ជាតិ
រដ្ឋមន្ត្រីកសិកម្ម៖ រដ្ឋនៅបន្តបាត់បង់ដីព្រៃ ដោយសារអ្នកមានអំណាចបំផុសឱ្យពលរដ្ឋទន្ទ្រាញ និងរំលោភកាន់កាប់
×![]()
ដោយ: ធឿន បញ្ញាឬទិ្ធ
ភ្នំពេញ៖ រដ្ឋនៅតែបន្តបាត់បងដីព្រៃ ដោយសារការទន្ទ្រាញ និងរំលោភកាន់កាប់ពីសំណាក់ពលរដ្ឋ ក្រោមការបំផុសបំផុលរបស់អ្នកមានអំណាច។ បញ្ហាបាត់បងដីព្រៃនេះ ត្រូវបានរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន លើកឡើងនៅក្នុងកិច្ចប្រជុំលើកទី២ នៃគណ:កម្មាធិការជាតិដើម្បីទប់ស្កាត់ លុបបំបាត់ និងបង្ក្រាបការកាប់ ឈូសឆាយ និងហ៊ុមព័ទ្ធដីព្រៃឈើ ដើម្បីវាទយកដីធ្វើជាកម្មសិទ្ធិ នៅថ្ងៃទី៣ មីនា។
លោក វេង សាខុន បានសង្កត់ធ្ងន់ថា ទោះបីជារដ្ឋាភិបាល បានដាក់ចេញច្បាប់ លិខិតបទដ្ឋានគតិយុត្ត និងគោលនយោបាយដីធ្លីយ៉ាងណាក្តី ប៉ុន្តែបញ្ហារំលោភកាន់កាប់ដីព្រៃឈើរបស់រដ្ឋ នៅតែកើតមានជាបន្តបន្ទាប់តាមគ្រប់រូបភាពផ្សេងៗរួមមាន ការកាប់រានដីព្រៃឈើធ្វើកសិកម្ម ពាណិជ្ជកម្ម សង់លំនៅឋានជាដើម។ ជាពិសេសគឺជនមានអំណាច ដើរបំផុសចលនាប្រជាពលរដ្ឋក្រីក្រឱ្យកាប់ទន្ទ្រាញដីព្រៃឈើរួចហើយ ធ្វើលិខិតទិញលក់-ផ្ទេរកម្មសិទ្ធិ ដោយមានការបញ្ជាក់ទទួលស្គាល់ពីរដ្ឋអំណាច។
«បញ្ហាទាំងអស់នេះ គឺជាចំណោទធ្ងន់ធ្ងរ ស្មុគស្មាញ ប្រទាក់ក្រឡាគ្នា ដែលធ្វើឱ្យគណ:កម្មាធិការជាតិមានការបារម្ភចំពោះការបាត់បង់ធនធានដីព្រៃឈើជាតិយើងនាពេលអនាគត»។ នេះជាការលើកឡើងរបស់រដ្ឋមន្ត្រីក្រសួងកសិកម្ម។
កន្លងមកក្រសួងបរិស្ថាន ក៏ធ្លាប់លើកឡើងពីបញ្ហាកាន់កាប់រានដីព្រៃខុសច្បាប់ដែរ។ លោក នេត្រ ភក្ត្រា ធ្លាប់បានបញ្ជាក់ថា ជនខិលខូចមួយចំនួន បានប្រើយុទ្ធសាស្ត្រថ្មី ទាញយកប្រយោជន៍ពីសំណុំរឿងដីធ្លីនេះ តាមរយៈ «យុទ្ធសាស្ត្រឈ្នះបានដី ចាញ់បានលុយ»។ ត្រង់ចំណុចនេះលោក នេត្រ ភក្ត្រា ចង់សង្កត់ធ្ងន់ថា នៅពេលដែលក្រុមជនខិលខូច ទិញដីពីពលរដ្ឋយកមកកាន់កាប់ហើយ ប៉ុន្តែដីទាំងនោះ ត្រូវបានរដ្ឋរឹបអូសវិញ ដោយសារជាសម្បត្តិរដ្ឋ ឬស្ថិតនៅក្នុងតំបន់ការពារនោះ វាក៏កើតមានរឿងទំនាស់ដីធ្លីជាមួយរដ្ឋតែម្ដង។ ក្នុងករណីទំនាស់នេះ ពួកគេអាចទទួលបានដី ឬលុយ ដោយរដ្ឋត្រូវចេញសំណង ទោះបីជាពួកគេចាញ់-ឈ្នះក្តី។
រដ្ឋលេខាក្រសួងបរិស្ថានរូបនេះ ក៏ហាមពលរដ្ឋទៅទិញដី ឬឈូសឆាយដីយកធ្វើជាកម្មសិទ្ធិ នៅក្នុងតំបន់ហាមឃាត់របស់រដ្ឋ ដែលនាំតែមានបញ្ហាខាតបង់នោះទេ ព្រោះក្រសួងមិនទទួលស្គាល់លិខិតកម្មសិទ្ធិដីធ្លីនេះឡើយ។
«ក្រសួងបរិស្ថាន សូមគូសបញ្ជាក់ជាថ្មីថា គ្មានជនណាម្នាក់មានសិទ្ធិកាន់កាប់ដីធ្លី ទិញឬលក់ដីធ្លីនៅក្នុងឧទ្យានជាតិ តំបន់ការពារធម្មជាតិ និងតំបន់ប្រើប្រាស់ច្រើនយ៉ាងនៅតាមបណ្ដាខេត្តនានាបានឡើយ»។ នេះជាការបញ្ជាក់របស់លោក នេត្រ ភក្ត្រា ។
កន្លងមកក្រសួងបរិស្ថាន និងអាជ្ញាធរពាក់ព័ន្ធ ក៏បានចាប់ខ្លួនខិលខូចដែលប្រព្រឹត្តបទល្មើសកាន់កាប់ដីរដ្ឋខុសច្បាប់ជាច្រើនករណី បញ្ជូនតុលាការ ដើម្បីចាត់វិធានការតាមច្បាប់ផងដែរ។ បទល្មើសដីធ្លីនេះ ភាគច្រើនកើតឡើងនៅក្នុងខេត្តព្រះសីហនុ ព្រះវិហារ កំពង់ធំ បាត់ដំបង ពោធិ៍សាត់ និងកំពង់ស្ពឺជាដើម។ នេះបើតាមរដ្ឋលេខាក្រសួងបរិស្ថាន៕
Tag:
វេង សាខុន
កសិកម្ម
ដីធ្លី
© រក្សាសិទ្ធិដោយ thmeythmey.com
