ជាតិ
ក្រៅពីអ្នកលក់អនឡាញ សម្ដេច ហ៊ុន សែន ក៏ហាមតារាស្លៀកពាក់ស៊ិចស៊ី នៅតាមកញ្ចក់ទូរទស្សន៍ដែរ
× ភ្នំពេញ៖ ពីពិធីប្រគល់សញ្ញាបត្រជូននិស្សិតសាកលវិទ្យាល័យអាស៊ីអឺរ៉ុប នៅព្រឹកថ្ងៃទី២ មីនា សម្ដេចនាយករដ្ឋមន្ត្រី ហ៊ុន សែន បានហាមតារាទាំងអស់ ស្លៀកពាក់ស៊ិចស៊ី បង្ហាញនៅមុខកញ្ចក់ទូរទស្សន៍ ដែលនាំឱ្យប៉ះពាល់វប្បធម៌ខ្មែរ។ ការហាមជាថ្មីរបស់នាយករដ្ឋមន្ត្រី ហ៊ុន សែន នេះធ្វើឡើងក្រោយពីសម្ដេច បានមើលឃើញស្ត្រីជាតារាម្នាក់ ស្លៀកពាក់ខើចលើ ខើចក្រោម នៅក្នុងកម្មវិធីអាថ៌កំបាំងតារារបស់សារព័ត៌មានFresh News។
«ឥឡូវមុនពេល Live (ផ្សាយផ្ទាល់) បើថា តារាហ្នឹងស្លៀកពាក់មិនសមរម្យ(ស៊ិចស៊ី)ទេ កុំLive ហើយចាក់ចម្រៀង(ជំនួស)វ័ធចោលហ្មងទៅ»។ នេះជាការលើកឡើងរបស់សម្ដេច ហ៊ុន សែន ដែលស្នើឱ្យគ្រប់បណ្ដាស្ថានីយ៍ទូរទស្សន៍ និងប្រព័ន្ធផ្សព្វផ្សាយទាំងអស់ ប្រុងប្រយ័ត្នចំពោះការស្លៀកពាក់របស់តារាសិល្បៈ។
សម្រាប់សម្ដេច ហ៊ុន សែន ការស្លៀកពាក់ស៊ិចស៊ីនេះ វានាំឱ្យប៉ះពាល់ដល់វប្បធម៌ប្រពៃណីខ្មែរ និងបង្កើតឱ្យមានការបំពានផ្លូវភេទលើស្ត្រីផងដែរ។ «(ខ្ញុំ)អប់រំតែគ្រប់ទូរទស្សន៍ហ្នឹង កុំឱ្យ(តារា)ស៊ិចស៊ីលើ-ក្រោមខ្លាំងជ្រុល។ ហើយ(អ្នករិះគន់)និយាយឡើងថា វប្បធម៌ខ្មែររលំរលាយហើយ … ចុះបើឯងទៅធ្វើអ៊ីចឹង ធ្វើម៉េចវាមិនរលាយ»។ នេះជាការបញ្ជាក់របស់ប្រមុខរដ្ឋាភិបាល។
កាលពីថ្ងៃទី១៧ កុម្ភៈ នាយករដ្ឋមន្ត្រី ហ៊ុន សែន ក៏បញ្ជាទៅក្រសួងប្រៃសនីយ៍ និងទូរគមនាគមន៍ ឲ្យបិទគណនីហ្វេសប៊ុក ឬបណ្តាញសង្គមផ្សេងទៀត ដែលផ្សាយលក់ផលិតផល ដោយការបញ្ចេញកេរ្តិ៍ខ្មាសផងដែរ។ សម្តេច យល់ថា ការបញ្ចេញកេរ្តិ៍ខ្មាសលើបណ្តាញសង្គម គឺអាចនាំឲ្យមានការចាប់រំលោភ និង ការបំពានផ្លូវភេទលើស្ត្រី។ ក្រោយប្រមុខរដ្ឋាភិបាលចេញបញ្ជាបែបនេះ សមត្ថកិច្ចក៏បានអនុវត្តច្បាប់ ឃាត់ខ្លួនអ្នកលក់អនឡាញ ដែលនៅបន្តស្លៀកពាក់ស៊ិចស៊ី ផ្គើននឹងប្រសាសន៍សម្ដេចផងដែរ។
សាធារណមតិមួយចំនួន រិះគន់វិធានការរបស់រដ្ឋាភិបាលបែបនេះ ថា ជាការរំលោភសិទ្ធិមនុស្ស និងសេរីឯកជន របស់ប្រជាពលរដ្ឋ។ ប៉ុន្តែសម្ដេច ហ៊ុន សែន ច្រានចោលការរិះគន់ទាំងនោះ ដោយសម្ដេច ស្នើឱ្យពួកគេ ទៅមើលច្បាប់ជួញដូរមនុស្សឡើងវិញ។
ថ្លែងក្នុងពិធីប្រគល់សញ្ញាបត្រជូននិស្សិតសាកលវិទ្យាល័យអាស៊ីអឺរ៉ុប នាយករដ្ឋមន្ត្រី បាននិយាយដូច្នេះថា៖«គេថាយើងរំលោភសិទ្ធិមនុស្ស ប៉ុន្តែអ្នកឯងមានបានមើលច្បាប់ អំពីបញ្ហាទាក់ទងនឹងការជួញដូរមនុស្ស ការការពាររក្សាប្រពៃណីទំនៀមទម្លាប់ទេ»។
រដ្ឋាភិបាលលើកទឹកចិត្តពលរដ្ឋបង្កើតមុខរបររកស៊ីលក់ផលិតផលតាមអនឡាញ ព្រោះវាកំពុងដើរស្របតាមគោលនយោបាយ E-Government របស់រដ្ឋាភិបាល។ ប៉ុន្តែការស្លៀកពាក់ស៊ិចស៊ី ទាក់ទាញការចាប់អារម្មណ៍ពីសាធារណជន ដើម្បីលក់ផលិតផលខ្លួនបានច្រើននេះ គឺរដ្ឋាភិបាលមិនគាំទ្រឡើយ។ នេះជាការបញ្ជាក់របស់សម្ដេច ហ៊ុន សែន។
ក្រៅពីស្លៀកពាក់ស៊ិចស៊ី សម្ដេច ហ៊ុន សែន ក៏ផ្ដាំឱ្យតារាទាំងអស់ រៀបចំឥរិយាបទរបស់ខ្លួនឱ្យបានល្អផងដែរ សូម្បីតែការសំពះសាធារណជនជាដើម៕
© រក្សាសិទ្ធិដោយ thmeythmey.com