អន្តរជាតិ
នាយករដ្ឋមន្ត្រីម៉ាឡេស៊ីថ្មី Muhyiddin ទាត់ចោលការចោទប្រកាន់ថា លោកជាជនក្បត់ នាយករដ្ឋមន្ត្រីម៉ាឡេស៊ីទើបតែងតាំងថ្មី លោក Muhyiddin Yassin (Xinhua)
× នាយករដ្ឋមន្ត្រីម៉ាឡេស៊ីទើបតែងតាំងថ្មី លោក Muhyiddin Yassin បានចេញមុខបដិសេធការចោទប្រកាន់ថា លោកគឺជាជនក្បត់។ លោក បកស្រាយថា លោកទទួលតំណែងជានាយករដ្ឋមន្ត្រីជំនួសលោក មហាធៀ មហាម៉ាត់ នេះ ក្នុងគោលដៅស្ដារស្ថានការណ៍នយោបាយ ខណៈគ្មានបេក្ខភាពនយោបាយណាដទៃទៀតមានសំឡេងគាំទ្រភាគច្រើនក្នុងសភា។
ក្នុងសុន្ទរកថាដំបូងបង្អស់ក្នុងនាមជានាយករដ្ឋមន្ត្រីទី៨របស់ម៉ាឡេស៊ី កាលពីថ្ងៃចន្ទ ទី២ ខែមីនា លោក Muhyiddin Yassin គូសបញ្ជាក់ថា៖«ខ្ញុំ ដឹងថា មនុស្សជាច្រើន ខឹងសម្បារនឹងខ្ញុំ»។ តាមរយៈកញ្ចក់ទូរទស្សន៍ លោក សង្កត់ធ្ងន់ថា៖«ខ្ញុំមិនមែនជាជនក្បត់ឡើយ។ [...] ខ្ញុំកាន់តំណែងនេះ គឺដើម្បីជួយសង្គ្រោះប្រទេសពីភាពមិនច្បាស់លាស់នយោបាយដែលកំពុងបន្ត»។
ក្នុងសន្ទរកថាដដែលនេះ លោក Muhyiddin បានពន្យល់ថា លោកពុំធ្លាប់មានសង្ឃឹមកាន់តំណែងជានាយករដ្ឋមន្ត្រីឡើយ។ តាមការចុះផ្សាយរបស់ទូរទស្សន៍សិង្ហបុរី Channel News Asia លោក Muhyiddin អះអាងទៀតថា ឱកាសនេះបានកើតឡើងនៅពេលបេក្ខភាពនាយករដ្ឋមន្ត្រីទាំងពីរ បរាជ័យក្នុងការទទួលបានសំឡេងគាំទ្រភាគច្រើនក្នុងសភា ហើយឈ្មោះលោក ត្រូវបានតែងតាំងដោយសមាជិកសភាបក្ស Bersatu និងមេដឹកនាំបក្សនយោបាយផ្សេងទៀត ដែលជឿជាក់ថាលោកមានសំឡេងគាំទ្រភាគច្រើន។
«ខ្ញុំបានចំណាយគិតយ៉ាងម៉ត់ចត់ មុនពេលសម្រេចចិត្ត។ តើជម្រើសអ្វីដែលខ្ញុំមាន? បន្តគាំទ្រលោកបណ្ឌិត មហាធៀ ដែលពុំមានសំឡេងភាគច្រើន ឬព្រមទទួលយកការតែងតាំងជានាយករដ្ឋមន្ត្រី?» លោក Muhyiddin និយាយដូច្នេះ ដោយបន្តទៀតថា ប្រសិនបើលោក បន្តគាំទ្រលោក មហាធៀ វិបត្តិនយោបាយ នឹងបន្តអូសបន្លាយយូរទៀត ហើយវាក៏មានឱកាសដែលសភានឹងត្រូវរំលាយចោល និងការបោះឆ្នោតទូទៅមួយនឹងត្រូវរៀបចំធ្វើឡើងផងដែរ។
ទន្ទឹមនឹងការបកស្រាយរបស់ជំហររបស់លោក នាយករដ្ឋមន្ត្រី Muhyiddin ក៏បានសន្យាកសាងរដ្ឋាភិបាលស្អាតស្អំមួយ ដែលមានសេចក្តីថ្លៃថ្នូរ និងគ្មានអំពើពុករលួយ។ ត្រង់នេះ លោក ប្តេជ្ញាតែងតាំងសមាជិកគណៈរដ្ឋមន្ត្រីដែលជាមនុស្សស្អាតស្អំ, មានសមត្ថភាពនិងសេចក្តីថ្លែថ្នូរ។
«រដ្ឋាភិបាល ក្រោមការដឹកនាំរបស់លោក ក៏នឹងផ្ដោតសំខាន់លើកិច្ចប្រឹងប្រែងជំរុញអភិបាលកិច្ចល្អ និងសេចក្តីថ្លៃថ្នូរផងដែរ។ ទាំងនេះគឺរាប់បញ្ចូល ការទប់ស្កាត់អំពើពុករលួយ និងបំពានអំណាច ដោយពង្រឹងការអនុវត្តច្បាប់ជាដើម»។ នាយករដ្ឋមន្ត្រីវ័យ ៧២ឆ្នាំរូបនេះ បញ្ជាក់បែបនេះ ដោយបង្កើតពាក្យស្លោកមួយថា៖«រួមគ្នាកសាង និងស្តារប្រទេសយើងជាថ្មីឲ្យបានភ្លឺស្វាងជាមួយខ្ញុំ»។
សូមបញ្ជាក់ថា លោក Muhyiddin បានស្បថចូលកាន់តំណែងជានាយករដ្ឋមន្ត្រីកាលពីថ្ងៃអាទិត្យ ទី១ ខែមីនា ក្រោយពីការតស៊ូអំណាចមួយសប្តាហ៍ពេញក្នុងប្រទេសនេះ ដែលបង្កឡើងដោយការប្រកាសលាលែងតំណែងដ៏ភ្ញាក់ផ្អើលពីសំណាក់នាយករដ្ឋមន្ត្រីទី ៧ លោក មហាធៀ មហាម៉ាត់ ៕
Tag:
ម៉ាឡេស៊ី
Muhyiddin Yassin
© រក្សាសិទ្ធិដោយ thmeythmey.com