាក្សាពីទំនាក់ទំនងទ្វេភាគី ជាពិសេសនោះលើគម្រោងវិនិយោគនៅក្នុងរដ្ឋធានីថ្មីរបស់ឥណ្ឌូណេស៊ី ដែលរដ្ឋាភិបាលទើបតែសម្រេចផ្លាស់ប្តូរ។ នេះបើយោងតាមការចុះផ្សាយរបស់សារព័ត៌មានឥណ្ឌូណេស៊ី The Jakarta Post។
តាមប្រភពព័ត៌មានដដែល លោករដ្ឋមន្ត្រី បានគូសបញ្ជាក់ថា ការបង្ហាញពីចំណាប់អារម្មណ៍របស់រដ្ឋាភិបាលអាមេរិកពាក់ព័ន្ធនឹងការអភិវឌ្ឍន៍ក្នុងរដ្ឋធានីថ្មីរបស់ឥណ្ឌូណេស៊ីនេះ ផ្តើមចេញពីការផ្តល់យោបល់ពីទីប្រឹក្សាជាន់ខ្ពស់ និងជាកូនប្រសាររបស់លោកប្រធានាធិបតី ដូណាល់ ត្រាំ គឺលោក Jared Kushner តែម្តង។
លោករដ្ឋមន្ត្រី បានបង្ហាញពីសាវតារនេះទៀតថា ក្នុងកិច្ចប្រជុំជាមួយនឹង លោក Jared Kushner ក្នុងក្រុងវ៉ាស៊ីនតោនកាលពីចុងឆ្នាំមុន លោក បានទទួលការសរសើរពីទីប្រឹក្សារបស់ប្រធានាធិបតីអាមេរិករូបនេះ ដោយលោក បានចាត់ទុកការផ្លាស់ប្តូរដ្ឋធានីនេះ ជាចក្ខុវិស័យវែងឆ្ងាយ និងប្រកបដោយភាបដឹកនាំ។
គួររម្លឹកថា ថ្មីៗនេះ លោកប្រធានាធិបតីឥណ្ឌូណេស៊ី ចូកូ វីដូដូ បានប្រកាសជាផ្លូវការក្នុងការផ្លាស់ប្តូររដ្ឋធានី ពី Jakarta ទៅកោះ Kalimantan។ ចំពោះមុខ ឥណ្ឌូណេស៊ី ត្រូវប្រឈមនឹងបញ្ហាផែនការអភិវឌ្ឍ ដែលទាមទារការចំណាយច្រើន ជាពិសេសនោះ ត្រូវជាមួយនឹងគោលការណ៍អភិវឌ្ឍន៍ដែលលោកប្រធានាធិបតី វីដូដូ ចង់បាន គឺការអភិវឌ្ឍប្រកបដោយភាពបៃតង និងមាននិរន្តភាព៕
Tag:
ឥណ្ឌូណេស៊ី
អាមេរិក
© រក្សាសិទ្ធិដោយ thmeythmey.com
